ଭୁବନେଶ୍ୱର:  କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲାରେ ଆଜି ଏକ ବଡ଼ ଖବର ସାମନାକୁ ଆସିଛି ।  ରିମାଣ୍ଡରେ ଥିବା ୪ ଅଭିଯୁକ୍ତଙ୍କୁ କ୍ରାଇମବ୍ରାଞ୍ଚ ଦୁଇଟି ଗାଡ଼ିରେ ମୁଖ୍ୟାଳୟରୁ କୁଆଡେ଼ ନେଇଯାଇଥିବା ଜଣାଯାଇଛି ।  ତେବେ ସମ୍ପୃକ୍ତ ୪ ଜଣଙ୍କୁ କୁଆଡେ଼ ନିଆଯାଉଛି ସେ ସମ୍ପର୍କରେ କ୍ରାଇମବ୍ରାଞ୍ଚ ପକ୍ଷରୁ କୌଣସି ସୂଚନା ଦିଆଯାଇନାହିଁ ।   

କୌଣସି ଏକ ନୂଆ ସୁରାକ ପାଇ କ୍ରାଇମବ୍ରାଞ୍ଚ ସେମାନଙ୍କୁ ସ୍ପଟକୁ ନେଉଥିବା ଅନୁମାନ କରାଯାଉଛି । ଅନ୍ୟପକ୍ଷରେ ଆଜି ହେବାକୁ ଥିବା କ୍ରାଇମ ସିନ ରିକ୍ରିଏସନକୁ ସ୍ଥଗିତ ରଖାଯାଇଛି ।  ଆଜି ନୁହେଁ, ଆସନ୍ତାକାଲି କ୍ରାଇମ ସିନ ରିକ୍ରିଏସନ ହେବ ବୋଲି  କ୍ରାଇମବ୍ରାଞ୍ଚ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି । 

ଅନ୍ୟପକ୍ଷରେ ହତ୍ୟାକାଣ୍ଡ ମାମଲାରେ ଦୁଇ ଅଭିଯୁକ୍ତ ଶର୍ମିଷ୍ଠା ରାଉତ ଓ ଝୁନା ଭୋଇଙ୍କ ବାବଦରେ ଚାଞ୍ଚଲ୍ୟକର ତଥ୍ୟ ପ୍ରଦାନ କରିଛି କ୍ରାଇମବ୍ରାଞ୍ଚ । ମାନସଙ୍କୁ କୌଣସି ଏକ ଓଜନିଆ ବସ୍ତୁ ସାହାଯ୍ୟରେ ଅତି ନିର୍ମମ ଭାବେ ମାଡ଼ ମରାଯାଇଥିଲା । ଏହି ମାଡ଼ ଯୋଗୁଁ ତାଙ୍କ ଛାତିର ପଞ୍ଜରା ହାଡ଼ ଭାଙ୍ଗି ଯାଇଥିଲା ଏବଂ ଏହି କାରଣରୁ ମାନସଙ୍କ ମୃତ୍ୟୁ ଘଟିଥିଲା । ଏହାସହିତ ମୃତ୍ୟୁ ପୂର୍ବରୁ ତାଙ୍କୁ ଅକଥନୀୟ ଶାରୀରିକ ନିର୍ୟ୍ୟାତନା ଦିଆଯାଇଥିଲା । ପୋଷ୍ଟମର୍ଟମ ରିପୋର୍ଟକୁ ଆଧାର କରି ଏହି ତଥ୍ୟ ପ୍ରଦାନ କରିଛି ତଦନ୍ତକାରୀ ସଂସ୍ଥା ।

ଶର୍ମିଷ୍ଠା ଓ ଝୁନାଙ୍କୁ ଜୋରାରୁ ମିଳିଥିବା ଅନେକ ତଥ୍ୟ ମଧ୍ୟ ଏକ ପ୍ରେସ ରିଲିଜ୍ ମାଧ୍ୟମରେ କ୍ରାଇମବ୍ରାଞ୍ଚ ଗଣମାଧ୍ୟମକୁ ଅବଗତ କରାଇଛି । ଏହି ପ୍ରେସ ରିଲିଜ ମୁତାବକ, ହତ୍ୟାକାଣ୍ଡ ନେଇ ଗଣମାଧ୍ୟମରେ ଚର୍ଚ୍ଚା ଜୋର ଧରିବା ପରେ ନିଜ ଉପରେ ପୋଲିସର ଗିରଫଦାରୀର ଖଣ୍ଡା ଝୁଲୁଥିବା ଜାଣି ଶର୍ମିଷ୍ଠା ଓ ଝୁନା ପୋଲିସକୁ ଚକମା ଦେଖାଇବା ପାଇଁ ଏକ ସୁଚିନ୍ତିତ ଯୋଜନା ପ୍ରସ୍ତୁତ କରିଥିଲେ । ଏହି ଯୋଜନା ଅନୁଯାୟୀ ଉଭୟ ଭୁବନେଶ୍ବର ଛାଡ଼ି ବିଭିନ୍ନ ସ୍ଥାନରେ ରହୁଥିଲେ ଏବଂ ଶର୍ମିଷ୍ଠା ନିଜର ମୋବାଇଲ ଫୋନଟିକୁ ନିଜ ଫ୍ଲାଟରେ ଛାଡ଼ି ଦେଇ ନୂଆ ସିମ୍ କାର୍ଡ ମଧ୍ୟ କିଣିଥିଲେ । ବିଶେଷକରି ନିଜର ସମ୍ପର୍କୀୟମାନଙ୍କ ସହ କଥା ହେବା ପାଇଁ ବ୍ୟବହାର କରୁଥିଲେ । ଏହି କ୍ରମରେ ଶର୍ମିଷ୍ଠା ଭଦ୍ରକ ଅଗରପଡ଼ାରୁ ଗୋଟିଏ ସିମ୍ କାର୍ଡ କିଣିଥିବା ବେଳେ ଆଉ ଦୁଇଟି ସିମ୍ କାର୍ଡକୁ କୋଲକତାରୁ କିଣିଥିଲେ ।ଗତ ମାର୍ଚ୍ଚ ୭ ତାରିଖ ଶର୍ମିଷ୍ଠା ଝୁନା ସହିତ ଯାଜପୁର କାଳିଆପାଣି ଠାରେ ଥିବା ନିଜ ଶାଶୁଘରେ ପହଞ୍ଚିଥିଲେ । ସେଠାରେ ତିନି ଦିନର ରହଣୀ ମଧ୍ୟରେ ନିଜ ସ୍ବାମୀ ସହ ପୁଣି ମିଳିମଶି ରହିବା ପାଇଁ ଏକ ପୂଜା ମଧ୍ୟ କରିଥିଲେ । ଏହାପରେ ୧୦ ତାରିଖ ଦିନ ସକାଳ ସାଢେ ୫ଟା ବେଳେ ଶର୍ମିଷ୍ଠା ନିଜ ଶାଶୁ ଓ ଝୁନାଙ୍କୁ ସାଥିରେ ନେଇ କାଳିଆପାଣି ଛାଡ଼ି ଭଦ୍ରକ ଅଗରପଡ଼ାକୁ ଆସିଥିଲେ ଏବଂ ସ୍ଥାନୀୟ ପୁରୁଷଣ୍ଡ ଗାଁରେ ଥିବା ନଣଦଙ୍କ ଘରକୁ ଯାଇଥିଲେ । ସେଠାରେ ତିନି ଦିନ ରହିବା ପରେ ୧୩ ତାରିଖ ଦିନ ଅପରାହ୍ନ ୨ଟା ୫୦ ମିନିଟ୍ ସମୟରେ ଶର୍ମିଷ୍ଠା ଓ ଝୁନା ବାଲେଶ୍ବର ବସଷ୍ଟାଣ୍ଡକୁ ଆସିଥିଲେ ଏବଂ ସେଠାରୁ ବସ ଯୋଗେ କୋଲକତା ପଳାଇ ଯାଇଥିଲେ ।

Powered by Froala Editor