ପୁନିତଙ୍କ ଶେଷ ଦର୍ଶନ ପାଇଁ ଫ୍ୟାନ୍ଙ୍କ ଅସମ୍ଭାଳ ଭିଡ଼, ୧୪୪ ଧାରା ଲଗାଇଲା ପ୍ରଶାସନ
ହଜାର ହଜାର ଫ୍ୟାନଙ୍କ ହୃଦୟରେ ରାଜ କରୁଥିବା କନ୍ନଡ ପାୱାର ଷ୍ଟାର ପୁନିତ ରାଜକୁମାରଙ୍କ ଶୁକ୍ରବାର ହୃଦ୍ଘାତରେ ମୃତ୍ୟୁ ଘଟିଛି । ହୃଦଘାତରେ ଶିକାର ହୋଇ ସେ ବେଙ୍ଗାଲୁରୁର ବିକ୍ରମ ହସ୍ପିଟାଲରେ ଭର୍ତ୍ତି ହୋଇଥିଲେ। ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା। ଏକ ଡାକ୍ତରୀ ଟିମ୍ ତାଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖିଥିଲେ। ତେବେ ୪୬ ବର୍ଷୀୟ ପୁନିତ ସେଠାରେ ଶେଷ ନିଃଶ୍ୱାସ ତ୍ୟାଗ କରିଥିଲେ ।
ସାଉଥ୍ ଫିଲ୍ମ ଇଣ୍ଡଷ୍ଟ୍ରୀ ସ୍ତବ୍ଧ :
ତାଙ୍କୁ ହରାଇ ପୂରା ସାଉଥ୍ ଫିଲ୍ମ ଇଣ୍ଡଷ୍ଟ୍ରୀ ସ୍ତବ୍ଧ ହୋଇଯାଇଛି । ଶନିବାର ତାଙ୍କ ଶେଷ ଦର୍ଶନ ପାଇଁ ହଜାର ହଜାର ଲୋକଙ୍କ ଭିଡ ଲାଗି ରହିଛି । ପ୍ରଶାସନ ମଧ୍ୟ ଭିଡ ହଟାଇବାରେ ନାକେଦମ ହୋଇପଡିଛି । କିନ୍ତୁ ଫ୍ୟାନଙ୍କୁ ବୁଝାଇବା କଷ୍ଟକର ହୋଇଛି ବୋଲି ପୁଲିସ ପ୍ରଶାସନ କହିଛି । ଭିଡ଼କୁ ନିୟନ୍ତ୍ରଣ କରିବା ପାଇଁ ଅନେକ କ୍ଷେତ୍ରରେ ୧୪୪ ଧାରା ଲାଗୁ କରାଯାଇଛି । କର୍ଣ୍ଣାଟକ ମୁଖ୍ୟମନ୍ତ୍ରୀ ବାସଭରାଜ ବମ୍ମାଇ ମଧ୍ୟ ଡାକ୍ତରଖାନାରେ ପହଞ୍ଚି ଅଭିନେତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁନିତ ରାଜକୁମାରଙ୍କ ମୃତ୍ୟୁ ସମ୍ପର୍କରେ ଟୁଇଟ୍ କରି ନିଜର ଦୁଃଖ ପ୍ରକାଶ କରିଛନ୍ତି। ରାମ ଗୋପାଳ ଭର୍ମା, ବୋନି କପୁର, ସୋନୁ ସୁଦ, ଅନିଲ କପୁର, ଅଜୟ ଦେବଗନ, ବିବେକ ଓବରୋଇ, ତାପସୀ ପନ୍ନୁ, ରିଚା ଚଢା, ଅଭିଷେକ ବଚ୍ଚନ, ରୀତିଶ ଦେଶମୁଖ, ସଞ୍ଜୟ ଦତ୍ତ ଭଳି ବଡ ବଡ କଳାକାର ମଧ୍ୟ ସମବେଦନା ଜଣାଇ ସମବେଦନା ଜଣାଇଛନ୍ତି। ପୁନିତ ରାଜକୁମାରଙ୍କ ଶବକୁ ବେଙ୍ଗାଲୁରୁର କାଣ୍ଟେରାଭା ଷ୍ଟାଡିୟମରେ ରଖାଯାଇଛି। ରବିବାର ତାଙ୍କର ଶେଷ ରୀତିନୀତି ଅନୁଷ୍ଠିତ ହେବ।
୩୧ ଯାଏ ମଦ ଦୋକାନ, ବାର ଓ ରେଷ୍ଟୁରାଣ୍ଟ ବନ୍ଦ :
ଅନ୍ୟପକ୍ଷରେ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ବେଙ୍ଗାଲୁରୁରେ ୩୧ ତାରିଖ ଯାଏ ମଦ ଦୋକାନ, ବାର ଓ ରେଷ୍ଟୁରାଣ୍ଟକୁ ବନ୍ଦ ରଖାଯାଇଛି। ବିଭିନ୍ନ ସ୍ଥାନରେ ପ୍ୟାଟ୍ରୋଲିଂକୁ ଜୋରଦାର କରାଯିବା ସହ ଲୋକଙ୍କୁ ଧୈର୍ଯ୍ୟ ରଖିବାକୁ ପରାମର୍ଶ ଦିଆଯାଉଛି।
ମାତ୍ର ୧୦ ବର୍ଷରେ ପାଇଥିଲେ ଜାତୀୟ ପୁରସ୍କାର :
ପୁନିତ ଦିବଂଗତ ଅଭିନେତା ରାଜକୁମାରଙ୍କ ପୁଅ ଥିଲେ ଓ ପ୍ରଶଂସକଙ୍କ ମଧ୍ୟରେ ‘ଅପ୍ପୁ’ ନାମରେ ଲୋକପ୍ରିୟ ଥିଲେ । ୬ ମାସର ହୋଇଥିବାବେଳେ କନ୍ନଡ ଫିଲ୍ମରେ ଅଭିନୟ କରିଥିଲେ। ମାତ୍ର ୧୦ ବର୍ଷ ବୟସରେ ସେ ଜାତୀୟ ଫିଲ୍ମ ପୁରସ୍କାର ପାଇଥିଲେ। ଅନେକ ସୁପର ହିଟ୍ ଫିଲ୍ମରେ ପୁନିତ ନିଜର ନିଖୁଣ ଅଭନୟ କରିଛନ୍ତି।
Powered by Froala Editor
