ଜଙ୍ଗଲରେ ପ୍ରେମ ମହଙ୍ଗା ପଡ଼ିଲା, ପ୍ରେମିକକୁ ଟାଣି ଟାଣି ନେଇଗଲା ବାଘ
ମହାରାଷ୍ଟ୍ରର ଗଡଚିରୋଲୀ ଜଙ୍ଗଲରେ ପ୍ରେମୀ ଯୁଗଳଙ୍କ ସହିତ ଅଭାବନୀୟ ଘଟଣା ଘଟିଯାଇଛି । ଉଭୟ ଜଙ୍ଗଲରେ କିଛି ସମୟ ବିତାଇବାକୁ ଯାଇଥିବାବେଳେ ପ୍ରେମିକକୁ ବାଘ ଶିକାର କରି ମାରିଦେଇଛି ।
ସୂଚନାନୁସାରେ, ଗଡଚିରୋଲୀ ନିକଟସ୍ଥ ଏକ ଗ୍ରାମରେ ରୁହନ୍ତି ଅଜିତ ସୋମେଶ୍ୱର । ତାଙ୍କ ପ୍ରେମିକା ପାୟଲ ମଧ୍ୟ ସେହି ଗ୍ରାମରେ ରୁହନ୍ତି । ମଙ୍ଗଳବାର ଉଭୟ ନିରୋଳା ସ୍ଥାନରେ ପ୍ରେମାଳାପ କରିବାକୁ ଜଙ୍ଗଲକୁ ଯାଇଥିଲେ । କିନ୍ତୁ ପ୍ରେମିକ ଜାଣିନଥିଲା ସେ ଜଙ୍ଗଲରେ ମୃତ୍ୟୁ ଲୁଚି ରହିଛି ।
ଉଭୟ ପ୍ରେମିକ-ପ୍ରେମିକା ଜଙ୍ଗଲରେ ବୁଲୁଥିବା ବେଳେ ବାଘ ଅତର୍କିତ ଆକ୍ରମଣ କରିଥିଲା । ବାଘ ସିଧା ଅଜିତକୁ ଧରି ଲହୁଲୁହାଣ କରିପକାଇଥିଲା । ଜୀବନ ନଯିବା ଯାଏଁ ବାଘଟି ଅଜିତ ଉପରେ ଆକ୍ରମଣ କରିଥିଲା। ଏହାପରେ ପାୟଲଙ୍କ ଉପରେ ମଧ୍ୟ ଆକ୍ରମଣ କରିଥିଲା । ଶେଷରେ ଅଜିତର ମୃତଦେହକୁ ବାଘ ଟାଣି ନେଇଥିଲା । ଗୁରୁତର ଅବସ୍ଥାରେ ପାୟଲ ନିକଟସ୍ଥ ଗ୍ରାମକୁ ଆସି ସବୁ ଘଟଣା ବାବଦରେ ସୂଚନା ଦେଇଥିଲେ । ଲୋକେ ତୁରନ୍ତ ପାୟଲଙ୍କୁ ହସ୍ପିଚାଲରେ ଭର୍ତ୍ତି କରିବା ସହ ଅଜିତଙ୍କୁ ଖୋଜିବାକୁ ବାହାରିଥିଲେ । ଶେଷରେ ଜଙ୍ଗଲରୁ ଅଜିତର ମୃତଦେହ ମିଳିଛି । ଖବର ପାଇ ବନ କର୍ମଚାରୀ ଘଟଣାସ୍ଥଳରେ ପହଁଚି ତଦନ୍ତ ଆରମ୍ଭ କରିଛନ୍ତି ।
Powered by Froala Editor
