ନୂଆଦିଲ୍ଲୀ: ନିଲମ୍ବିତ ବିଜେପି ନେତ୍ରୀ ନୂପୁର ଶର୍ମାଙ୍କୁ ସୁପ୍ରିମକୋର୍ଟରୁ ବଡ ଆଶ୍ବସ୍ତି । ପ୍ରଫେଟ ମହମ୍ମଦଙ୍କ ବିରୁଦ୍ଧରେ ଆପତ୍ତିଜନକ ଟିପ୍ପଣୀ ଦେବା ମାମଲାରେ ତାଙ୍କୁ ଗିରଫ କରିବା ପାଇଁ ହୋଇଥିବା ଆବେଦନକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ । କୋର୍ଟ ଏହି ଆବେଦନକୁ ବିଚାର ପାଇଁ ଗ୍ରହଣ କରିବାକୁ ମନା କରିଦେଇଛନ୍ତି । ପ୍ରଧାନ ବିଚାରପତି ଜଷ୍ଟିସ ୟୁୟୁ ଲଳିତ, ଜଷ୍ଟିସ ଏସ ରବିନ୍ଦ୍ର ଭଟ ଏବଂ ପିଏସ ନରସିଂହାଙ୍କୁ ନେଇ ଗଠିତ ଖଣ୍ଡପୀଠ ଆବେଦନକାରୀଙ୍କୁ କହିଥିଲେ ଯେ, ''ଏହିଭଳି ପ୍ରସଙ୍ଗରେ ନିର୍ଦ୍ଦେଶ ଦେବା ବେଳେ କୋର୍ଟ ବେଶ୍ ସତର୍କ ରହିବା ଆବଶ୍ୟକ । ହୁଏତ ଘଟଣାଟି ଅଧିକ ସହଜ ଓ ସରଳ ମନେ ହେଉଛି । କିନ୍ତୁ ଏହାର ପରିମାଣ ସୁଦୂର ପ୍ରସାରୀ ରହିଛି । ତେଣୁ ଆମେ ଆପଣଙ୍କୁ ଆବେଦନ ପ୍ରତ୍ୟାହାର କରିବାକୁ ପରାମର୍ଶ ଦେଉଛୁ ।''

ଖଣ୍ଡପୀଠ ଘଟଣାରେ ହସ୍ତକ୍ଷେପ କରିବାକୁ ମନା କରିବା ପରେ ଆବେଦନକାରୀ ଆବେଦନ ପ୍ରତ୍ୟାହାର କରିନେବା ସହ ଏହା ଖାରଜ ହୋଇଯାଇଛି । କହିରଖୁଛୁ କି, ଅବୁ ସୋହେଲ ନାମକ ଓକିଲ ଏ ସମ୍ପର୍କିତ ପିଟିସନ ସୁପ୍ରିମକୋର୍ଟରେ ଦାୟର କରିଥିଲେ । ପ୍ରଫେଟ ମହମ୍ମଦ ବିରୋଧି ଟିପ୍ପଣୀ ପାଇଁ ନୂପୁର ଶର୍ମାଙ୍କ ବିରୁଦ୍ଧରେ ବିଭିନ୍ନ ଏକାଧିକ ମାମଲା ରୁଜୁ ହୋଇଛି । କିନ୍ତୁ ଏହାସତ୍ତ୍ବେ ମଧ୍ୟ ପୋଲିସ ତାଙ୍କ ବିରୁଦ୍ଧରେ କୌଣସି ପ୍ରକାର କାର୍ୟ୍ୟାନୁଷ୍ଠାନ ଗ୍ରହଣ କରିନାହିଁ । ତେଣୁ ଏହି ଘଟଣାର ସ୍ବାଧୀନ ଓ ନିରପେକ୍ଷ ତଦନ୍ତ ସହ ତାଙ୍କୁ ଗିରଫ ପାଇଁ ନିର୍ଦ୍ଦେଶ ଦିଆଯାଉ ବୋଲି ଆବେଦନକାରୀ ଓକିଲ ପିଟିସନରେ କହିଥିଲେ ।

Powered by Froala Editor