ପାଠ୍ୟପୁସ୍ତକ ତ୍ରୁଟି ମାମଲାରେ ପ୍ରାୟ ୨୫୦ଜଣ କର୍ମଚାରୀଙ୍କ ତାଲିକା ପ୍ରସ୍ତୁତ କରାଯାଇଛି । କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ଏହି ସୂଚନା ଦେଇଛନ୍ତି । ବହି ଲେଖାଠାରୁ ଛାପିବା ଯାଏ ସବୁ ଦିଗକୁ ଗୁରୁତ୍ୱ ଦିଆଯାଉଛି । କେଉଁମାନେ କେଉଁ କ୍ଷେତ୍ରରେ ଏବଂ କ’ଣ ଭୁଲ କରିଛନ୍ତି? ସେସବୁ ତ୍ରୁଟିଗୁଡି଼କ ଖୋଜାଚାଲିଛି ।

ଏହି ମାମଲାରେ ପୂର୍ବରୁ ପୂର୍ବତନ ଏସ୍ସିଇଆର୍ଟି ନିର୍ଦ୍ଦେଶକ ମନୋଜ ପାଢ଼ୀ ଗିରଫ ହୋଇଛନ୍ତି । ୩ଜଣ ସହକାରୀ ନିର୍ଦ୍ଦେଶକ ନିଲମ୍ବିତ ହୋଇଛନ୍ତି । ଅନ୍ୟ ୬ଜଣ ସହକାରୀ ନିର୍ଦ୍ଦେଶକଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯାଇଛି । ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଏବଂ ରାଜ୍ୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ(ଏସ୍ସିଇଆର୍ଟି), ପାଠ୍ୟ ପୁସ୍ତକ ପ୍ରସ୍ତୁତି ଓ ମାକେର୍ଟିଂ(ଟିବିପିଏମ୍) ଓ ଓଡି଼ଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ(ଓସେପା) ଭଳି ଶାଖା କ୍ରାଇମବ୍ରାଞ୍ଚ ସ୍କାନରରେ ରହିଛି ।

ଏସବୁ ତ୍ରୁଟି ସେମାନଙ୍କ ଜ୍ଞାତସାରରେ ହୋଇଛି କି ନାହିଁ । ଛାତ୍ରଛାତ୍ରୀଙ୍କ ଭବିଷ୍ୟତ ବିଗାଡି଼ବା ପାଇଁ ଏହି ତ୍ରୁଟି କେତେ ଦୂର ଯୁକ୍ତିଯୁକ୍ତ? ସେନେଇ ମଧ୍ୟ ତର୍ଜମା କରାଯାଉଛି । ଉପଯୁକ୍ତ ପ୍ରମାଣ ମିଳିଲେ, ସେମାନଙ୍କୁ ଜେରା ପାଇଁ ଡକାଯିବ ବୋଲି କ୍ରାଇମବ୍ରାଞ୍ଚ ପକ୍ଷରୁ ସୂଚନା ଦିଆଯାଇଛି ।

ସେହିପରି କାଗଜ କ୍ରୟ ଓ ପ୍ରିଣ୍ଟିଂ, ଅନ୍ୟାନ୍ୟ କମିଟି ବାବଦ ଖର୍ଚ୍ଚ ଓ ପରିବହନ ଖର୍ଚ୍ଚ ବାବଦକୁ ୧୭୫ କୋଟି ଟଙ୍କା ଖର୍ଚ୍ଚ ହୋଇଥିଲା । କିନ୍ତୁ ଏସବୁ ଆର୍ଥିକ କାରବାରରେ ପ୍ରାୟ ୨୫ କୋଟି ଟଙ୍କାର ଆର୍ଥିକ ଅନିୟମିତତା ହୋଇଥିବାର ପ୍ରମାଣ ପାଇଛି କ୍ରାଇମବ୍ରାଞ୍ଚ । ତଦନ୍ତ ବେଳେ ବୈଷୟିକ ଜ୍ଞାନକୌଶଳକୁ ପ୍ରୟୋଗ କରାଯାଉଛି ।

Powered by Froala Editor