ଭୁବନେଶ୍ବର: ବହୁ ଦିନର ପ୍ରତୀକ୍ଷାରେ ପଡ଼ିବ ପୂର୍ଣ୍ଣଚ୍ଛେଦ । ଆଜି ପ୍ରକାଶ ପାଇବ ପଞ୍ଚାୟତ ଭୋଟ ପାଇଁ ଚିଠା ସଂରକ୍ଷଣ ତାଲିକା । ୱାର୍ଡମେମ୍ବର, ସରପଞ୍ଚ, ସମିତିସଭ୍ୟ ସହ ବ୍ଲକ ଅଧ୍ୟକ୍ଷ ପଦବୀ ପାଇଁ ଚିଠା ସଂରକ୍ଷଣ ତାଲିକା ଜାରି ହେବ । ଜିଲ୍ଲା ପରିଷଦ ସଭ୍ୟ ପଦ ପାଇଁ ମଧ୍ୟ ସଂରକ୍ଷଣ ତାଲିକାର ବିଜ୍ଞପ୍ତି ପ୍ରକାଶ ପାଇବ ।

ଆସନ୍ତା ୨୦୨୨ ମାର୍ଚ୍ଚ ୫ରେ ଚଳିତ ପଞ୍ଚାୟତିରାଜ ପ୍ରତିନିଧିମାନଙ୍କର କାର୍ୟ୍ୟକାଳ ଶେଷ ହେବ । ତେଣୁ ନିୟମ ଅନୁସାରେ ତା’ ପୂର୍ବରୁ ନିର୍ବାଚନ ପ୍ରକ୍ରିୟା ସାରିବାକୁ ସରକାର ନୀତିଗତ ନିଷ୍ପତ୍ତି ନେଇଛନ୍ତି । ଏଥିପାଇଁ ସରକାରୀ ପ୍ରସ୍ତୁତି ଜୋର ଧରିଛି । ଚଳିତ ଅକ୍ଟୋବର ୩୦ ସୁଦ୍ଧା ସଂରକ୍ଷଣ ପ୍ରକିୟା ଚୂଡ଼ାନ୍ତ କରି ରାଜ୍ୟ ନିର୍ବାଚନ କମିଶନଙ୍କୁ ତାଲିକା ହସ୍ତାନ୍ତର କରାଯିବ । ଏହାକୁ ଦୃଷ୍ଟିରେ ରଖିଲେ ଫେବ୍ରୁଆରୀ ଦ୍ଵିତୀୟ ସପ୍ତାହରେ ଅନୁଷ୍ଠିତ ହେବ ପଞ୍ଚାୟତ ଭୋଟ । ଭୋଟ୍‌କୁ ନେଇ ଆରମ୍ଭ ହୋଇସାରିଛି କସରତ । ସଂରକ୍ଷଣ ତାଲିକା ସହ ବନ୍ଧା ପଡିଛି ଆଶାୟୀଙ୍କ ଭାଗ୍ୟ । ସଂରକ୍ଷଣକୁ ନେଇ ଆଶାୟୀମାନେ ଏବେ ଚିନ୍ତାଗ୍ରସ୍ତ । ତେଣୁ ଆଜିର ସରକାରୀ ଚିଠା ସଂରକ୍ଷଣ ବିଜ୍ଞପ୍ତି ଉପରେ ଏବେ ସମସ୍ତଙ୍କ ନଜର ।

ରାଜ୍ୟରେ ୬୭୯୮ ପଞ୍ଚାୟତର ସରପଞ୍ଚ ଓ ସମିତିସଭ୍ୟଙ୍କ ସହ ୮୫୩ ଜିଲ୍ଲା ପରିଷଦ ଜୋନ୍‌ ପାଇଁ ଭୋଟ ହେବ । ସେହିଭଳି ୯୨ ହଜାର ୱାର୍ଡମେମ୍ବର ସହ ୩୧୪ ବ୍ଲକ ଅଧ୍ୟକ୍ଷ ଏବଂ ୩୦ ଜିଲ୍ଲା ପରିଷଦ ଅଧ୍ୟକ୍ଷ ପଦବି ପାଇଁ ମଧ୍ୟ ନିର୍ବାଚନ ଅନୁଷ୍ଠିତ ହେବ । ଏସବୁ ପଦବିରେ ଲଢ଼ିବାକୁ ସଂରକ୍ଷଣ ତାଲିକାର ଭୂମିକା ସବୁଠୁ ଗୁରୁତ୍ୱପୂର୍ଣ୍ଣ । 

Powered by Froala Editor