ସେଟର୍ଣ୍ଣ ରିୟଲ୍ଟର୍ସ କିଣିଲା ବିଜୟ ମାଲ୍ୟାଙ୍କ କିଙ୍ଗଫିସର ହାଉସ୍
ଶେଷରେ ବିଜୟ ମାଲ୍ୟାଙ୍କ କିଙ୍ଗଫିସର ହାଉସ୍ ବିକ୍ରି ହୋଇଛି। ମୁମ୍ବାଇର ଭିଲେପାର୍ଲେରେ ଥିବା ଏହି ଘରଟିକୁ ଡେଟ୍ ରିକୋଭରୀ ଟ୍ରିବ୍ୟୁନାଲ ହାଇଦ୍ରାବାଦର ସେଟର୍ଣ୍ଣ ରିୟଲ୍ଟର୍ସଙ୍କୁ ବିକ୍ରି କରିଛନ୍ତି। ସେଟର୍ଣ୍ଣ ରିୟଲ୍ଟର୍ସ ଏହି ଘରଟିକୁ ୫୨.୨୫ କୋଟି ଟଙ୍କାରେ କିଣିଛି। ଏଥିଲାଗି ମହାରାଷ୍ଟ୍ର ସରକାରଙ୍କୁ ଷ୍ଟାମ୍ପ ଡ୍ୟୁଟି ବାବଦେ ୨.୬୧୨କୋଟି ଟଙ୍କା ଦେଇଛି । ଏହି କାରବାର ଗତ ଜୁଲାଇ ୩୧ ତାରିଖରେ ହୋଇଥିଲା। ମୁମ୍ବାଇ ବିମାନ ବନ୍ଦର ନିକଟରେ ୨୪୦୧.୭୦ ବର୍ଗ ମିଟରରେ ବିସ୍ତୃତ ଏହି ପ୍ରୋପର୍ଟିକୁ ୨୦୧୬ ମସିହାରୁ ନିଲାମ ପାଇଁ ରଖାଯାଇଥିଲା। ଡେଟ୍ ରିକୋଭରୀ ଟ୍ରିବ୍ୟୁନାଲ ବେଙ୍ଗାଲୁରୁ ଏହାକୁ ନିଲାମ କରିବା ଲାଗି ୮ ଥର ଉଦ୍ୟମ କରିଥିଲା। ହେଲେ ଟ୍ରିବ୍ୟୁନାଲଙ୍କ ପ୍ରତ୍ୟେକ ଉଦ୍ୟମ ବିଫଳ ହୋଇଥିଲା। ଶେଷରେ ନବମ ଥରରେ ସଫଳତା ମିଳିଛି।
କିଙ୍ଗଫିସର ହାଉସ୍ ଲାଗି ଟ୍ରିବ୍ୟୁନାଲ ୧୩୫କୋଟି ଟଙ୍କା ଧାର୍ଯ୍ୟ କରିଥିଲେ। ଧାର୍ଯ୍ୟମୂଲ୍ୟର ଏକ ତୃତୀୟାଂଶ ଦରରେ ଏହାକୁ ବିକ୍ରି କରାଯାଇଛି। ରିୟଲ ଇଷ୍ଟେଟ୍ ରିସର୍ଚ୍ଚ ଫାର୍ମ ‘ଲିୟାସେସ୍ ଫୋରାସ’ଙ୍କ ପରିଚାଳନା ନିର୍ଦ୍ଦେଶକ ପଙ୍କଜ କପୁର ଦର ହ୍ରାସ ଲାଗି ପ୍ରପର୍ଟିର ସ୍ଥାନ ଓ ବର୍ତ୍ତମାନର ବଜାର ପରିସ୍ଥିତିକୁ ଦାୟି କରିଛନ୍ତି। ବିମାନ ବନ୍ଦର ଯୋଗୁ ଏହି ଭୂ-ଖଣ୍ଡ ଉପରେ ଉଚ୍ଚତା କଟକଣା ରହିଛି। ଏହା ଛଡା ବର୍ତ୍ତମାନର ରିୟଲ ଇଷ୍ଟେଟ ବଜାରର ପରିସ୍ଥିତି ଅତ୍ୟନ୍ତ ଖରାପ ବୋଲି ସେ କହିଛନ୍ତି।
ସୂଚନାଯୋଗ୍ୟ, ବିଜୟ ମାଲ୍ୟାଙ୍କ ଏହି ଘରଟି ଏକଦା କିଙ୍ଗ ଫିସର ଏୟାରଲାଇନ୍ସର ମୁଖ୍ୟାଳୟ ଥିଲା। ଏୟାର ଲାଇନ୍ସ ଉପରେ ୯ ହଜାର କୋଟି ଟଙ୍କାର ଋଣ ଠକେଇ ଓ ଲାଞ୍ଚ ଅଭିଯୋଗ ହେବା ପରେ ଗୁରୁତର ଆର୍ଥିକ ସଙ୍କଟ ଦେଖାଦେଇଥିଲା । ଆର୍ଥିକ ସଂକଟ ଯୋଗୁ ୨୦ ଅକ୍ଟୋବର ୨୦୧୨ରେ କିଙ୍ଗଫିସର ଏୟାରଲାଇନ୍ସକୁ ବନ୍ଦ କରିଦିଆଯାଇଥିଲା। କମ୍ପାନୀର ମାଲିକ ବିଜୟ ମାଲ୍ୟା ଏୟାରଲାଇନ୍ସ ସମ୍ବଦ୍ଧିତ ଋଣ ଠକେଇ ଓ ଲାଞ୍ଚ କାରବାର ଅଭିଯୋଗର ସମ୍ମୁଖୀନ ହୋଇ ଭାରତରୁ ପଳାୟନ କରିଥିଲେ। ବ୍ୟାଙ୍କମାନଙ୍କୁ ଠକିଥିବା ଅଭିଯୋଗରେ ଭାରତରେ ତାଙ୍କୁ ଆର୍ଥିକ ଅପରାଧୀ ଘୋଷଣା କରାଯାଇଥିଲା।
Powered by Froala Editor
