ରେଷ୍ଟୁରାଣ୍ଟରେ ଖାଉଥିବା ଗ୍ରାହକଙ୍କୁ ଏବେ ସର୍ଭିସ ଚାର୍ଜ ଦେବାକୁ ପଡିବ ନାହିଁ। ସୋମବାର କେନ୍ଦ୍ର ସରକାର ସର୍ଭିସ ଚାର୍ଜକୁ ନେଇ ଏ ନିଷ୍ପତ୍ତି ନେଇଛନ୍ତି। ଏଣିକି ହୋଟେଲ ଓ ରେଷ୍ଟୁରାଣ୍ଟରେ ମାଲିକମାନେ ମନଇଛା ସର୍ଭିସ ଚାର୍ଜ ଲଗାଇପାରିବେନି। ଜାତୀୟ ଉପଭୋକ୍ତା ସୁରକ୍ଷା ପ୍ରାଧିକରଣ (ସିସିପିଏ) ପକ୍ଷରୁ ସୋମବାର ଏହି ନିର୍ଦ୍ଦେଶ ଜାରି କରାଯାଇଛି।

ସାଧାରଣତଃ ରେଷ୍ଟୁରାଣ୍ଟରେ ଖାଇବା ପରେ ଯେବେ ବିଲ୍ ଆସିଥାଏ ସେଥିରେ ଅନେକ ପ୍ରକାରର ଚାର୍ଜ ଲାଗିଥାଏ। ଏଥିରେ ସର୍ଭିସ ଚାର୍ଜ ବି ସାମିଲ୍ ଥାଏ। ଗ୍ରାହକଙ୍କଠୁ ନିଆଯାଉଥିବା ଏହି ସର୍ଭିସ୍ ଚାର୍ଜ ସଂପୂର୍ଣ୍ଣ ଭୁଲ୍। ଏହାକୁ ନେଇ ଗତ ଅନେକ ଦିନ ଧରି ବିତର୍କ ଲାଗି ରହିଥିଲା। ଏବେ ଏହି ମାମଲା ଉପରେ ନିଷ୍ପତ୍ତି ହୋଇ ଯାଇଛି। କେନ୍ଦ୍ରୀୟ ଉପଭୋକ୍ତା ସୁରକ୍ଷା ପ୍ରାଧିକରଣ(ସିସିପିଏ) ସୋମବାର ନିଷ୍ପତ୍ତି ଶୁଣାଇ ହୋଟେଲ୍ ଏବଂ ରେଷ୍ଟୁରାଣ୍ଟରେ ବିଲ୍ ଉପରେ କୌଣସି ପ୍ରକାରର ସର୍ଭିସ ଚାର୍ଜ ଲଗାଇ ପାରିବେ ନାହିଁ ବୋଲି କହିଛନ୍ତି।

ଯେଉଁଥିରେ କୁହାଯାଇଛି ଯେ, ହୋଟେଲ କିମ୍ବା ରେଷ୍ଟୁରାଣ୍ଟ ମାଲିକ ଗ୍ରାହକଙ୍କୁ ସର୍ଭିସ ଚାର୍ଜ ଦେବାକୁ ବାଧ୍ୟ କରିପାରିବେ ନାହିଁ। ଏଥିସହ ଖାଦ୍ୟ ବିଲରେ ମଧ୍ୟ ଏହାକୁ ଯୋଡାଯିବ ନାହିଁ ବୋଲି ପ୍ରାଧିକରଣ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଯଦି କୌଣସି ହୋଟେଲ ଏହାକୁ ଖାଦ୍ୟ ବିଲରେ ଯୋଡିବାକୁ ଚେଷ୍ଟା କରନ୍ତି, ତେବେ ଏହା ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ଗ୍ରାହକ ଚାହିଁଲେ ସର୍ଭିସ ଚାର୍ଜ ଦେଇପାରିବେ।