ପ୍ରଧାନମନ୍ତ୍ରୀଙ୍କୁ ଆର୍ଡିଏକ୍ସରେ ଉଡାଇ ଦେବାକୁ ଧମକ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବୋମା ବିସ୍ଫୋରଣ କରି ଉଡାଇ ଦେବାକୁ ଜଣେ ଅଜଣା ବ୍ୟକ୍ତି ଧମକ ଦେଇଛି । ଏହାକୁ ନେଇ National Investigation Agency ବା ଜାତୀୟ ଗୁଇନ୍ଦା ବିଭାଗକୁ ଏକ ଧମକପୂର୍ଣ୍ଣ ମେଲ୍ ଆସିଛି । ୨୦ କିଲୋଗ୍ରାମ ଆରଡିଏକ୍ସ ରଖିଥିବା ମେଲ ଆସିଛି । ଏହି ଧମକ ମିଳିବା ପରେ ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ବଢାଇଦିଆଯିବା ସହ ଇ-ମେଲର ଉତ୍ସ ଖୋଜାଯାଉଛି । ଏହାର ତଦନ୍ତଭାର ଏନଆଇଏକୁ ହସ୍ତାନ୍ତର କରାଯାଇଛି ।
ଇ-ମେଲରେ ଉକ୍ତ ବ୍ୟକ୍ତି କହିଛି ଯେ ତା ପାଖରେ ସେ ୨୦ କିଲୋଗ୍ରାମ ଆରଡିଏକ୍ସ ( ଶକ୍ତିଶାଳୀ ବିସ୍ଫୋରକ) ରଖିଛି । ଦେଶର ୨୦ଟି ବଡ଼ ସହରରେ ଏସବୁ ବିସ୍ଫୋରକ ଖଞ୍ଜା ଯାଇଛି । ସେସବୁ ସହରରେ ବିସ୍ଫୋରଣ କରି ପ୍ରାୟ ୨ କୋଟି ଲୋକଙ୍କୁ ହତ୍ୟା କରାଯିବ । ଏଥିପାଇଁ ଗତ ଫେବ୍ରୁଆରି ୨୮ରୁ ସେ ସ୍ଲିପର ସେଲକୁ ସକ୍ରିୟ କରିସାରିଛି । ସେ ଆହୁରି ମଧ୍ୟ କହିଛି ମୋଦୀ ତା’ଜୀବନକୁ ନଷ୍ଟ କରିଦେଇଛନ୍ତି, ଏଣୁ ସେ ମୋଦୀଙ୍କୁ ହତ୍ୟା କରି ପ୍ରତିଶୋଧ ନେବ ।
ଉକ୍ତ ଅଜଣା ବ୍ୟକ୍ତି ଲେଖିଛି ଯେ, ମୁଁ ଏଭଳି କିଛି ଆତଙ୍କବାଦୀଙ୍କୁ ସାକ୍ଷାତ କରିଛି ଯେଉଁମାନେ ମୋତେ ସାହାଯ୍ୟ କରିବେ । ମୋତେ ଅତି ସହଜରେ ବୋମା ମିଳି ଯାଇଥିବାରୁ ମୁଁ ବେଶ୍ ଖୁସି ଅଛି । ଏବେ ମୁଁ ଯେଉଁଠି ଚାହିଁବି ସେଇଠି ବିସ୍ଫୋରଣ କରିବି ବୋଲି ଉଲ୍ଲେଖ କରିଛି ।
ଏହି ଧମକଭରା ମେଲ୍ ପାଇବା ପରେ ଏନଆଇଏ ଏବଂ ଅନ୍ୟ ଗୁଇନ୍ଦା ବିଭାଗ ମେଲ ପଠାଇଥିବା ବ୍ୟକ୍ତିକୁ ଟ୍ରେସ୍ କରିବାକୁ ଚେଷ୍ଟା କରୁଛନ୍ତି । ସେମାନେ ଆଇପି ଠିକଣାକୁ ଟ୍ରାକ୍ କରିବାକୁ ଉଦ୍ୟମ ଜାରି ରଖିଛନ୍ତି ଏବଂ ଯଥାଧିକ ସୂଚନା ସଂଗ୍ରହ କରିବାରେ ଲାଗି ପଡ଼ିଛନ୍ତି ।
Powered by Froala Editor
