ଅମୃତସର: ସରଗରମ ରହିଛି ପଞ୍ଜାବ ରାଜନୀତି । ବିଧାନସଭା ନିର୍ବାଚନ ଯେତିକି ପାଖଉଛି ସେତିକି ଉଷ୍ଣ ହେଉଛି ମାହୋଲ୍ । ଏଭଳି ପରିସ୍ଥିତିରେ ଏବେ ସିଦ୍ଧୁଙ୍କ ବିରୋଧରେ ତାଙ୍କ ବଡ଼ ଉଭଣୀ ସୁମନ ତୁର ଆଣିଛନ୍ତି ସାଂଘାତିକ ଅଭିଯୋଗ । ଏକ ସାମ୍ବାଦିକ ସମ୍ମିଳନୀ କରି ବିଷ ଓଗାଳିଛନ୍ତି ।

ସୁମନ କହିଛନ୍ତି, ସିଦ୍ଧୁ ବାହାରକୁ ଯାହା ଦେଖାଯାନ୍ତି ବାସ୍ତବରେ ସେ ସେଭଳି ବ୍ୟକ୍ତି ନୁହନ୍ତି । ସେ ଜଣେ ନିଷ୍ଠୁର ବ୍ୟକ୍ତି । ଟଙ୍କା ପାଇଁ ସେ କିଛି ବି କରିପାରନ୍ତି । ଏପରିକି ନିଜ ମା’ ଓ ଉଭଣୀଙ୍କୁ ବି ସେ ଟଙ୍କା କେଇଟା ପାଇଁ ଘରୁ ବାହାର କରି ଦେଇଥିଲେ ।

ଆମେରିକାରେ ରହୁଥିବା ସୁମନ ନିକଟରେ ଚଣ୍ଡିଗଡ଼ ଆସିଛନ୍ତି । ଏହି ସମୟରେ ସେ ସାମ୍ବାଦିକ ସମ୍ମିଳନୀ ଡାକି ସିଦ୍ଧୁଙ୍କ ଉପରେ ବର୍ଷିଛନ୍ତି । ସୁମନ କହିଛନ୍ତି, ମୋତେ ଏବେ ୭୦ ବର୍ଷ । ଏ ବୟସରେ ମୁଁ ସମସ୍ତଙ୍କ ସମ୍ମୁଖରେ ପରିବାର କଥା କହିବାକୁ ଖରାପ ଲାଗୁଛି । ହେଲେ ପରିସ୍ଥିତି ଏପରି ହୋଇଛି ଏହାଛଡ଼ା ମୋ ନିକଟରେ ଅନ୍ୟ କୌଣସି ଉପାୟ ନାହିଁ ।

ସେ କହିଛନ୍ତି, ୧୯୮୬ରେ ସିଦ୍ଧୁ ତାଙ୍କୁ ଓ ତାଙ୍କ ମା’ଙ୍କୁ ଘରୁ ତଡ଼ି ଦେଇଥିଲେ । ବାପାଙ୍କ ଦେହାନ୍ତ ପରେ ଏପରି ଘଟିଥିଲା । ଆମେ ବହୁତ କଠିନ ସମୟ ଦେଇ ଗତି କରିଛୁ । ମୋ ମା’ ଦୀର୍ଘ ୪ ମାସ କାଳ ହସ୍ପିଟାଲରେ ରହିଥିଲେ । ମୁଁ କରୁଥିବା ଦାବିର ପ୍ରମାଣ ମଧ୍ୟ ରହିଛି । ସମ୍ପତ୍ତି ପାଇଁ ସିଦ୍ଧୁ ଆମ ସହ ସମ୍ପର୍କ ତୁଟାଇ ଦେଇଥିଲେ । ମୋ ବାପା ଆମ ପାଇଁ ଗୋଟିଏ ଘର ଓ ଜମି ସମେତ ପେନସନ ଛାଡ଼ି ଯାଇଥିଲେ ।

୧୯୮୭ରେ ସିଦ୍ଧୁ ବାପା-ମା’ ଅଲଗା ହୋଇ ଯାଇଥିବା ନେଇ କହିଥିଲେ । ହେଲେ ଏହା ସଂପୂର୍ଣ୍ଣ ମିଛ ଥିଲା । ମୋ ବାପା ମା’ଙ୍କ ବିଷୟରେ ସିଦ୍ଧୁ ଯାହା ବି ଦାବି କରିଛନ୍ତି, ସେସବୁ ମିଛ ।

ସେ ଆହୁରି କହିଛନ୍ତି, ଗତ ଜାନୁଆରୀ ୨୦ରେ ମୁଁ ସିଦ୍ଧୁଙ୍କୁ ଦେଖା କରିବାକୁ ଚାହିଁଥିଲି । ହେଲେ ସେ ମୋତେ ଦେଖା କରିବାକୁ ମନା କରି ଦେଇଥିଲେ । ତାଙ୍କ ଘରେ କାମ କରୁଥିବା ଲୋକମାନେ ମୋ ପାଇଁ କବାଟ ଖୋଲୁ ନାହାନ୍ତି । ସେ ମୋ ଫୋନ ନମ୍ବରକୁ ସିଦ୍ଧୁ ବ୍ଲକ କରିଛନ୍ତି। ମୁଁ ମୋ ମା’ ପାଇଁ ନ୍ୟାୟ ଚାହେଁ । ତାଙ୍କ ସହ ଯୋଗାଯୋଗ କରିବାକୁ ମୁଁ ଏପରି ସାମ୍ବାଦିକ ସମ୍ମିଳନୀ କରିଛି ବୋଲି ସୁମନ କହିଛନ୍ତି ।

Powered by Froala Editor