ଟ୍ରାଫିକ୍ ନିୟମ ଭାଙ୍ଗିଲେ ଲୋକମାନେ ଜରିମାନା ଦେବା ବାଧ୍ୟତାମୂଳକ । ଏଥିପାଇଁ ପୁଲିସ ସବୁବେଳେ ସଜାଗ ରହୁଛନ୍ତି । ଚାଲାଣ କାଟୁଛନ୍ତି । ଯେଉଁଠି ବି ଯେକେହି ନିୟମ ଭାଙ୍ଗୁଛନ୍ତି ସେମାନଙ୍କ ଚାଲାଣ କଟାଯାଉଛି । ଏଣିକି ପୁଲିସ ନିୟମ ଭାଙ୍ଗିଲେ ଦୁଇ ଗୁଣା ଚାଲାଣ କରାଯିବ । ଏ ନିୟମ କରିଛନ୍ତି ଦିଲ୍ଲୀ ଅତିରିକ୍ତ ପୁଲିସ କମିଶନର(ଟ୍ରାଫିକ୍‌) ।

ଅତିରିକ୍ତ ପୁଲିସ କମିଶନର (ଟ୍ରାଫିକ) ଅଜୟ କୃଷ୍ଣ ଶର୍ମା କହିଛନ୍ତି ଯେ ସରକାରୀ ଗାଡି ଚଲାଇବା ସମୟରେ କିମ୍ବା ଡ୍ରାଇଭର ପାଖରେ ବସିଥିବା ସିଟରେ କିଛି ପୁଲିସ ସିଟ୍ ବେଲ୍ଟ ପିନ୍ଧୁନଥିବାର ଦେଖିବାକୁ ମିଳୁଛି । ଆଉ ବାରମ୍ବାର କହିବା ପରେ କିଛି ପୁଲିସ କର୍ମଚାରୀ ଟ୍ରାଫିକ ନିୟମ ମାନୁନଥିବାରୁ କଡା ନିୟମ ଲାଗୁ କରାଯାଇଛି । ଯେଉଁ ପୁଲିସ୍ କର୍ମଚାରୀ ଟ୍ରାଫିକ୍ ନିୟମକୁ ଉଲ୍ଲଂଘନ କରିବେ ସେମାନେ ନିର୍ଦ୍ଧାରିତ ଜରିମାନାର ଦୁଇ ଗୁଣ ଜରିମାନା ଦେବେ । ଏପରିକି ପୁଲିସ ୟୁନିଫର୍ମ ପିନ୍ଧି ଟ୍ରାଫିକ୍ ନିୟମ ଉଲ୍ଲଂଘନ କରୁଥିବାର ଦେଖିବାକୁ ମିଳିଲେ ଏମଭି ଆକ୍ଟର ଧାରା ୨୧୦ବି ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବିଭାଗର ଭାବମୂର୍ତ୍ତିକୁ ନଷ୍ଟ ନ କରିବା ପାଇଁ ଟ୍ରାଫିକ ନିୟମକୁ କଡାକଡି କରାଯାଇଥିବା ଅତିରିକ୍ତ ପୁଲିସ କମିଶନର (ଟ୍ରାଫିକ) କହିଛନ୍ତି ।

Powered by Froala Editor