ଚଣ୍ଡିଗଡ: ଲାଞ୍ଚ ନେବା ଅଭିଯୋଗରେ ଗିରଫ ହୋଇଛନ୍ତି ପଞ୍ଜାବର ପୂର୍ବତନ କ୍ୟାବିନେଟ୍ ମନ୍ତ୍ରୀ ସାଧୁ ସିଂହ ଧର୍ମସୋତ । ଭିଜିଲାନ୍ସ ବିଭାଗ ତାଙ୍କୁ ଗିରଫ କରିବା ସହିତ ଜେଲ୍ ପଠାଇଛି । ଏହି ଘଟଣାରେ ଆଉ ଜଣେ ସାମ୍ବାଦିକଙ୍କୁ ମଧ୍ୟ ବାନ୍ଧିଛି ଭିଜିଲାନ୍ସ ବିଭାଗ । ସେ ହେଲେ କମଲଜିତ ସିଂହ ।

କିଛିଦିନ ତଳେ ଲାଞ୍ଚ କାରବାର ଅଭିଯୋଗରେ ଭିଜିଲାନ୍ସ ବ୍ୟୁରୋ ମୋହାଲିରୁ କିଛି ବନ ଅଧିକାରୀଙ୍କୁ ଧରିଥିଲା । ସେମାନଙ୍କୁ ଜେରା ବେଳେ ସାଧୁଙ୍କ ନାମ ପଦାକୁ ଆସିଥିଲା । ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କ କ୍ୟାବିନେଟରେ ସାଧୁ ଜଙ୍ଗଲ ଓ ସାମାଜିକ କଲ୍ୟାଣ ବିଭାଗ ମନ୍ତ୍ରୀ ଥିଲେ । ଏହି ସମୟରେ ସେ ଗୋଟିଏ ଲେଖାଏଁ ଗଛ କାଟିବା ଲାଗି ୫୦୦ ଟଙ୍କା ଲାଞ୍ଚ ନେଉଥିଲେ । ସେହିପରି ଚାରା ରୋପଣରେ ମଧ୍ୟ ଘୋଟାଲା ହେଉଥିବା ବନ ଅଧିକାରୀମାନେ ଭିଜିଲାନ୍ସ ନିକଟରେ ପ୍ରକାଶ କରିଥିଲେ । ସେମାନଙ୍କ ତଥ୍ୟକୁ ଆଧାର କରି ଆଜି ଭୋରୁ ଭିଜିଲାନ୍ସ ଟିମ୍ ଧର୍ମସୋତଙ୍କୁ ଅମଲୋହରୁ ଗିରଫ କରିଥିଲା ।

ଭଗୱନ୍ତ ମାନ ମୁଖ୍ୟମନ୍ତ୍ରୀ ହେବା ପରେ ଦୁର୍ନୀତିର ମୂଳପୋଛ କରିବାକୁ ବ୍ରଜ ଶପଥ ନେଇଛନ୍ତି । ଯେଉଁ ନେତା କିମ୍ବା ଅଫିସରଙ୍କ ନାମରେ କିଛି ଦୁର୍ନୀତି ଅଭିଯୋଗ ଆସୁଛି ତୁରନ୍ତ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉଛି । କ୍ୟାପଟେନ୍ ଅମରିନ୍ଦରଙ୍କ ସମୟରେ ସାଧୁଙ୍କ ନାମରେ ସ୍କଲାରସିପ୍ ସ୍କାନ ଅଭିଯୋଗ ଆସିଥିଲା । ହେଲେ ପରବର୍ତ୍ତୀ ସମୟରେ ତାଙ୍କୁ କ୍ଲିନ୍‌ଚିଟ୍ ମିଳିଥିଲା । ଏବେ ତାଙ୍କୁ ଗିରଫ ହେବା ପରେ ସବୁ ଗୁମର ଖୋଲିଛି ବୋଲି ଚର୍ଚ୍ଚା ହେଉଛି ।

Powered by Froala Editor