ନୂଆଦିଲ୍ଲୀ: ଦେଶର ଦୁର୍ଗମରୁ ଅତି ଦୁର୍ଗମ ଅଞ୍ଚଳରେ ପହଞ୍ଚିବ କରୋନା ଟିକା । ଡ୍ରୋନ ମାଧ୍ୟମରେ ପହଞ୍ଚିବ ଭ୍ୟାକ୍ସିନ। ଏକ ଐତିହାସିକ ମୂହୂର୍ତ୍ତରେ ଦେଶରେ ଦୂର ଏବଂ ଦୁର୍ଗମ ପାହାଡିଆ ଅଞ୍ଚଳରେ ଭ୍ୟାକ୍ସିନ ପହଞ୍ଚାଇବା ପାଇଁ ଆଇ-ଡ୍ରୋନର ଶୁଭାରମ୍ଭ ହୋଇଛି।

 କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମାନସୁଖ ମଣ୍ଡାଭିୟ ଏକ ଡ୍ରୋନ୍ ଆଧାରିତ ଟିକା ବିତରଣ ମଡେଲର ଶୁଭାରମ୍ଭ କରିଛନ୍ତି । ଜୀବନ ରକ୍ଷାକାରୀ ଟିକା ସମସ୍ତଙ୍କ ପାଖରେ ଯେପରି ପହଞ୍ଚିବ ତାହା ଏହି ବିତରଣ ମଡେଲ ସୁନିଶ୍ଚିତ କରିବ। ମୁଖ୍ୟତଃ ପୂର୍ବୋତ୍ତର ରାଜ୍ୟ ଗୁଡିକର ପାହାଡିଆ ଅଞ୍ଚଳରେ ଟିକା ସ୍ଥାନାନ୍ତରରେ ଏହାକୁ ବ୍ୟବହାର କରାଯିବ।

 ପ୍ରଥମ ଦିନରେ ମଣିପୁରର ବିଷ୍ଣୁପୁର ଜିଲ୍ଲା ହସ୍ପିଟାଲରୁ ଲୋକତକ ହ୍ରଦର କରଙ୍ଗ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଯାଇଥିଲା। ପ୍ରଥମଥର ପାଇଁ ଦକ୍ଷିଣ ଏସିଆରେ କରୋନା ଟିକା ସ୍ଥାନାନ୍ତର ପାଇଁ ଡ୍ରୋନର ବ୍ୟବହାର କରାଯିବ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱକୁ ଧନ୍ୟବାଦ ଜଣାଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ କହିଛନ୍ତି, “ତାଙ୍କ ନେତୃତ୍ୱରେ ରାଷ୍ଟ୍ର ଦ୍ରୁତ ଗତିରେ ଅଗ୍ରଗତି କରୁଛି । ଆଜି ଏକ ଐତିହାସିକ ଦିନ, ଯାହା ଆମକୁ ଦର୍ଶାଇଛି ଯେ, ଟେକ୍ନୋଲୋଜି ଜୀବନକୁ କିପରି ସହଜ କରୁଛି ଏବଂ ସାମାଜିକ ପରିବର୍ତ୍ତନ ଆଣିଛି । ”

Powered by Froala Editor