କରୋନା କାଳରେ ଯେଉଁଠି ଆମ୍ବୁଲାନ୍ସ କରୋନା ସଂକ୍ରମିତଙ୍କୁ ଏବଂ ତାଙ୍କ ପରିଜନକୁ ନେବାକୁ ମନା କରୁଛନ୍ତି, ସେଠି ଝାଡଖଣ୍ଡ ରାଞ୍ଚିର ଜଣେ ଅଟୋ ଡ୍ରାଇଭର ଆଶାର କିରଣ ସାଜିଛନ୍ତି। ଅଟୋ ଚାଳକଙ୍କ ନାମ ରବି ଅଗ୍ରଓ୍ଵାଲ। ସେ ଅସୁସ୍ଥ ଲୋକଙ୍କୁ ମାଗଣାରେ ଅଟୋ ସେବା ଯୋଗାଇ ଦେଉଛନ୍ତି। 

ରବି କହିଛନ୍ତି ଯେ, ସେ ଏପ୍ରିଲ ୧୫ରୁ ଏହି ସେବା ଯୋଗାଇ ଆସୁଛନ୍ତି। ଦିନେ ଜଣେ ମହିଳାଙ୍କୁ ରାଜେନ୍ଦ୍ର ଇନଷ୍ଟିଚ୍ୟୁଟ୍ ଅଫ ମେଡିକାଲ ସାଇସେନ୍ସ(RIMS) ଯିବାର ଥିଲା। କିନ୍ତୁ କୌଣସି ଅଟୋ ଚାଳକ ଭୟରେ ହସ୍ପିଟାଲ୍ ଯିବାକୁ ପ୍ରସ୍ତୁତ ନଥିଲେ। ମହିଳା ରିମ୍ସ ପର୍ଯ୍ୟନ୍ତ ଯିବା ପାଇଁ ଅଟୋ ଡ୍ରାଇଭରଙ୍କୁ ନିର୍ଦ୍ଧାରିତ ଦରଠୁ ଅଧିକ ଟଙ୍କା ଦେବାକୁ ମଧ୍ୟ କହିଥିଲେ। ଏହା ପରେ ମଧ୍ୟ କେହି ବି ମହିଳାଙ୍କୁ ଧରି  ହସ୍ପିଟାଲ ଯିବାକୁ ପ୍ରସ୍ତୁତ ହୋଇନଥିଲେ।

ଏହା ପରେ ମୁଁ ତାଙ୍କୁ ରିମ୍ସରେ ପହଞ୍ଚାଇ ଦେବାକୁ କହିଥିଲି। ମୁଁ ଜାଣିନଥିଲି ଯେ, ସେ କରୋନା ସଂକ୍ରମିତ ଥିଲେ କି ନାହିଁ। ମାତ୍ର ମୁଁ ସେ ଦେଉଥିବା ଟଙ୍କାକୁ ସ୍ଵୀକାର କରିନଥିଲି। ଯେବେ ମୁଁ ରିମ୍ସରୁ ଫେରିଲି, ମୋତେ ହୃଦବୋଧ ହୋଇଥିଲା ଯେ, ତାଙ୍କ ପରି ଅନେକ ଲୋକ ଅଛନ୍ତି ଯେଉଁମାନେ କରୋନା କାରଣରୁ ପରିବହନ ସେବାରୁ ବଞ୍ଚିତ ହେଉଛନ୍ତି। ଏହା ପରଠୁ ମୁଁ ଜରୁରୀ ଲୋକଙ୍କୁ ମାଗଣାରେ ହସ୍ପିଟାଲରୁ ନେବା ଆଣିବା କରୁଛି ବୋଲି ରବି କହିଛନ୍ତି। ଗୋଟିଏ ପଟେ ବଢୁଥିବା କରୋନା ବିପଦ ସମୟରେ ନିଜର ପରିଜନ ମଧ୍ୟ ସାହାଯ୍ୟ କରିବାକୁ ମୁହଁ ମୋଡୁଥିବା ବେଳେ ରବିଙ୍କ ଭଳି ଲୋକ ଭଗବାନଙ୍କ ରୂପ ନେଇ ଆସୁଛନ୍ତି । ତାଙ୍କର ଏହି କାମ ପାଇଁ ଲୋକମାନେ ଭୂରି ଭୂରି ପ୍ରଶଂସା କରୁଛନ୍ତି । 

Powered by Froala Editor