ଗୁରୁବାର ଲଗାତାର ଘରୋଇ ବଜାରରେ ସୁନା ଦର ହ୍ରାସ ହୋଇ ୧୬ ମାସର ସର୍ବନିମ୍ନ ସ୍ତରକୁ ପହଞ୍ଚିଛି। ଗ୍ଲୋବାଲ ମାର୍କେଟ ହାଜିର ବଜାରରେ ଗୁରୁବାର ସୁନା ମୂଲ୍ୟରେ ୦.୫ ପ୍ରତିଶତ ହ୍ରାସ ସହ ପ୍ରତି ଆଉନ୍ସ ଦର ୧,୬୮୭.୨୯ ଡଲାରକୁ ପହଞ୍ଚିଛି। ୨୦୨୧ ଅଗଷ୍ଟ ଆରମ୍ଭର ସ୍ତରକୁ ପହଞ୍ଚି ଯାଇଛି ସୁନାମୂଲ୍ୟ। ଏଥିରେ ଆମେରିକା ଗୋଲ୍ଡ ଫ୍ୟୁଚରରେ ସୁନା ମୂଲ୍ୟ ପ୍ରତି ଆଉନ୍ସ ୧,୬୮୭. ୩୦ ଡଲାରକୁ ଖସିଛି।

ତେବେ କେବଳ ସୁନା ନୁହେଁ ରୂପା ଦର ମଧ୍ୟ ବଜାରରେ ହ୍ରାସ ହୋଇଛି। ଆମେରିକା ସିଲଭର ସ୍ପଟ ପ୍ରାଇସ୍‌ ରେ ୦.୯ ପ୍ରତିଶତ ହ୍ରାସ ସହ ରୂପା ପ୍ରତି ଆଉନ୍ସ ୧୮.୪୯ ଡଲାରକୁ ପହଞ୍ଚିଛି। ପ୍ଲାଟିନମ ମଧ୍ୟ ୦.୭ ପ୍ରତିଶତ ଶସ୍ତା ହୋଇ ୮୫୨.୧୪ ଡଲାରକୁ ଖସିଛି। ତେବେ ପାଲେଡିୟମରେ ସାମାନ୍ୟ ବୃଦ୍ଧି ଦେଖାଯାଇଛି। ଏହାର ଦର ୦.୧ ପ୍ରତିଶତ ଚଢି ପ୍ରତି ଆଉନ୍ସ ୧,୮୬୩.୪୭ ଡଲାର ହୋଇଛି।

ତେବେ ଏହି ସମୟରେ ଘରୋଇ ବଜାରରେ ସୁନା ମୂଲ୍ୟ ୨୪ କ୍ୟାରେଟ୍ ସୁନା ପ୍ରତି ୧୦ ଗ୍ରାମ ୩୭୧ ଟଙ୍କା ଶସ୍ତା ହୋଇ ୫୦ହଜାର ୧୮୨ ଟଙ୍କାକୁ ପହଞ୍ଚିଛି। ସେହିପରି ୨୩ କ୍ୟାରେଟ୍ ସୁନା ପ୍ରତି ୧୦ ଗ୍ରାମ ୪୯, ୯୮୧ ଟଙ୍କାକୁ ହ୍ରାସ ହୋଇଥିବା ବେଳେ ୨୨ କ୍ୟାରେଟ ସୁନା ୪୫ହଜାର ୯୬୭ ଟଙ୍କା ଦରରେ କାରବାର ହେଉଛି। ୨୦୨୧ ପ୍ରାରମ୍ଭ କାଳରେ ସୁନା ପାଖାପାଖି ଏହି ଦରରେ କାରବାର କରୁଥିଲା।

ବିଶ୍ୱରେ ଆର୍ଥିକ ମାନ୍ଦାବସ୍ଥା ଆଶଙ୍କା ସତ୍ତ୍ୱେ ସୁନା ମୂଲ୍ୟରେ ହ୍ରାସ ଜାରି ରହିଛି। ସାଧାରଣତଃ ମାନ୍ଦାବସ୍ଥା ଓ ଯୁଦ୍ଧ ଆଦି ପରିସ୍ଥିତିରେ ସୁନା ଦର ବଢ଼ିଥାଏ। ତେବେ ଏବେର ପରିସ୍ଥିତି ଭିନ୍ନ ରହିଛି । ଆମେରିକାରେ ଟ୍ରେଜରୀ ୟିଲ୍ଡ ବଢିବା ଓ ଡଲାର ମଜଭୁତ ହେବା ଯୋଗୁ ସୁନା ମୂଲ୍ୟରେ ହ୍ରାସ ଆରମ୍ଭ ହୋଇଯାଇଛି।

Powered by Froala Editor