ପ୍ରଖ୍ୟାତ ବଲିଉଡ୍‌ ଚଳଚ୍ଚିତ୍ର ପ୍ରଯୋଜକ ତଥା ନିର୍ଦେଶକ ବଳଦେବରାଜ ଚୋପ୍ରା ଓରଫ୍‌ ବି. ଆର୍‌. ଚୋପ୍ରାଙ୍କ ବଙ୍ଗଳା ୧୮୩ କୋଟି ଟଙ୍କାରେ ବିକ୍ରି କରାଯାଇଛି। ୨୫ ହଜାର ବର୍ଗ ଫୁଟର ଏହି ଘରଟି ମୁମ୍ବାଇର ଜୁହୁ ଅଞ୍ଚଳରେ ପ୍ରାୟ ଏକ ଏକର ଜମିରେ ରହିଛି। ପପୁଲାର ରିଅଲ୍‌ଇଷ୍ଟେଟ୍‌ ଡେଭଲପର୍‌ କେ. ରାହେଜା ଏହି ବଙ୍ଗଳାକୁ ଖରିଦ କରିଛନ୍ତି। ଏହି ବଙ୍ଗଳାଟିକୁ ବିଆର୍‌ ଚୋପ୍ରାଙ୍କ ବୋହୂ ତଥା ରବି ଚୋପ୍ରାଙ୍କ ପତ୍ନୀ ରେନୁ ରବି ଚୋପ୍ରାଙ୍କ ଠାରୁ କିଣିଛନ୍ତି।

ରିପୋର୍ଟ ମୁତାବକ, ରିଅଲ୍‌ଇଷ୍ଟେଟ୍‌ ଡେଭଲପର୍‌ ଏହି ସ୍ଥାନରେ ପ୍ରିମିୟମ ରେସିଡେନ୍‌ସିଆଲ୍‌ ପ୍ରୋଜେକ୍ଟ ତିଆରି କରିବାକୁ ପ୍ଲାନିଂ କରିଛନ୍ତି।

ସୂଚନାଯୋଗ୍ୟ, ବି. ଆର୍‌. ହାଉସ୍‌ରେ ହିଁ ଚୋପ୍ରାଙ୍କର ଅଧିକାଂଶ ବ୍ୟବସାୟ ଚାଲିଥିଲା। ୨୦୦୮ରେ ହିଁ ସେ ସେହି ଘରେ ଦେହ ତ୍ୟାଗ କରିଥିଲେ। ଶେଷ ପର୍ଯ୍ୟାୟରେ ହତାଶା ଏବଂ କେତେକ ସହ-ପ୍ରଯୋଜନା ବିଫଳ ହେବାରୁ ଚୋପ୍ରାଙ୍କର ପ୍ରଯୋଜନା ସଂସ୍ଥା ଦେବାଳିଆ ହୋଇଯାଇଥିଲା। ତେଣୁ, ବନ୍ଧା ପଡ଼ିଥିବା ବି.ଆର୍‌ ହାଉସ୍‌କୁ ମୁକୁଳାଇବା ପାଇଁ ୨୦୧୩ରେ ଅନେକ ଋଣଦାତାଙ୍କର କରଜ ପରିଶୋଧ କରିଥିଲେ ବୋଲି ତାଙ୍କ ପୁଅ କହିଥିଲେ। ବିଆର୍‌ ଚୋପ୍ରା ବକ୍ସ ଅଫିସକୁ  ‘ବକ୍ତ’, ‘ନୟା ଦୌର’, ‘ ଦ ବର୍ଣ୍ଣିଂ ଟ୍ରେନ୍‌’, ‘ ନିକାହା’ ବ୍ୟତୀତ ଆହୁରି ଅନେକ ହିଟ୍‌ ଫିଲ୍ମ ଦେଇଛନ୍ତି।