ହାଇଦ୍ରାବାଦ : ହାଇଦ୍ରାବାଦର ଏକ ଗୋଦାମରେ ନିଆ ଲାଗିଯିବାରୁ ୧୧ ଜଣ ଜୀବନ୍ତ ଦଗ୍ଧ ହୋଇଛନ୍ତି  । ଗତକାଲି ବିଳମ୍ବିତ ରାତିରେ ହାଇଦ୍ରାବାଦର ଭାଇଗୁଡ଼ା ଅଂଚଳରେ ଥିବା କବାଡ଼ି ଖାନାରେ ନିଆଁ ଲାଗି ଯାଇଥିଲା  । ଜୀବନ୍ତ ଦଗ୍ଧ ହୋଇଥିବା ଲୋକମାନେ ସମସ୍ତେ  ଶ୍ରମିକ ଭାବେ କାର୍ଯ୍ୟ କରୁଥିଲେ  । ଦିନ ସାରା କାମ କରିବା ପରେ ରାତିରେ ସେଠାରେ ଶୋଉଥିଲେ  ।

ଗୋଦାମରେ ନିଆଁ ଲାଗିବା ପରେପରେ ସେଠାରେ ପୁଲିସ ଓ ଅଗ୍ନିଶମ ବାହିନୀ ପହଁଚି ଯାଇଥିଲେ  । ତେବେ ନିଅାଁର ପ୍ରକୋପ ଏତେ ଥିଲାଯେ, ଆୟତ୍ତ କରିବା ସମ୍ଭବପର ହୋଇନଥିଲା  । ଧୂଅାଁରେ ଶ୍ରମିକମାନେ ଶ୍ୱାସରୁଦ୍ଧ ହୋଇ ମୃତ୍ୟୁବରଣ କରିଥିଲେ  । ସେମାନେ ସମସ୍ତେ ବିହାରର ବୋଲି ଜାଣିବାକୁ ମିଳିଛି  । ଗୋଦାମରୁ ବାହାରିବା ପାଇଁ ଗୋଟିଏ ବାଟ ଥିଲା  । କିନ୍ତୁ ସେହି ସଟରଟି ରାତିରେ ବନ୍ଦ ରହିଥାଏ । ତେଣୁ ନିଅାଁ ଲାଗିଲେବି ଶ୍ରମିକମାନେ ପଦାକୁ ବାହାରି ପାରିନଥିଲେ  ।

ଏହି କବାଡ଼ି ଖାନାରେ ମଦ ବୋତଲ, ପ୍ଲାଷ୍ଟିକ, କାଗଜ ଥିବାରୁ ନିଅାଁ ହୁହୁ ହୋଇ ଜଳି ଉଠିଥିଲା  । ସର୍ଟସର୍କିଟ ଯୋଗୁଁ ନିଅାଁ ଲାଗିଥିବା ଅନୁମାନ କରାଯାଉଛି  । ଅପରପକ୍ଷରେ ମୃତ ଶ୍ରମିକଙ୍କ ପରିବାର ପାଇଁ ତେଲେଙ୍ଗାନା ମୁଖ୍ୟମନ୍ତ୍ରୀ ୫ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ରାଶି ଘୋଷଣା କରିଛନ୍ତି  ।

Powered by Froala Editor