ଭୁବନେଶ୍ୱର :  ରାଜ୍ୟ ପାଇଁ ପୁଣି ଏକ ଗୌରବ ଆଣିଦେଇଛନ୍ତି ରାଜ୍ୟସଭା ସାଂସଦ ତଥା ପୂର୍ବତନ ଆଇଏଏସ ଅଶ୍ୱିନୀ ବୈଷ୍ଣବ  । ରାଜ୍ୟସଭା ଅଧ୍ୟକ୍ଷ ତଥା ଉପରାଷ୍ଟ୍ରପତି ଭେଙ୍କେୟା ନାଇଡ଼ୁ ତାଙ୍କୁ ପ୍ରେସ କାଉନସିଲ ଅଫ ଇଣ୍ଡିଆ (ପିସିଆଇ)ର ସଭ୍ୟ ଭାବେ ମନୋନୀତ କରିଛନ୍ତି  । ଶ୍ରୀ ବୈଷ୍ଣବଙ୍କ ସହ ତେଲେଙ୍ଗାନାର ସାଂସଦ ଡକ୍ଟର କେ. କେଶବ ରାଓ ମଧ୍ୟ ମନୋନୀତ ହୋଇଛନ୍ତି  । ଏସଂକ୍ରାନ୍ତରେ ରାଜ୍ୟସଭା ସଚିବାଳୟ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି  ।

ନାରାୟଣ ବ୍ୟାସ ବିଶ୍ୱବିଦ୍ୟାଳୟରୁ ଇଲେକ୍ଟ୍ରୋନିକ ଏବଂ କମୁ୍ୟନିକେସନରେ ସ୍ୱର୍ଣ୍ଣ ପଦକ ହାସଲ କରିଥିବା ଶ୍ରୀ ବୈଷ୍ଣବ ୧୯୯୪ରେ ଆଇଏଏସ ପାଇଥିଲେ  । ବାଲେଶ୍ୱର ଓ କଟକ ଜିଲ୍ଲାପାଳ ଭାବେ ସେ ବେଶ ସୁଖ୍ୟାତି ଅର୍ଜନ କରିଥିଲେ  । ୧୯୯୯ ମହାବାତ୍ୟା ବେଳେ ସେ ମହାବାତ୍ୟାର ଗତିପଥ ସଂକ୍ରାନ୍ତୀୟ ତାଜା ସୂଚନା ପ୍ରଦାନ କରି ଅନେକ ଜୀବନ ବଂଚାଇବାରେ ସକ୍ଷମ ହୋଇପାରିଥିଲେ  । ଅଟଳ ବିହାର ବାଜପେୟୀ ପ୍ରଧାନମନ୍ତ୍ରୀ ଥିବାବେଳେ ଶ୍ରୀ ବୈଷ୍ଣବ ପିଏମଓର ଉପସଚିବ ଭାବେ କାର୍ଯ୍ୟ କରିଥିଲେ  । ତାଙ୍କର କାର୍ଯ୍ୟ ଦକ୍ଷତା ପାଇଁ ସେ ବାଜପେୟୀଙ୍କ ବ୍ୟକ୍ତିଗତ ସଚିବ ଭାବେ ନିଯୁକ୍ତି ପାଇଥିଲେ  । ପରେ ସେ ବିଜେପିରେ ଯୋଗଦେବା ସହ ଓଡ଼ିଶାରୁ ରାଜ୍ୟସଭା ସାଂସଦ ଭାବେ ନିର୍ବାଚିତ ହୋଇଛନ୍ତି  ।

Powered by Froala Editor