ଉତ୍ତରପ୍ରଦେଶରେ ପଞ୍ଚାୟତ ନିର୍ବାଚନବେଳେ  କରୋନାରେ ୫୭୭ ଶିକ୍ଷକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି । ଏହି ଅଭିଯୋଗ ଆଣିଛି ରାଜ୍ୟ ଶିକ୍ଷକ ସଂଘ । ମୃତ ଶିକ୍ଷକମା‌ନେ ନିର୍ବାଚନ କାର୍ଯ୍ୟରେ ନିୟୋଜିତ ହୋଇଥିଲେ। ରାଜ୍ୟ ଶିକ୍ଷକ ସଂଗଠନ ପକ୍ଷରୁ ନିର୍ବାଚନ କାର୍ଯ୍ୟ ପରେ କରୋନରେ ପ୍ରାଣ ହରାଇଥିବା ୫୭୭ ଶିକ୍ଷକଙ୍କ ତାଲିକା ନିର୍ବାଚନ ଆୟୋଗଙ୍କୁ ପ୍ରଦାନ କରାଯାଇଛି। ଏହା ସହିତ ମେ ୨ରେ ହେବାକୁ ଥିବା ଭୋଟ ଗଣତି ପ୍ରକ୍ରିୟାକୁ ଘୁଞ୍ଚାଇବାକୁ ସଂଗଠନ ପକ୍ଷରୁ ଦାବି କରାଯାଇଛି।

ଉତ୍ତରପ୍ରଦେଶ ଶିକ୍ଷକ ମହାସଂଘ ଅଧ୍ୟକ୍ଷ ଦିନେଶ ଚନ୍ଦ୍ର ଶର୍ମା କହିଛନ୍ତି ଯେ, ପଞ୍ଚାୟତ ନିର୍ବାଚନ ନାମରେ ରାଜ୍ୟ ନିର୍ବାଚନ ଆୟୋଗ ୭୧ ଜିଲାରେ ୫୭୭ ଶିକ୍ଷକଙ୍କୁ ସଂକ୍ରମିତ କରିଛନ୍ତି। ଯଦି ଭୋଟଗଣତିକୁ ଘୁଞ୍ଚାଯିବ ନାହିଁ, ତେବେ ଆମେ ଏହାକୁ ବର୍ଜନ କରିବାକୁ ବାଧ୍ୟ ହେବୁ। ନିର୍ବାଚନ କାର୍ଯ୍ୟ ଯୋଗୁ ଲକ୍ଷାଧିକ ଲୋକଙ୍କୁ ସଂକ୍ରମିତ ହେବାକୁ ପଡ଼ିଲା। କିନ୍ତୁ ନିର୍ବାଚନ ଆୟୋଗ ଏହାକୁ ଗମ୍ଭୀରତାର ସହ ନେଉନାହାନ୍ତି। ଯଦି ଆୟୋଗ କାର୍ଯ୍ୟାନୁଷ୍ଠାନ ଗ୍ରହଣ ନ କରନ୍ତି, ତେବେ ଆମେ କଡ଼ା କାର୍ଯ୍ୟାନୁଷ୍ଠାନ ନେବୁ ବୋଲି ସେ ଚେତାବନୀ ଦେଇଛନ୍ତି। 

ପୂର୍ବରୁ ଏକ ଖବରକାଗଜରେ ପଞ୍ଚାୟତ ନିର୍ବାଚନ ସମୟରେ ୧୩୫ ପୋଲିଂ ଅଧିକାରୀଙ୍କ ମୃତ୍ୟୁ ଘଟିଥିବା ନେଇ ଖବର ପ୍ରକାଶ ପାଇଥିଲା, ଯାହା ବିଷୟରେ ହାଇକୋର୍ଟ ତଥ୍ୟ ମାଗିଥିଲେ।

Powered by Froala Editor