କେନ୍ଦୁଝର: କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଜାତୀୟ ରାଜପଥର ଘଷିପୁରା ବାଇପାସ୍ ନିକଟରେ ଅଭାବନୀୟ ଘଟଣା ଘଟିଛି । ଜଣେ ଯାତ୍ରୀ ବସରେ ମଦ୍ୟପାନ କରି ଯାତ୍ରା କରୁଥିବାରୁ କଣ୍ଡକ୍ଟର ତାଙ୍କୁ ଠେଲି ଦେଇଛନ୍ତି । ତାଙ୍କ ଗୋଡ଼ ଉପରେ ବସ୍ ଚକ ମାଡ଼ି ଯାଇଛି । ପୁଲିସ୍ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଗୁରୁତର ଅବସ୍ଥାରେ ଉଦ୍ଧାର କରି ଘଷିପୁରା ଡାକ୍ତରଖାନାରେ ଭର୍ତ୍ତି କରିଛି । ଏଥିସହିତ ବସ୍ ଚାଳକ ଓ କଣ୍ଡକ୍ଟରଙ୍କୁ ଅଟକ ରଖି ପଚରାଉଚରା ଜାରି ରଖିଛି । ମିଳିଥିବା ସୂଚନା ଅନୁଯାୟୀ, ଭୁବନେଶ୍ୱରରୁ କରଞ୍ଜିଆ ଯାଉଥିବା ଇନ୍ଦୁମତି ବସରେ ଘଟଗାଁ ଥାନା ବଡ଼ ଜାମପସି ଅଞ୍ଚଳର ଏକ ଟ୍ରକର ହେଲ୍ପର ଅଭିମନ୍ୟୁ ନାୟକ ଓ ତାଙ୍କ ସାଥି ଡ୍ରାଇଭର ପାଣିକୋଇଲିରୁ ବସିଥିଲେ । ସେମାନଙ୍କ ଟ୍ରକଟି ଖରାପ ଥିବାରୁ ବସ ଯୋଗେ ସେମାନେ ଗାଁକୁ ଯାଉଥିଲେ । ଅଭିମନ୍ୟୁ ମଦ ପିଇଥିବାରୁ ବସର କଣ୍ଡକ୍ଟରଙ୍କ ସହିତ କୌଣସି କାରଣକୁ ନେଇ ବଚସା ହୋଇଥିଲା । ଘଷିପୁରା ନିକଟରେ ବସ କଣ୍ଡକ୍ଟର ତାଙ୍କୁ ବସରୁ ଓହ୍ଲାଇ ଦେଇ ପଳାଉଥିବା ସମୟରେ ସମ୍ପୃକ୍ତ ଯୁବକ ପୁନର୍ବାର ବସରେ ଯିବାକୁ ଚେଷ୍ଟା କରିଥିଲେ । ଏହି ସମୟରେ କଣ୍ଡକ୍ଟର ତାଙ୍କୁ ପେଲିଦେବାରୁ ଚଳନ୍ତା ବସଟି ତାଙ୍କ ଗୋଡ଼ ଉପରେ ଚଢ଼ି ଯାଇଥିଲା । ଅଭିମନ୍ୟୁଙ୍କ ଗୋଡ଼ରେ ଶକ୍ତ ଆଘାତ ଲାଗିଥିବା ଜଣାପଡ଼ିଛି ।