ଦୀର୍ଘ ଦିନ ଧରି ବିଦ୍ୟୁତ୍ ବିଲ୍ ପୈଠ କରିନଥିବା ଅଭିିଯୋଗରେ ଯାଜପୁର ଜିଲ୍ଲା କଳିଙ୍ଗନଗର ଶିଳ୍ପାଞ୍ଚଳରେ ଥିବା ରାଷ୍ଟ୍ରାୟତ୍ତ ଉଦ୍ୟୋଗ ନୀଳାଚଳ ଇସ୍ପାତ ନିଗମ କାରଖାନାରୁ ବିଦ୍ୟୁତ୍ ସଂଯୋଗ ବିଛିନ୍ନ କରିଛି ବିଦ୍ୟୁତ୍ ବିଭାଗ। ଏଥିସହିତ କାରଖାନା ସହ ଜଡ଼ିତ ଟାଉନସିପ୍‌ ଓ ପମ୍ପ ହାଉସରୁ ମଧ୍ୟ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହେବା ଦ୍ବାରା କାରଖାନା ପରିସର ସମ୍ପୂର୍ଣ୍ଣ ଅନ୍ଧାର ହୋଇଯାଇଛି। ଏନେଇ କାରଖାନା କତ୍ତୃପକ୍ଷ କିମ୍ବା ବିଦ୍ୟୁତ୍ ବିଭାଗ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ। 

ପରିଚାଳନା ଗତ ସମସ୍ୟା ଯୋଗୁଁ ଗତ ୨୦୨୦ ମସିହା ଫେବୃଆରୀ ମାସରୁ କାରଖାନା ସମ୍ପୂର୍ଣ୍ଣ ବନ୍ଦ ରହିଛି । କାରଖାନାରେ ପୁଞ୍ଜିନିବେଶ କରିଥିବା ବହୁ ବଡ଼ ବଡ଼ ସଂସ୍ଥା ଓହରି ଯାଇଛନ୍ତି। ତେବେ କାରଖାନା ବନ୍ଦ ରହିଥିବା ବେଳେ କାରଖାନା କତ୍ତୃପକ୍ଷ ଅନେକ ଦିନ ହେବ ବିଦ୍ୟୁତ୍ ଶୁଳ୍କ ପୈଠ କରିନାହାନ୍ତି । ଫଳରେ କାରଖାନା ଉପରେ ୬୫ କୋଟି ଟଙ୍କା ବିଦ୍ୟୁତ୍ ଶୁଳ୍କ ବକେୟା ପଡ଼ିଛି। ଏନେଇ ବିଦ୍ୟୁତ୍ ବିଭାଗ ପକ୍ଷରୁ କାରଖାନାକୁ ବାରମ୍ବାର ବକେୟା ବିଲ ପୈଠ କରିବାକୁ ତାଗିଦ କରାଯାଇଥିଲେ ବି କୌଣସି ସୁଫଳ ମିଳିନଥିଲା। ତେଣୁ ବିଦ୍ୟୁତ୍ ବିଭାଗ ପକ୍ଷରୁ କାରଖାନାରୁ ବିଦ୍ୟୁତ ସଂଯୋଗ ବିଚ୍ଛିନ୍ନ କରାଯାଇଛି ।

Powered by Froala Editor