ଭୁବନେଶ୍ବର : ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିବା ଜିଆର୍‌ପି କନଷ୍ଟେବଳ ସୌମ୍ୟ ରଞ୍ଜନ ସ୍ବାଇଁ ହତ୍ୟା ମାମଲାରେ ଦିନକୁ ଦିନ ନୂଆ ମୋଡ଼ ଆସିବାରେ ଲାଗିଛି। ଗତ ମେ ମାସ ୭ ତାରିଖରେ ଏହି ହତ୍ୟାକାଣ୍ଡ ଘଟିଥିଲା। ମାମଲାରେ ଚାର୍ଜସିଟ୍ ଦାଖଲ ହେବା ପୂର୍ବରୁ ରବିବାର କ୍ରାଇମବ୍ରାଞ୍ଚ ମୁଖ୍ୟ କାର୍ଯ୍ୟାଳୟରେ ମୃତ ସୌମ୍ୟଙ୍କ ବାପା ଦୁଃଶାସନ ସ୍ୱାଇଁ ହାଜର ହୋଇଛନ୍ତି। କ୍ରାଇମବ୍ରାଞ୍ଚ ଅଧିକାରୀ ତାଙ୍କୁ ଦୀର୍ଘ ୫ ଘଣ୍ଟା ଧରି କ୍ରମାଗତ ଭାବେ ପଚରାଉଚରା କରିଥିଲେ। ଏହି ପଚରାଉଚରା ସମୟରେ ମୃତ ସୌମ୍ୟଙ୍କ ପରିବାର ପକ୍ଷରୁ କିଛି ଗୁରୁତ୍ୱପୂର୍ଣ୍ଣ ତଥ୍ୟ ଓ ପ୍ରମାଣ କ୍ରାଇମବ୍ରାଞ୍ଚକୁ ଦିଆଯାଇଛି। ଯାହା ତଦନ୍ତକୁ ଏକ ନୂତନ ଦିଗ ଦେବ ବୋଲି କୁହାଯାଉଛି।
ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରିବା ଏବଂ ପରିବାରକୁ ନ୍ୟାୟ ଦାବି କରି ରବିବାର ସୌମ୍ୟଙ୍କ ବାପା ଦୁଃଶାସନ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମୋବାଇଲ୍ ଫୋନ୍ କ୍ରାଇମବ୍ରାଞ୍ଚରେ ଦାଖଲ କରିଛନ୍ତି। ଏହି ମୋବାଇଲ୍‌ ସୌମ୍ୟଙ୍କ ମା’ଙ୍କ ପାଖରେ ଥିଲା। ପରିବାରର ଦାବି ଅନୁଯାୟୀ, ଏହି ଫୋନରେ ହତ୍ୟାକାଣ୍ଡ ସମ୍ବନ୍ଧୀୟ ଅନେକ ଗୁପ୍ତ ରହସ୍ୟ ଏବଂ ସତ୍ୟ ଲୁଚି ରହିଛି। ବିଶେଷକରି ସୌମ୍ୟ ଯେଉଁଦିନ ଭିଡ଼ ହିଂସାର ଶିକାର ହୋଇ ପ୍ରାଣ ହରାଇଥିଲେ, ଠିକ୍ ସେହିଦିନ ସକାଳେ ସେ ନିଲମ୍ବିତ ଆଇପିଏସ୍ ତଥା ଏଡିଜି ଦୟାଲ ଗଙ୍ଗୱାରଙ୍କୁ ଏକ ମେସେଜ୍ ପଠାଇଥିଲେ। ସେହି ମେସେଜ୍‌ରେ ସୌମ୍ୟ ଲେଖିଥିଲେ ଯେ, ‘ମୋତେ କ୍ଷମା କରିଦେବେ, ଆଉ ଏପରି ଭୁଲ କେବେ ହେବ ନାହିଁ’। ଏହି ମେସେଜ୍ ସାମ୍ନାକୁ ଆସିବା ପରେ ପୁଲିସ ପ୍ରଶାସନ ଓ ରାଜ୍ୟରେ ବଡ଼ଧରଣର ଚର୍ଚ୍ଚା ଆରମ୍ଭ ହୋଇଯାଇଛି। ବରିଷ୍ଠ ଆଇପିଏସ୍ ଅଧିକାରୀଙ୍କ ସହ କନ‌େ‌ଷ୍ଟବଳ ସୌମ୍ୟଙ୍କ ଏପରି ଭୟଭୀତ କଲାଭଳି ମେସେଜ୍ ପଛର କାରଣ କ’ଣ ଥିଲା ଏବଂ ଏହାସହ ହତ୍ୟାକାଣ୍ଡର କିଛି ସମ୍ପର୍କ ଅଛି କି ନାହିଁ, ସେନେଇ କ୍ରାଇମବ୍ରାଞ୍ଚ ତନାଘନା ଆରମ୍ଭ କରିଛି। କ୍ରାଇମବ୍ରାଞ୍ଚରେ ହାଜର ହେବା ପରେ ସୌମ୍ୟଙ୍କ ବାପା ଏବଂ ତାଙ୍କ ସାଙ୍ଗ କିଛି ଦାବି ରଖିଛନ୍ତି। ଏହି ଘଟଣାରେ ପୂର୍ବରୁ ବୟାନ ଦେଇଥିବା ଦୁଇଜଣ ଯୁବତୀଙ୍କର ସତ ମିଛ ପରୀକ୍ଷା ବା ଲାଏ ଡିଟେକ୍ସନ ଟେଷ୍ଟ କରାଯାଉ ବୋଲି ଦାବି କରାଯାଇଛି। ଏଥିସହ ଘଟଣା ଦିନ ସୌମ୍ୟଙ୍କ ଗାଡ଼ି ଚାବି ନିଜ ପାଖରେ ରଖିଥିବା ବିରଞ୍ଚି ନାମକ ବ୍ୟକ୍ତିକୁ ମଧ୍ୟ ତଦନ୍ତ ପରିସରଭୁକ୍ତ କରାଯିବାକୁ ପରିବାର ଲୋକ ଦାବି କରିଛନ୍ତି। ମାମଲାରେ ବର୍ତ୍ତମାନ ପର୍ଯ୍ୟନ୍ତ ୨୦ ଅଭିଯୁକ୍ତଙ୍କୁ ଗିରଫ କରାଯାଇଛି। କ୍ରାଇମବ୍ରାଞ୍ଚ ହାତରେ ଏବେ ସୌମ୍ୟଙ୍କ ମୋବାଇଲ୍ ଏବଂ ଶେଷ ମେସେଜ୍ ଲାଗିବା ପରେ ତଦନ୍ତ ଆହୁରି ଜୋରଦାର ହୋଇଛି।

Powered by Froala Editor