ଭୁବନେଶ୍ବର : ଅଗଷ୍ଟ ଆରମ୍ଭରୁ ରାଜ୍ୟରେ ମୌସୁମୀ ବର୍ଷାର ଦୁର୍ବଳ ସ୍ଥିତି ପାଣିପାଗ ବିଜ୍ଞାନୀ ଓ ଚାଷୀଙ୍କ ମୁଣ୍ଡବ୍ୟଥାର କାରଣ ହେଲାଣି। ଜୁନ୍‌ ଓ ଜୁଲାଇର ଅଭାବୀ ବର୍ଷା ପରେ ଅଗଷ୍ଟର ଏହି ୮ ଦିନରେ ପ୍ରାୟ ୭୬% ନିଅଣ୍ଟିଆ ବର୍ଷା ରେକର୍ଡ ହେଲାଣି। ରାଜ୍ୟର ୨୧ ଜିଲ୍ଲାରେ ନିଅଣ୍ଟିଆ ବର୍ଷା ପରିସ୍ଥିତି ଉପୁଜିଥିବା ବେଳେ ୪ ଜିଲ୍ଲାରେ ଉତ୍କଟ ସ୍ଥିତି ଉପୁଜିଛି। ଭଦ୍ରକ, ଯାଜପୁର, ଗଜପତି ଓ ବଲାଙ୍ଗୀରରେ ଅଧିକ ନିଅଣ୍ଟିଆ ବର୍ଷା ହୋଇଛି ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି। ବିଶିଷ୍ଟ ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଆସନ୍ତା ୧୪ ତାରିଖ ଆଡ଼କୁ ବଙ୍ଗେପସାଗରରେ ଏକ ଲଘୁଚାପ ସୃଷ୍ଟି ହେବାକୁ ଯାଉଛି। କିନ୍ତୁ ଏହାଦ୍ବାରା ରାଜ୍ୟରେ ଅଧିକ ବର୍ଷା ହେବାର ସମ୍ଭାବନା ନାହିଁ।

ସୂଚନା ମୁତାବକ, ଅଗଷ୍ଟ ୧ରୁ ୮ତାରିଖ ମଧ୍ୟରେ ରାଜ୍ୟରେ ୨୫ ମିମି ବର୍ଷା ହୋଇଛି। ସ୍ବାଭାବିକ ଭାବେ ଏହି ୮ ଦିନରେ ୧୦୫.୪ ମିମି ବର୍ଷା ହୋଇଥାଏ। ଅର୍ଥାତ ଏହି ୮ ଦିନରେ ରାଜ୍ୟରେ ୭୬% ନିଅଣ୍ଟିଆ ବର୍ଷା ହୋଇଛି। ଫଳରେ ରାଜ୍ୟରେ ଜୁନ୍‌ରୁ ଅଗଷ୍ଟ ପର୍ୟ୍ୟନ୍ତ ନିଅଣ୍ଟିଆ ବର୍ଷାର ପରିମାଣ ବଢ଼ିବାରେ ଲାଗିଛି। ୧ ଜୁନ୍‌ରୁ ୮ ଅଗଷ୍ଟ ପର୍ୟ୍ୟନ୍ତ ରାଜ୍ୟରେ ୪୮୧.୩ ମିମି ବର୍ଷା ହୋଇଛି। ଏହି ସମୟ ମଧ୍ୟରେ ରାଜ୍ୟରେ ସ୍ବାଭାବିକ ଭାବେ ୬୬୭.୭ ମିମି ବର୍ଷା ହୋଇଥାଏ। ଅର୍ଥାତ ରାଜ୍ୟରେ ଏବେ ୨୮% ନିଅଣ୍ଟିଆ ବର୍ଷା ରେକର୍ଡ ହେଲାଣି। ମୌସୁମୀ ଟ୍ରଫ୍‌ ଲାଇନ୍‌ ଏବେ ସ୍ବାଭାବିକଠାରୁ ଉତ୍ତରାଭିମୁଖୀ ହୋଇଥିବାରୁ ରାଜ୍ୟରେ ମୌସୁମୀର ଦୁର୍ବଳ ସ୍ଥିତି ଜାରି ରହିଛି। ଆସନ୍ତା ୫ ଦିନ ପର୍ୟ୍ୟନ୍ତ ବି ରାଜ୍ୟରେ ବିଶେଷ ବର୍ଷାର ସମ୍ଭାବନା ନାହିଁ।
, ଅଗଷ୍ଟ ୧୪ ତାରିଖରେ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର ଓ ସଂଲଗ୍ନ ଉତ୍ତର ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃ‌ଷ୍ଟି ହେବ। କିନ୍ତୁ ଏହାର ରୂପରେଖ ନେଇ ମଡେଲମାନଙ୍କ ଭିତରେ ସହମତି ନାହିଁ। କିଛି ମଡେଲ ଅନୁସାରେ, ଏହା ୧୬ ତାରିଖ ବେଳକୁ ଅସଂଗଠିତ ହେବ ଓ ଏହା ପୁରୀରୁ ଗୋପାଳପୁର ଭିତରେ ଅବସ୍ଥିତ ରହିବ। ଅନ୍ୟ ମଡେଲ ଅନୁସାରେ, ଏହା ୧୬ ତାରିଖ ସୁଦ୍ଧା ଲଘୁଚାପରେ ପରିଣତ ହୋଇ ବିଶାଖାପାଟଣା ନିକଟ ଉପକୂଳ ଦେଇ ଆନ୍ଧ୍ର ଓ ତେଲେଙ୍ଗାନା ଆଡ଼କୁ ଯିବ।

Powered by Froala Editor