ଗତ ସପ୍ତାହରେ ହାଇକୋର୍ଟ ମଧ୍ୟବର୍ତ୍ତୀକାଳୀନ ରାୟରେ କହିଥିଲେ ଯେ, ଶିକ୍ଷାନୁଷ୍ଠାନ ସବୁ ଖୋଲାଯାଇ ପାରେ କିନ୍ତୁ, କ‌ୌଣସି ଧାର୍ମିକ ବସ୍ତ୍ର ପରିଧାନ କରି ଆସିବାକୁ ଅନୁମତି ମିଳିବ ନାହିଁ। ସେହି ଅନୁଯାୟୀ, ଆଜି କର୍ଣ୍ଣାଟକର ମାଣ୍ଡ୍ୟା ଜିଲ୍ଲାସ୍ଥିତ ସରକାରୀ ଅନୁଦାନ ପ୍ରାପ୍ତ ଏକ ସ୍କୁଲ୍‌ର ଫାଟକ ପାଖରେ ଛାତ୍ରୀମାନଙ୍କୁ ହିଜାବ୍‌ ଖୋଲିଦେବାକୁ ନିର୍ଦେଶ ଦିଆଯାଇଥିଲା। ଏକ ସରକାରୀ ସହାୟକ ବିଦ୍ୟାଳୟର ବାଳିକା ମାନଙ୍କୁ ସୋମବାର ସ୍କୁଲ ପରିସରରେ ପ୍ରବେଶ କରିବା ପୂର୍ବରୁ ସେମାନଙ୍କ ହିଜାବ ହଟାଇବାକୁ କୁହାଯାଇଥିଲା।

ଯାହାର ଭିଡିଓ ଏବେ ସାମ୍ନାକୁ ଆସିଛି। ଭିଡିଓରେ ଦେଖିବାକୁ ମିଳିଛି ଯେ, ଦୁଇ ଜଣ ନବମ ଶ୍ରେଣୀ ଛାତ୍ରୀ ଜଣକ ଯେତେବେଳେ ହିଜାବ ପିନ୍ଧି ନିଜ ବାପା-ମା’ଙ୍କ ସହ ସ୍କୁଲ ଗେଟ୍‌ ପାଖକୁ ଆସୁଛନ୍ତି ସେତେବେଳେ ଶିକ୍ଷୟିତ୍ରୀ ଜଣକ ତାଙ୍କୁ ଅଟକାଇ ଦେଉଛନ୍ତି। ଛାତ୍ରୀଙ୍କୁ ହିଜାବ ହଟାଇବା ପାଇଁ କହୁଛନ୍ତି। ଏହାକୁ ନେଇ ଉଭୟ ଶିକ୍ଷୟିତ୍ରୀ ଏବଂ ଛାତ୍ରୀଙ୍କ ବାପା-ମା’ଙ୍କ ମଧ୍ୟରେ ପାଟିତୁଣ୍ଡ ମଧ୍ୟ ହେଉଛି। ପରେ ବାଧ୍ୟ ହୋଇ ଛାତ୍ରୀ ଜଣକ ନିଜ ମୁଣ୍ଡରୁ ହିଜାବ ହଟାଇ ସ୍କୁଲ ଭିତରେ ପ୍ରବେଶ କରୁଛନ୍ତି। ଏହି ଭିଡିଓ ଏବେ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି।

ଉଲ୍ଲେଖ ଯୋଗ୍ୟ ଯେ, ହିଜାବ ବିବାଦ ପରେ ବନ୍ଦ ହୋଇଥିବା ଦଶମ ଶ୍ରେଣୀ ପର୍ଯ୍ୟନ୍ତ ବିଦ୍ୟାଳୟଗୁଡ଼ିକ ଆଜି ପୁଣି ଖୋଲିଛି। ତେବେ ଏକାଦଶ ଏବଂ ଦ୍ୱାଦଶର ସ୍କୁଲଗୁଡ଼ିକ ବୁଧବାର ପର୍ଯ୍ୟନ୍ତ ବନ୍ଦ ରହିଛି। ହିଜାବ ମାମଲା ସମ୍ପର୍କରେ ହାଇକୋର୍ଟରେ ଶୁଣାଣି ମଧ୍ୟ ଚାଲିଛି।

Powered by Froala Editor