‘ତୃଣମୂଳ କଂଗ୍ରେସ’ ବିଧାନସଭା ନିର୍ବାଚନର ଅବ୍ୟବହିତ ପୂର୍ବରୁ ଗୋଆର ମହିଳାମାନଙ୍କ ପାଇଁ ‘ଗୃହଲକ୍ଷ୍ମୀ ଯୋଜନା’ ଘୋଷଣା କରିଛି। ଭୋଟ ପାଇ  କ୍ଷମତାକୁ ଆସିଲେ ଏହି ଯୋଜନା ଲାଗୁ କରିବ ବୋଲି ଦଳପକ୍ଷରୁ ପ୍ରତିଶ୍ରୁତି ଦିଆଯାଇଛି। ଏହି ଯୋଜନା ଲାଗୁ ହେଲେ ରାଜ୍ୟର ୩.୫ ଲକ୍ଷ ମହିଳାଙ୍କ ଜମାଖାତାକୁ ପ୍ରତି ମାସରେ ୫୦୦୦ ଟଙ୍କା ‘ଡାଇଟେକ୍ଟ୍‌ ଟ୍ରାନ୍‌ସ୍‌ଫର୍‌’ କରାଯିବ। ଏହି ଯୋଜନା ଦ୍ୱାରା ସରକାରଙ୍କ ତହବିଲରୁ ୧୫୦୦ରୁ ୨୦୦୦ କୋଟି ଟଙ୍କା ଖର୍ଚ୍ଚ ହେବ। ଏହା ରାଜ୍ୟ ବଜେଟର ୬ରୁ ୮% ବୋଲି ଟିଏମସି କହିଛି।

ଟିଏମସି କହିଛି, ଗୋଆରେ ଥିବା ପ୍ରତି ପରିବାରର ମୁଖ୍ୟ ମହିଳାଙ୍କୁ ମାସିକ ୫ ହଜାର ଟଙ୍କା ଦିଆଯିବ। ଏହା ସେମାନଙ୍କୁ ଆକାଉଣ୍ଟରେ ସିଧାସଳଖ ଜମା ହେବ। ଏହାର ଅର୍ଥ ଜଣେ ମହିଳା ବାର୍ଷିକ ୬୦ ହଜାର ଟଙ୍କା ପାଇବେ। ଗୋଆର ୩.୫ ଲକ୍ଷ ପରିବାରରେ ରହୁଥିବା ମହିଳାଙ୍କ ମାସିକ ଆୟକୁ ନିଶ୍ଚିତ କରିବା ପାଇଁ ଏପରି କରାଯାଇଛି।
ଏହାପୂର୍ବରୁ ମମତା ନିଜେ ଗୋଆ ଗସ୍ତ କରି ବିଭିନ୍ନ ବର୍ଗର ଲୋକଙ୍କ ସହ ଆଲୋଚନା କରିଥିଲେ। ବିଶେଷ କରି ଧୀବରମାନଙ୍କ ସହ ଆଲୋଚନା କରି ସେମାନଙ୍କ ପାଇଁ ଅନେକ ଯୋଜନା ଘୋଷଣା କରିଥିଲେ।

ମମତା ପଶ୍ଚିମବଙ୍ଗ ବିଧାନସଭା ନିର୍ବାଚନ ବେଳେ ମଧ୍ୟ ଲକ୍ଷ୍ମୀ ଭଣ୍ଡାର ବା ଲଖିର ଭଣ୍ଡାର ନାଁରେ ଗୋଟିଏ ଯୋଜନା ଲଞ୍ଚ କରିଥିଲେ। ନିର୍ବାଚନ ଜିତିବା ପରେ ଏହାକୁ ପଶ୍ଚିମବଙ୍ଗରେ କାର୍ଯ୍ୟ କରାଯାଉଛି। ଏହି ଯୋଜନାରେ ଅନୁସୂଚିତ ଜାତି/ଜନଜାତିର ମହିଳାମାନଙ୍କୁ ମାସକୁ ୧ ହଜାର ଟଙ୍କା ଦିଆଯାଉଛି। ସେହିପରି ମମତା ସରକାର ସାଧାରଣ ବର୍ଗର ମହିଳାମାନଙ୍କୁ ମାସିକ ୫୦୦ ଟଙ୍କା ଦେଉଛନ୍ତି। ପ୍ରତି ମାସର ୩ ତାରିଖରେ ଏହି ଅର୍ଥ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଜମା ହେଉଛି।

Powered by Froala Editor