ଡେଲଟା ପ୍ରଜାତିର ଭୟଙ୍କର ସ୍ଥିତି, କରୋନା ପାଇଁ ସେନା ମୁତୟନ କଲା ଅଷ୍ଟ୍ରେଲିଆ
ସିଡ଼ନି : ଅଷ୍ଟ୍ରେଲିଆରେ ଡେଲଟା ପ୍ରଜାତି ଭୟଙ୍କର ସ୍ଥିତି ଆଣିଛି । କ୍ୱିନ୍ସଲାଣ୍ଡରେ ସଂକ୍ରମଣ ଉପରମୁହାଁ ହୋଇଛି । ଅଷ୍ଟ୍ରେଲିଆର ତୃତୀୟ ବୃହତ୍ତମ ସହର ତଥା କ୍ୱିନ୍ସଲାଣ୍ଡ ରାଜଧାନୀ ବ୍ରିସବେନ ଏବଂ ସିଡ଼ନିରେ ସଂକ୍ରମଣ ବଢ଼ୁଥିବାରୁ ଏଠାରେ କୋଭିଡ କଟକଣା କଡ଼ାକଡ଼ି କରାଯାଇଛି । ବ୍ରିସବେନରେ ଲକଡାଉନ ଅବଧି ବଢ଼ିଥିବାବେଳେ ସିଡ଼ନିରେ କରୋନା ନିୟମାବଳିର ସଠିକ ପାଳନ ପାଇଁ ସୈନ୍ୟ ମୁତୟନ ହୋଇଛନ୍ତି । ଏଥିସହ କଟକଣା ପାଇଁ ଘରେ ଥିବା ଲୋକଙ୍କ ପାଖରେ ଖାଦ୍ୟ ପହଞ୍ଚାଇବେ ଏବଂ ଟିକାକରଣ କେନ୍ଦ୍ରରେ ବି ସେନା ସଦସ୍ୟମାନେ ସହଯୋଗ କରିବେ । ଅଷ୍ଟ୍ରେଲିଆରେ କୋଭିଡ କଟକଣା କଡ଼ାକଡ଼ି ଭାବେ ପାଳନ ହେଉଛି । ଏପରିକି ଅଷ୍ଟ୍ରେଲିଆ ପ୍ରତିରକ୍ଷା ମନ୍ତ୍ରୀ ପିଟର ଡଟ୍ଟନ ମଧ୍ୟ ଏଥିରୁ ବାଦ ପଡ଼ିନାହାନ୍ତି । ତାଙ୍କର ୨ ପୁଅ ଯେଉଁ ସ୍କୁଲରେ ପଢ଼ୁଛନ୍ତି ସେଠାରେ କୋଭିଡ ମାମଲା ଚିହ୍ନଟ ହୋଇଥିବାରୁ ତାଙ୍କୁ ୧୪ ଦିନ ହୋମ କ୍ୱାରାଣ୍ଟିନରେ ରହିବାକୁ କୁହାଯାଇଛି । ନୁ୍ୟ ସାଉଥ ୱେଲ୍ସରେ ବି କଟକଣା କଡ଼ାକଡ଼ି ହୋଇଛି । ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମରିସନ କହିଛନ୍ତି, ଦେଶରେ ୧୬ ବର୍ଷରୁ ଊର୍ଦ୍ଧ୍ୱ ୭୦ ପ୍ରତିଶତ ଲୋକ ଟିକା ନେବାପରେ କଟକଣା କୋହଳ ହେବ । ଏବେ ଏହି ବର୍ଗରେ ମାତ୍ର ୧୯ ପ୍ରତିଶତଙ୍କର ଟିକାକରଣ ସରିଛି । ଚଳିତବର୍ଷ ଶେଷ ସୁଦ୍ଧା ୧୬ ବର୍ଷରୁ ଊର୍ଦ୍ଧ୍ୱ ୭୦ ପ୍ରତିଶତଙ୍କର ଟିକାକରଣ ସରିବ ବୋଲି ମରିସନ୍ ଲକ୍ଷ୍ୟ ଧାର୍ଯ୍ୟ କରିଛନ୍ତି ।
Powered by Froala Editor