ମୂର୍ତ୍ତି କାରୀଗରରୁ ମ୍ୟୁଜିକ୍ କମ୍ପୋଜର ରବି ବସରୁର୍
ନୂଆଦିଲ୍ଲୀ: କେଜିଏଫ୍-୨ ଫିଲ୍ମ ଏବେ ସାରା ଦେଶରେ ପକାଇଛି ଚହଳ । ଏହାର ସଙ୍ଗୀତ ଠାରୁ ଆରମ୍ଭ କରି ଅଭିନୟ ସବୁକିଛି ଦର୍ଶକଙ୍କୁ କରିଛି ପାଗଳ । ଫିଲ୍ମର ନିର୍ମାତା ମଧ୍ୟ ଏହାର ପ୍ରତ୍ୟେକ କ୍ଷେତ୍ରକୁ ଗୁରୁତ୍ୱ ଦେଇଛନ୍ତି । ସେଥିପାଇଁ ଏହା ଯୁବପିଢ଼ିଙ୍କ ଠାରୁ ଆରମ୍ଭ କରି ମଧ୍ୟ ବୟସ୍କ ଓ ବୃଦ୍ଧଙ୍କ ପର୍ୟ୍ୟନ୍ତ ସଭିଙ୍କ ମନକୁ ଛୁଇଁଛି । ଇତିମଧ୍ୟରେ ଏହି ଫିଲ୍ମର ସଙ୍ଗୀତ ନିର୍ଦ୍ଦେଶକ ଦେଇଥିବା ରବି ବସରୁର୍ଙ୍କ ବିଷୟରେ ଆସିଛି କିଛି ରୋଚକ ତଥ୍ୟ । ତାଙ୍କ ସଂଘର୍ଷମୟ ଜୀବନ ବିଷୟରେ ନିଜେ ଖୁଲାସା କରିଛନ୍ତି ରବି ।
ଦିନେ ସେ ମୂର୍ତ୍ତି କାରୀଗର ଭାବେ ପରିବାର ଲୋକଙ୍କ ସହିତ କାମ କରୁଥିଲେ । ହେଲେ ସଙ୍ଗୀତ ପ୍ରତି ଥିବା ତାଙ୍କ ଭଲ ପାଇବା ଓ ଆଗ୍ରହ ଆଜି ତାଙ୍କୁ ଜଣେ ସଫଳ ପ୍ରତିଷ୍ଠିତ ମ୍ୟୁଜିକ୍ କମ୍ପୋଜର ଭାବେ ପରିଚିତ କରାଇଛି । ତେବେ ଏଥିପାଇଁ ତାଙ୍କୁ ଅନେକ ଘାତ ପ୍ରତିଘାତ ସହିବାକୁ ପଡ଼ିଛି । ବହୁ ସଂଘର୍ଷ ପରେ ସେ ଏହି ସ୍ଥାନରେ ପହଞ୍ଚି ପାରିଛନ୍ତି ।
ରବି ଗରିବ ପରିବାରରେ ଜନ୍ମ ଗ୍ରହଣ କରିଥିଲେ । ପିଲାଦିନେ ପରିବାର ଲୋକେ ତାଙ୍କୁ କିରଣ ବୋଲି ଡାକୁଥିଲେ । ରବିଙ୍କ ୪ ଭାଇ ଭଉଣୀ । ପରିବାର ଲୋକେ ମୂର୍ତ୍ତି କାମ କରୁଥିଲେ । ପିଲାଦିନୁ ରବିଙ୍କ ଗୀତ ପ୍ରତି ଦୁର୍ବଳତା ଥିଲା । ତୁଳସୀ ଦୁଇ ପତ୍ରରୁ ବାସିବା ଭଳି ରବିଙ୍କ ପ୍ରତିଭା ପିଲାଟି ଦିନରୁ ଜଣାପଡ଼ିଥିଲା । ହେଲେ ସଙ୍ଗୀତ ସାଧନା ପାଇଁ ପରିବାର ଲୋକଙ୍କ ପାଖରେ ସମ୍ବଳ ନଥିଲା । ତେଣୁ ସେ ବାଧ୍ୟ ହୋଇ ଚୁପ୍ ରହିଥିଲେ । ହେଲେ ଜୀବନ ଯୁଦ୍ଧରେ ହାରି ଯାଇନଥିଲେ । ସବୁପରେ ବି ସଙ୍ଗୀତକୁ ଛାଡ଼ି ପାରିନଥିଲେ । ଘରେ ସବୁବେଳେ ଭଜନ ବଜାଉଥିଲେ । ଆଉ ଏହାକୁ ମନ ଦେଇ ଶୁଣିବା ସହିତ କିଛି କିଛି ଶିଖିବାକୁ ଚେଷ୍ଟା କରୁଥିଲେ ।
ପିଲାଦିନେ ପଢ଼ାରେ ଦୁର୍ବଳ ଥିଲେ ରବି । ୮ମ ଶ୍ରେଣୀରେ ଫେଲ୍ ହୋଇଥିଲେ । ୧୦ ଶ୍ରେଣୀରେ କଷ୍ଟେ ମଷ୍ଟେ ପାସ୍ କରିଗଲେ । ୧୪ ବର୍ଷରେ ସେ ମୂର୍ତ୍ତି ଗଢ଼ିବା ଶିଖିବା ପାଇଁ ଏବଂ କନ୍ନଡ ଚଳଚ୍ଚିତ୍ର ଜଗତ ସହିତ ଯୋଡି ହେବା ପାଇଁ ବେଙ୍ଗାଲୁରୁ ପଳାଇ ଆସିଥିଲେ । ସେଠାରେ ସେ ସକାଳେ ମୂର୍ତ୍ତି ତିଆରି କରୁଥିଲେ । ସନ୍ଧ୍ୟାରେ ସଙ୍ଗୀତ କମ୍ପୋଜ୍ କରିବାରେ ଲାଗି ପଡୁଥିଲେ । ବେଙ୍ଗାଲୁରୁରେ ଏଭଳି ଭାବେ କିଛିଦିନ କଟିଥିଲା । ଏହାପରେ ସେ ବମ୍ବେ ଚାଲିଗଲେ । ସେଠାରେ ସକାଳେ ମୂର୍ତ୍ତି ତିଆରି କଲେ । ରାତିରେ ପବ୍ ଗଲେ । ପବ୍ରେ ସେ ବଲିଉଡ୍ ମ୍ୟୁଜିସିଆନ୍ କିମ୍ବା ସଙ୍ଗୀତ ନିର୍ଦ୍ଦେଶକଙ୍କ ସହ ଭେଟି ତାଙ୍କ କାମ ଦେଖାଇବାକୁ ଚାହୁଁଥିଲେ । ସେ ସମୟରେ ଯେତିକି ରୋଜଗାର ହେଉଥିଲା ସେଥିରେ ସେ ନିଜେ ଚଳିବା କଷ୍ଟକର ହୋଇପଡୁଥିଲା । ଘରକୁ ଆର୍ଥିକ ସାହାଯ୍ୟ କରିବାକୁ ଇଛା ଥିଲେ ମଧ୍ୟ ତାହା ସମ୍ଭବ ହୋଇନଥିଲା । ଘର ପାଇଁ ହୋଇଥିବା ଏକ ଋଣର ବୋଝ ପରିବାର ଲୋକଙ୍କୁ ଚାପରେ ରଖୁଥିଲା । ଏହାପରେ ରବି ଏକ ବଡ ନିଷ୍ପତ୍ତି ନେଇଥିଲେ । ମାଙ୍ଗଲୋରର ଏକ ହସ୍ପିଟାଲ୍ ଯାଇ ସେ ତାଙ୍କ କିଡ୍ନି ବିକିବା ନେଇ କଥାହେଲେ । ଏହାପରେ ତାଙ୍କୁ ଓଟି ନିଆଗଲା । ସେଠାକୁ ଯିବା ପରେ ରବି ଏକଦମ୍ ଭୟଭୀତ ହୋଇଗଲେ । ତାଙ୍କୁ ଲାଗିଲା, କାଳେ ତାଙ୍କର ୨ଟି କିଡ୍ନି ନେଇଯିବେ । ତେଣୁ ସେ ଟଏଲେଟ୍ କହି ବାହାରକୁ ଆସିଗଲେ । ଆଉ ଓଟି ଭିତରକୁ ଗଲେନି । ଏହାପରେ ସେ ଡାକ୍ତରଙ୍କୁ ତାଙ୍କ ସମସ୍ୟା ବିଷୟରେ କହିଲେ, ପରେ ତାଙ୍କୁ ହସ୍ପିଟାଲରେ ସିକ୍ୟୁରିଟି ଗାର୍ଡ ଭାବେ ଚାକିରି ମିଳିଲା । ଏହାପରେ ଧୀରେ ଧୀରେ ତାଙ୍କ ଜୀବନରେ ପରିବର୍ତ୍ତନ ଆସିଲା ।
ତାଙ୍କର ଜଣେ ବନ୍ଧୁ ତାଙ୍କ ପାଇଁ ବେଙ୍ଗାଲୁରୁର ଏକ ରେଡିଓ ଷ୍ଟେସନରେ ଚାକିରି ଖୋଜିଦେଲେ । ସେଠାରେ ତାଙ୍କୁ ମାସିକ ୧୫ ହଜାର ଟଙ୍କା ମିଳିଲା । ସେଠାରୁ ତାଙ୍କୁ ପ୍ରଥମ ଫିଲ୍ମ ପାଇଁ ଅଫର ଆସିଥିଲା । ଏହାକୁ ହାତ ଛଡ଼ା କରିନଥିଲେ ରବି । ଯେତିକି ପାରିଶ୍ରମିକ ମିଳୁଥିଲା ସେଥିରେ ସେ ଫିଲ୍ମ କରିବାକୁ ରାଜି ହୋଇଥିଲେ । ଏଭଳି ଭାବେ ସଫଳତାର ଗୋଟିଏ ପରେ ଗୋଟେ ପାହାଚ ଚଢ଼ି ଚାଲିଲେ । ଇତିମଧ୍ୟରେ ସେ ୬୪ଟି ଫିଲ୍ମରେ କାମ କରି ସାରିଲେଣି । କେଜିଏଫ୍-୨ ଫିଲ୍ମରେ ସେ ପ୍ରଥମ ଥର ମ୍ୟୁଜିକ୍ ଡିରେକ୍ଟର ଭାବେ କରିଛନ୍ତି । ଆଉ ଏଥିରେ ସେ ସଫଳତା ପାଇଛନ୍ତି । ଏଥିପାଇଁ ତାଙ୍କୁ ସାହାଯ୍ୟ କରିଥିବା ପ୍ରତ୍ୟେକ ବ୍ୟକ୍ତିଙ୍କୁ କୃତଜ୍ଞତା ଜଣାଇଛନ୍ତି ।
Powered by Froala Editor
