ଦକ୍ଷିଣ ଆଫ୍ରିକାର ଯେଉଁ ବୈଜ୍ଞାନିକ କରୋନା ନୂଆ ଭାରିଏଣ୍ଟ ଓମିକ୍ରନକୁ ଚିହ୍ନଟ କରିଥିଲେ, ତାଙ୍କୁ ମାରିଦେବାକୁ ଧମକ ମିଳୁଛି । କେଉଁମାନେ ଏହି ଧମକପୂର୍ଣ୍ଣ ଚିଠି ପଠାଇଛନ୍ତି ସେ ନେଇ ପୁଲିସ ସର୍ଚ୍ଚ ଅପରେସନ୍‌ ଆରମ୍ଭ କରିଛି। ସେପଟେ ଏହି ଚିଠିରେ ଧମକ ଦେଇଥିବା ଦୁର୍ବୃତ୍ତ ଜଣକ ଲେଖିଛି ଯେ ‘ବୈଜ୍ଞାନିକମାନେ ଏହି ଭାରିଏଣ୍ଟକୁ ନେଇ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଛନ୍ତି। ଏଭଳି ଆତଙ୍କ ସୃଷ୍ଟି କରିବା ଠିକ୍‌ ନୁହେଁ। ତେଣୁ ତାଙ୍କୁ ହତ୍ୟା କରାଯିବ।’ ଏହାର ଏକ ଚିଠି ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ ରାମାଫୋସାଙ୍କୁ ମଧ୍ୟ ମିଳିଛି । ତେବେ ଏନେଇ ମାମଲା ରୁଜୁ ହେବା ପରେ ଚିଠିକୁ ନେଇ ଖୋଳତାଡ ଆରମ୍ଭ କରିଛି ପୁଲିସ । ରାଷ୍ଟ୍ରପତିଙ୍କ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।

ଦକ୍ଷିଣ ଆଫ୍ରିକା ପୁଲିସ ସେବାର ଜାତୀୟ ମୁଖପାତ୍ର ବିଷ୍ଣୁ ନାଇଡୁ ରବିବାର କହିଛନ୍ତି ଯେ, ରାଷ୍ଟ୍ରପତି ସିରିଲ ରାମାଫୋସାଙ୍କ କାର୍ଯ୍ୟାଳୟକୁ ପ୍ରଫେସର ଟୁଲିଓ ଡି ଅଲିଭେଇରାଙ୍କ ସମେତ ଅନେକ ଅଗ୍ରଣୀ କୋଭିଡ ଅନୁସନ୍ଧାନକାରୀଙ୍କୁ ହତ୍ୟା ପାଇଁ ଏକ ଧମକପୂର୍ଣ୍ଣ ଚିଠି ଆସିଛି। ଏହି ଘଟଣାର ତଦନ୍ତ କରାଯାଉଛି। ଓମିକ୍ରନ୍ ଭାରିଏଣ୍ଟକୁ ଚିହ୍ନଟ କରିଥିବା ଟିମର ନେତୃତ୍ବ ନେଇଥିଲେ ପ୍ରଫେସର ଅଲିଭେଇରା। ଏକ ସପ୍ତାହ ପୂର୍ବରୁ ଏହି ଘଟଣା ଆମ ନଜରକୁ ଆସିଥିଲା। ଅଭିଯୋଗକାରୀମାନେ ନ୍ୟାସନାଲ କରୋନା କମାଣ୍ଡ କାଉନସିଲର ପରାମର୍ଶଦାତା ହୋଇଥିବାରୁ ଏହି ମାମଲାକୁ ପ୍ରାଥମିକତା ଦିଆଯାଇଛି।

ସୂଚନା ମୁତାବକ, ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ ମଧ୍ୟ କରୋନାରେ ସଂକ୍ରମିତ ହୋଇଛନ୍ତି। ଏନେଇ ସେ ନିଜେ ଟ୍ୱିଟ୍‌ କରି ସୂଚନା ଦେଇଛନ୍ତି।

Powered by Froala Editor