କରୋନା ଭାଇରସର ଦ୍ୱିତୀୟ ଲହରୀ ବେକାବୁ ହେଲାଣି । ପ୍ରତିଦିନ ସଂକ୍ରମଣ ଦ୍ରୁତ ଗତିରେ ବଢିବାରେ ଲାଗିଛି । ଯେଉଁଥିପାଇଁ ହସ୍ପିଟାଲରେ ରୋଗୀଙ୍କୁ ବେଡ ମିଳୁନାହିଁ। ଦେଶରେ ଦୈନିକ ସଂକ୍ରମଣ ୨ ଲକ୍ଷ ପାର କରିଛି। ହସ୍ପିଟାଲମାନଙ୍କରେ ଅକ୍ସିଜେନ ସିଲିଣ୍ଡରର ମଧ୍ୟ ଅଭାବ ଦେଖାଦେଇଛି। ଏହିଭଳି ସ୍ଥିତିରେ ବଲିଉଡ ଅଭିନେତା ସୋନୁ ସୁଦ କରୋନାର ଦ୍ୱିତୀୟ ଲହର ସହ ଲଢ଼ିବାକୁ ଅଣ୍ଟା ଭିଡିଛନ୍ତି। ମଧ୍ୟପ୍ରଦେଶ ଇନ୍ଦୋର ପାଇଁ ସୋନୁ ସୁଦ ସହାୟତାର ହାତ ବଢ଼ାଇଛନ୍ତି। ସୋନୁ ଏକ ଭିଡିଓରେ କହିଛନ୍ତି, ସମସ୍ତ ଇନ୍ଦୋରବାସୀ ମୁଁ କହିବାକୁ ଚାହୁଁଛି ଯେ ନିଜର ଯତ୍ନ ନିଅନ୍ତୁ। ଗତକାଲି ମୁଁ ଜାଣିବାକୁ ପାଇଲି ଯେ ଇନ୍ଦୋରବାସୀଙ୍କୁ ଅକ୍ସିଜେନ ସିଲିଣ୍ଡର ଆବଶ୍ୟକ। ସେଥିପାଇଁ ମୁଁ ୧୦ଟି ଅକ୍ସିଜେନ ଜେନେରେଟର ପଠାଉଛି। ମୁଁ ସମସ୍ତଙ୍କୁ ଅନୁରୋଧ କରୁଛି ଯେ, ପରସ୍ପରକୁ ସାହାଯ୍ୟ କରନ୍ତୁ, ଯେଭଳି ଆମେ ଏହି ଭୟାବହ ମହାମାରୀରୁ ବାହାରି ପାରିବା। ସୋନୁ ସୁଦ ଆଉ ଟ୍ୱିଟ ସେୟାର କରିଥିଲେ। ଯେଉଁଥିରେ ସେ ଲେଖିଥିଲେ, ମହାମାରୀର ସବୁଠାରୁ ବଡ ଶିକ୍ଷା। ଏହା ଆମକୁ ଶିକ୍ଷା ଦେଇଛି ଯେ ଦେଶକୁ ବଞ୍ଚାଇବାକୁ ହେଲେ ହସ୍ପିଟାଲ ତିଆରି କରିବାକୁ ହେବ।'