ସାହାରନପୁର-ଦିଲ୍ଲୀ ଟ୍ରେନରେ ନିଆଁ : ଚାହୁଁ ଚାହୁଁ ଜଳିଗଲା ଇଞ୍ଜିନ ସହ ୨ ବଗି
ୟୁପିର ସାହାରନପୁରରୁ ଦିଲ୍ଲୀ ଯାଉଥିବା ଏକ ଯାତ୍ରୀବାହୀ ଟ୍ରେନରେ ଅଗ୍ନିକାଣ୍ଡ ଘଟିଛି । ଅଗ୍ନିକାଣ୍ଡରେ ଟ୍ରେନର ଇଞ୍ଜିନ୍ ସମେତ ଦୁଇଟି ବଗି ଜଳିପୋଡି ପାଉଁଶ ହୋଇଯାଇଛି । ମେରୁଠର ଦୌରାଲା ଷ୍ଟେସନରେ ଏହି ଅଗ୍ନିକାଣ୍ଡ ଘଟିଛି । ତେବେ ଦୁର୍ଘଟଣାର କାରଣ ସ୍ପଷ୍ଟ ହୋଇନାହିଁ ଯଦିଓ ସ୍ଥାନୀୟ ଲୋକ ସର୍ଟ ସର୍କିଟ ପାଇଁ ଏଭଳି ହୋଇଥିବା କହୁଛନ୍ତି । ଟ୍ରେନର ବ୍ରେକ୍ ଜାମ ଯୋଗୁଁ ଏହି ଦୁର୍ଘଟଣା ଘଟିଥିବା ମଧ୍ୟ କୁହାଯାଉଛି ।
ଶନିବାର ସକାଳେ ସାହାରନପୁର-ଦିଲ୍ଲୀ ଯାତ୍ରୀବାହୀ ଟ୍ରେନ ଦୌରାଲା ରେଲୱେ ଷ୍ଟେସନରେ ପହଞ୍ଚିଥିଲା । ଏହି ସମୟରେ ହଠାତ୍ ଟ୍ରେନର ୩ଟି ଡବାରେ ନିଆଁ ଲାଗିଯାଇଥିଲା । ଏବଂ ଏଥିରୁ ବାହାରୁଥିବା ଧୁଆଁରେ ସମ୍ପୂର୍ଣ୍ଣ ପରିବେଶ ଘୋଡେଇ ହୋଇଯାଇଥିଲା । ଫଳରେ ଯାତ୍ରୀମାନେ ଜୀବନ ବଞ୍ଚାଇ ବାହାରି ଯାଇଥିଲେ । ତେବେ ଏହି ସମୟରେ ଅନେକ ଯାତ୍ରୀ ଆହତ ମଧ୍ୟ ହୋଇଥିବା ଜଣାପଡ଼ିଛି । ଖବର ପାଇ ଘଟଣା ସ୍ଥଳରେ ଦମକଳ ବାହୀନି ପହଞ୍ଚି ସ୍ଥାନୀୟ ଲୋକଙ୍କ ସାହାଯ୍ୟରେ ନିଆଁକୁ ଆୟତ୍ତ କରିଛି । କିଛି ଯାତ୍ରୀଙ୍କ ସାହାଯ୍ୟରେ ଟ୍ରେନର ଅନ୍ୟ କୋଚଗୁଡ଼ିକୁ କାଟି ଅଲଗା କରାଯାଇଥିଲା । ଏହି ଘଟଣାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହୋଇଛି ।
Powered by Froala Editor
