ଦକ୍ଷିଣ ଚୀନ ସାଗରରେ ଭାରତ ୪ଟି ଘାତକ ଯୁଦ୍ଧପୋତ ମୁତୟନ କରିଛି ।  ଭାରତ ଯେଉଁସବୁ ଯୁଦ୍ଧପୋତ ପଠାଇଛି ସେଥିରେ ଗାଇଡେଡ୍‌ ମିସାଇଲ୍‌ ଡେଷ୍ଟ୍ରୟର, ଗାଇଡେଡ୍‌ ମିସାଇଲ୍‌ ଫ୍ରିଗେଟ୍‌, ଆଣ୍ଟିସ ସବମରିନ୍‌ ପୋତ ଏବଂ ଗାଇଡେଡ୍‌ ମିସାଇଲ୍‌ ଜାହାଜ ସାମିଲ ରହିଛି । ଏ ଗୁଡ଼ିକ ଭିଏତନାମ, ଅଷ୍ଟ୍ରେଲିଆ, ମାଲେସିଆ, ଇଣ୍ଡୋନେସିଆ ଏବଂ ଫିଲିପାଇନ୍ସ ସହ ଯୁଦ୍ଧାଭ୍ୟାସ କରିବେ । ବନ୍ଧୁତ୍ୱ ରାଷ୍ଟ୍ରଗୁଡ଼ିକ ସୁରକ୍ଷା ସମ୍ପର୍କକୁ ବୃଦ୍ଧି କରିବା ସହ ଜଳପଥରେ ଶାନ୍ତି ପ୍ରତିଷ୍ଠା କରିବା ପାଇଁ ଏପରି ବ୍ୟବସ୍ଥା କରାଯାଇଛି। ଭାରତୀୟ ନୌସେନାର ଏହି ଯୁଦ୍ଧପୋତ ପାଖାପାଖି ୨ ମାସ ଦକ୍ଷିଣ ଚୀନ ସାଗର ଏବଂ ଦକ୍ଷିଣ ପୂର୍ବ ଏସିଆରେ ରହିବେ। 

ସୂଚନାଯୋଗ୍ୟ, ଚାଇନା ଓ ଆମେରିକା ମଧ୍ୟରେ ଦକ୍ଷିଣ ଚାଇନା ସାଗରକୁ ନେଇ ବିବାଦ ଲାଗି ରହିଛି। ବେଜିଂ ଏହାକୁ ନିଜର ବୋଲି ଦାବି କରୁଥିବା ବେଳେ ଆମେରିକା ଏହାକୁ ଆଗ୍ରାହ୍ୟ କରି ଚାଲିଛି। ଜୁନ ମାସରେ ଆମେରିକା ପକ୍ଷରୁ ଦକ୍ଷିଣ ଚାଇନା ସାଗରରେ ଯୁଦ୍ଧାଭ୍ୟାସ କରାଯାଇଥିଲା।

ବ୍ରିଟେନ ମଧ୍ୟ ଚଳିତ ମାସରେ ଫିଲିପାଇନ୍ସ ସମୁଦ୍ରରେ ଯୁଦ୍ଧାଭ୍ୟାସ କରି ଚାଇନାକୁ ଚେକ୍‌ ଦେବାକୁ ଚେଷ୍ଟା କରିଥିଲା। ଏବେ ଭାରତ ଦକ୍ଷିଣ ଚାଇନା ସାଗରକୁ ଯୁଦ୍ଧ ତୋପ ପଠାଇବାରୁ ବେଜିଂର ଚିନ୍ତା ବଢ଼ିଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଭାରତ ଏଠାରେ ଅନୁଷ୍ଠିତ ବାର୍ଷିକ ମିଲିଟାରୀ ଡ୍ରିଲରେ ସାମିଲ ହେବ। ଗୌଆମା ଉପକୂଳରେ ଆମେରିକା, ଜାପାନ, ଭାରତ ଓ ଅଷ୍ଟ୍ରେଲିଆ ମିଳିତ ଭାବେ ଏହି ଡ୍ରିଲ କରିବେ।   

ନୌସେନା ଅଧିକାରୀଙ୍କ ମତରେ, ଦକ୍ଷିଣ ଚୀନ ସାଗର କ୍ଷେତ୍ରରେ ଥିବା ମିତ୍ର ଦେଶ ସହ ଭଲ ଯୋଗାଯୋଗ ଏବଂ ଶାନ୍ତି ପ୍ରତିଷ୍ଠା ପାଇଁ ଭାରତ ସଦାସର୍ବାଦା ଚେଷ୍ଟିତ। ଏହି ମୁତୟନ ମଧ୍ୟ ଏହି ନୀତିରେ ଅନ୍ତର୍ଗତ। ଏହି ସବୁ ଜାହାଜ ଆମେରିକା, ଜାପାନ ଏବଂ ଅଷ୍ଟ୍ରେଲିଆ ସହ ଯୁଗ୍ମ ଯୁଦ୍ଧ ଅଭ୍ୟାସ କରିବ ବୋଲି ସେ କହିଛନ୍ତି ।

Powered by Froala Editor