'ଦ ଆର୍ଚିଜ୍'ରେ ଡେବ୍ୟୁ କରିବେ ସୁହାନା
ମୁମ୍ବାଇ: କିଙ୍ଗଖାନ୍ ଫ୍ୟାନ୍ମାନଙ୍କ ପାଇଁ ଖୁସି ଖବର । ଖୁବ୍ଶୀଘ୍ର ବଲିଉଡ୍ରେ ଡେବ୍ୟୁ କରିବାକୁ ଯାଉଛନ୍ତି ତାଙ୍କ ଝିଅ ସୁହାନା । ଫିଲ୍ମ 'ଦ ଆର୍ଚିଜ୍'ରେ ସେ ଏଣ୍ଟ୍ରି ମାରିବେ । କେବଳ ସେ ନୁହନ୍ତି, ତାଙ୍କ ସହିତ ଶ୍ରୀଦେବୀଙ୍କ ଝିଅ ଖୁସି କପୁର ଓ ଅମିତାଭ ବଚ୍ଚନଙ୍କ ନାତି ଅଗସ୍ତ୍ୟା ନନ୍ଦା ମଧ୍ୟ ଏହି ଫିଲ୍ମ ମାଧ୍ୟମରେ ନିଜ ଅଭିନୟର ଯାଦୁ ଦେଖାଇବାକୁ ଯାଉଛନ୍ତି । ଶନିବାର ଫିଲ୍ମର ପୋଷ୍ଟର ଓ କାଷ୍ଟକୁ ପ୍ରଯୋଜନା ସଂସ୍ଥା ପକ୍ଷରୁ ଇନ୍ଷ୍ଟାଗ୍ରାମ୍ରେ ପୋଷ୍ଟ କରାଯାଇଛି । ଯାହାକୁ ନେଇ ଏବେ ବଲିଉଡ୍ରେ ମାହୋଲ୍ ବଦଳି ଯାଇଛି । ନୂଆପିଢ଼ିଙ୍କୁ ବହୁ ସୁପରଷ୍ଟାର ଓ ସେମାନଙ୍କ ଶୁଭେଚ୍ଛୁମାନେ ଅଭିନନ୍ଦନ ଜଣାଇଛନ୍ତି । ଫିଲ୍ମର ନିର୍ଦ୍ଦେଶକ ଅଛନ୍ତି ଜୋୟା ଅଖତର । ସେ ତାଙ୍କର ଏହି ପ୍ରୋଜେକ୍ଟକୁ ନେଇ ବେଶ୍ ଆଶାବାଦୀ ଥିବା କହିଛନ୍ତି ।
ସୁହାନାଙ୍କ ଡେବ୍ୟୁ ଖବର ଜଣାପଡ଼ିବା ପରେ ଭାବ ବିହ୍ୱଳ ହୋଇପଡ଼ିଛନ୍ତି ଶାହାରୁଖ୍ । ସେ ତାଙ୍କ ଇନ୍ଷ୍ଟାଗ୍ରାମ ଆଇଡିରେ ଫିଲ୍ମର ଫାଷ୍ଟ ଲୁକ୍ ପୋଷ୍ଟ କରିବା ସହିତ ତାଙ୍କ ଭଳି ଝିଅ ସୁହାନାଙ୍କୁ ମଧ୍ୟ ଢେର ସାରା ଭଲ ପାଇବା ଓ ଆଶୀର୍ବାଦ ଦେବାକୁ ନିବେଦନ କରିଛନ୍ତି । ବିଗ୍ ବି ଅମିତାଭ, ଆଲିଆ ଭଟ୍ଟ ଭଳି ଅନେକ ନାମୀଦାମୀ କଳାକାର ଅଭିନନ୍ଦନ ଓ ଶୁଭେଚ୍ଛା ଜଣାଇଥିବା ଦେଖିବାକୁ ମିଳିଛି । ଏହା ଏକ ରୋମାଣ୍ଟିକ୍ ଡ୍ରାମା ଫିଲ୍ମ ହୋଇଥିବାବେଳେ ୨୦୨୩ ନେଟ୍ଫ୍ଲିକ୍ସରେ ଏହା ରିଲିଜ୍ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି । ଫିଲ୍ମରେ ସୁହାନା ଭେରୋନିକା ଭୂମିକାରେ ଦର୍ଶକଙ୍କ ନଜର ଆସିବେ । ସେହିପରି ଅଗସ୍ତ୍ୟା ଆର୍ଚିଜ୍ ଏବଂ ଖୁସି ବେଟି ଚରିତ୍ରରେ ଅଭିନୟ କରିଛନ୍ତି । ଫିଲ୍ମଟି ପରଦାକୁ ଆସିବା ପରେ ଜଣାପଡ଼ିବ ଏହା ବକ୍ସ ଅଫିସ୍ରେ କିଭଳି କାରବାର କରୁଛି ଓ ସୁପରଷ୍ଟାର୍ମାନଙ୍କ ପୁଅ-ଝିଅମାନେ କିଭଳି ଭାବେ ଦର୍ଶକଙ୍କ ମନ ଜିଣୁଛନ୍ତି ।
Powered by Froala Editor
