ଏନକାଉଣ୍ଟରରେ ୩ ଆତଙ୍କବାଦୀ ନିପାତ
ଶ୍ରୀନଗର: ଜମ୍ମୁ କାଶ୍ମୀରର ପୁଲଓ୍ବାମା ଜିଲ୍ଲାର ଦ୍ରାବଗାମ ଏରିଆରେ ଏନକାଉଣ୍ଟରରେ ୩ ଜଣ ଆତଙ୍କବାଦୀ ନିପାତ ହୋଇଛନ୍ତି । ଏନେଇ ଜମ୍ମୁ କାଶ୍ମୀର ଜୋନ ପୋଲିସ ପକ୍ଷରୁ ସୂଚନା ଦିଆଯାଇଛି । ସୂଚନା ଅନୁସାରେ, ପୁଲଓ୍ବାମା ଜିଲ୍ଲାର ଦ୍ରାବଗାମ ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ନେଇ ଗୁଇନ୍ଦା ସୂଚନା ମିଳିବା ପରେ ସର୍ଚ୍ଚ ଅପରେସନ କଡାକଡି କରିଥିଲା ସୁରକ୍ଷା ବଳ । ଆତଙ୍କବାଦୀଙ୍କ ସହ ମୁହାଁମୁହିଁ ହେବା ପରେ ଗୁଳି ବିନିମୟ ଆରମ୍ଭ ହୋଇଥିଲା । ଏଥିରେ ତିନି ଆତଙ୍କବାଦୀ ନିପାତ ହୋଇଥିଲେ ।
ତେବେ, ସମସ୍ତ ଆତଙ୍କବାଦୀ ସ୍ଥାନୀୟ ଅଞ୍ଚଳର ହୋଇଥିବା ଜଣାପଡିଛି । ମୃତ ଆତଙ୍କୀମାନେ ହେଲେ ଫାଜିଲ ନାଜିର୍ ଓ ଇରଫାନ୍ ଆହ ମଲିକ୍ । ଉଭୟଙ୍କ ଘର ପୁଲଓ୍ବାମା ଜିଲ୍ଲାରେ ବୋଲି ସୂଚନା ମିଳିଛି । ଘଟଣାସ୍ଥଳରୁ ବ୍ୟାପକ ପରିମାଣର ମାରଣାସ୍ତ୍ର, ଏକେ ୪୭ ରାଇଫଲ ଓ ଗୋଟିଏ ପିସ୍ତଲ ଜବତ ହୋଇଛି ।ଅନ୍ୟ ଜଣେ ଆତଙ୍କୀ ହେଉଛି ଜୁନାଇଦ୍ ଶ୍ରୀଗୋଜରୀ । ସହିଦ ପୋଲିସ କନଷ୍ଟେବଲ ରୟାଜ ଅହେମ୍ମଦଙ୍କ ହତ୍ୟାକାରୀ ଥିଲା ଜୁନାଇଦ୍ । ତେବେ ଏମାନେ ସମସ୍ତ ଲସ୍କର-ଇ-ତୋଇବା ଆତଙ୍କୀ ସଂଗଠନର ବୋଲି ଜଣାପଡିଛି ।
Powered by Froala Editor
