ପବ୍ଜୀ ଖେଳିବାକୁ ବାରଣ କରିବାରୁ ମା’କୁ ଗୁଳି କରି ହତ୍ୟା କଲା ପୁଅ
ଲକ୍ଷ୍ନୌ: ପବ୍ଜୀ ଖେଳିବାକୁ ବାରଣ କରିବାରୁ ମା’କୁ ଗୁଳି କରି ହତ୍ୟା କରିଛି ପୁଅ । ଏଭଳି ଏକ ହୃଦୟ ବିଦାରକ ଘଟଣା ଘଟିଛି ଉତ୍ତରପ୍ରଦେଶର ଲକ୍ଷ୍ନୌରେ । ପୁଲିସ୍ ନାବାଳକୁ ଗିରଫ କରି ଜୁଭେନାଇଲ୍ କୋର୍ଟରେ ହାଜର କରାଇଛି । ଏଥିସହିତ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି । ଏନେଇ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି ।
ପୁଲିସ୍ କହିବା ଅନୁଯାୟୀ, ଏହି ନାବାଳକ ଜଣଙ୍କ ୪୦ ବର୍ଷୀୟ ମା’ ସାଧନା ଓ ୯ ବର୍ଷର ସାନ ଭଉଣୀ ସହ ଲକ୍ଷ୍ନୌର ପିଆଜି ଅଞ୍ଚଳରେ ଥିବା ଆଲଡିକୋ କଲୋନୀରେ ରୁହନ୍ତି । ବାପା ଜଣେ ସେନା କର୍ମଚାରୀ ଓ ସେ କୋଲକାତାରେ ପୋଷ୍ଟିଂ ପାଇଛନ୍ତି । ନାବାଳକ ଜଣଙ୍କ ସବୁବେଳେ ପବ୍ଜୀ ଖେଳୁଥିଲେ । ଏହା ତାଙ୍କର ଏକ ପ୍ରକାଶ ନିଶାରେ ପରିଣତ ହୋଇଯାଇଥିଲା । ପରିବାର ଲୋକେ ଯେତେ କହିଲେ ବି ସେ ଶୁଣୁ ନଥିଲେ ।
ନାବାଳକ ଜଣଙ୍କ ସବୁଦିନ ଭଳି ରବିବାର ସନ୍ଧ୍ୟାରେ ମଧ୍ୟ ମୋବାଇଲରେ ଗେମ୍ ଖେଳିବା ଆରମ୍ଭ କରିଥିଲେ । କିନ୍ତୁ ସବୁବେଳେ ସେ ଗେମ ଖେଳୁଥିବାରୁ ସେଦିନ ମା’ ସାଧନା ତା’କୁ ଆକଟ କରିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏଥିରେ ଉତ୍କ୍ଷିପ୍ତ ହୋଇ ନାବାଳକ ଜଣଙ୍କ ତୁରନ୍ତ ଘରେ ଥିବା ବାପାଙ୍କ ଲାଇସେନ୍ସ ପ୍ରାପ୍ତ ବନ୍ଧୁକ ଆଣିଥିଲେ । ଏହାପରେ ସେ ମା’ଙ୍କ ଉପରୁ ଗୁଳି ଚଳାଇ ଦେଇଥିଲେ । ଗୁଳି ସିଧା ସାଧନାଙ୍କ ମୁଣ୍ଡରେ ବାଜିଥିଲା । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା ।
ଏହାପରେ ନାବାଳକ ଜଣଙ୍କ ମୃତଦେହ ଏକ ଘରେ ବନ୍ଦ କରି ରଖିଥିଲେ । ଦୁର୍ଗନ୍ଧ ଏଡ଼ାଇବା ପାଇଁ ରୁମ୍ ଫ୍ରେଶନର ଢାଳି ଚାଲିଥିଲେ । ଏପରିକି ଘଟଣା ସମ୍ପର୍କରେ କାହାରିକୁ ନ କହିବାକୁ ଭଉଣୀଙ୍କୁ ତାଗିଦ୍ କରିବା ସହିତ ତାଙ୍କୁ ଏକ କୋଠରୀରେ ବନ୍ଦ କରି ରଖିଥିଲେ । ହେଲେ ଦୁଇ ଦିନ ପରେ ଶବରୁ ଦୁର୍ଗନ୍ଧ ବାହାରି ଥିଲା । ଏହାପରେ ପଡ଼ୋଶୀ ଘଟଣା ସମ୍ପର୍କରେ ପୁଲିସ୍କୁ ଜଣାଇଥିଲେ । ପୁଲିସ୍ ମୃତଦେହ ଜବତ କରିବା ସହିତ ବ୍ୟବଚ୍ଛେଦ ନିମନ୍ତେ ପଠାଇଛି । ଏହାସହ ବନ୍ଦ କୋଠରୀରୁ ଉଭଣୀଙ୍କୁ ଉଦ୍ଧାର କରି ଡାକ୍ତରଖାନାରେ ଚିକିତ୍ସିତ କରାଇଛି । ଏହି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି ।
Powered by Froala Editor
