ମହିଳା ବିଶ୍ୱକପ୍ ପାଇଁ ଭାରତୀୟ ଦଳ ଘୋଷଣା
ନୂଆଦିଲ୍ଲୀ: ଆସନ୍ତା ମାର୍ଚ୍ଚରୁ ଆରମ୍ଭ ହେବାକୁ ଯାଉଥିବା ଆଇସିସି ମହିଳା ଦିନିକିଆ ବିଶ୍ୱକପ୍ ପାଇଁ ୧୫ଜଣିଆ ଭାରତୀୟ ଦଳ ଘୋଷଣା କରାଯାଇଛି । କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) ପକ୍ଷରୁ ଏନେଇ ସୂଚନା ଦିଆଯାଇଛି । ବିଶ୍ୱକପରେ ମିତାଲି ରାଜ ଭାରତୀୟ ଦଳର ଅଧିନାୟିକା ଦାୟିତ୍ୱରେ ଥିବା ବେଳେ ହରମନପ୍ରୀତ କୌର ଉପଅଧିନାୟିକା ଦାୟିତ୍ୱ ନିର୍ବାହ କରିବେ।
ଚୟନ ହୋଇଥିବା ଅନ୍ୟ ଖେଳାଳିମାନେ ହେଉଛନ୍ତି, ସ୍ମୃତି ମନ୍ଧନା, ଶେଫାଳୀ ବର୍ମା, ଯଷ୍ଟିକା ଭାଟିଆ, ଦୀପ୍ତି ଶର୍ମା, ରିଚା ଘୋଷ (ୱିକେଟ୍ ରକ୍ଷକ), ସ୍ନେହ ରାଣା, ଝୁଲଣ ଗୋସ୍ୱାମୀ, ପୂଜା ବସ୍ତ୍ରକାର, ମେଘନା ସିଂହ, ରେଣୁକା ସିଂହ ଠାକୁର, ତାନିୟା ଭାଟିଆ (ୱିକେଟ୍ ରକ୍ଷକ), ରାଜେଶ୍ୱରୀ ଗାୟକ୍ୱାର୍ଡ ଓ ପୂନମ ଯାଦବ। ତାଲିକାରେ ଅତିରିକ୍ତ ଖେଳାଳି ଭାବେ ଅଛନ୍ତି ଏସ୍. ମେଘନା, ଏକତା ବିସ୍ତ୍ ଓ ସିମ୍ରନ୍ ଦିଲ୍ ବାହାଦୁର । ଏଥର ଭାରତୀୟ ଦଳରେ ସାମିଲ ନ ହୋଇଥିବା ବିଶିଷ୍ଟ ଖେଳାଳିମାନେ ହେଲେ ଫାଷ୍ଟ୍ ବୋଲର୍ ଶିଖା ପାଣ୍ଡେ ଏବଂ ବ୍ୟାଟ୍ର୍ ଜେମିମା ରୋଡ୍ରିଗୁଏସ୍।
ବିଶ୍ୱକପ ପୂର୍ବରୁ ଟିମ ଇଣ୍ଡିଆ ଫେବୃଆରୀ ୧୧ରୁ ନ୍ୟୁଜିଲାଣ୍ଡ ବିପକ୍ଷରେ ପାଞ୍ଚ ମ୍ୟାଚ ବିଶିଷ୍ଟ ଦିନିକିଆ ସିରିଜ ଖେଳିବ। ସେହିପରି ଦୁଇ ଦଳ ମଧ୍ୟରେ ଏକମାତ୍ର ଟି-୨୦ ମ୍ୟାଚ୍ ଅନୁଷ୍ଠିତ ହେବ। ଏହି ମ୍ୟାଚ୍ରେ ଦଳ ନେତୃତ୍ୱ ହରମନପ୍ରୀତ କୌର ନେବେ।
ମାର୍ଚ୍ଚ ୬ରେ ପାକିସ୍ତାନ ବିପକ୍ଷ ବିଶ୍ୱକପରେ ଭାରତୀୟ ଦଳ ଏହାର ପ୍ରଥମ ମ୍ୟାଚ ଖେଳିବ। ଏହି ମ୍ୟାଚ ତଉରଙ୍ଗାସ୍ଥିତ ବେ ଓଭାଲରେ ଖେଳାଯିବ। ନକ ଆଉଟ ପର୍ଯ୍ୟାୟକୁ ଯିବା ପୂର୍ବରୁ ଭାରତ ରାଉଣ୍ଡ ରବିନରେ ମୋଟ ୭ଟି ମ୍ୟାଚ ଖେଳିବ। ମାର୍ଚ୍ଚ ୧୦ରେ ଦଳ ନ୍ୟୁଜିଲ୍ୟାଣ୍ଡ, ୧୨ରେ ୱେଷ୍ଟଇଣ୍ଡିଜ, ମାର୍ଚ୍ଚ ୧୬ରେ ଇଂଲଣ୍ଡ, ୧୯ରେ ଅଷ୍ଟ୍ରେଲିଆ, ୨୨ରେ ବାଂଲାଦେଶ ଓ ମାର୍ଚ୍ଚ ୨୭ରେ ଦକ୍ଷିଣ ଆଫ୍ରିକାକୁ ଭେଟିବ।
Powered by Froala Editor
