ପୁରୀ : ରଥ ଉପରେ ରବିବାର ରାତିରେ ଚତୁର୍ଦ୍ଧାମୂର୍ତ୍ତିଙ୍କୁ ଅଧରପଣା ଭୋଗ କରାଯାଇଛି। ଶ୍ରୀଜୀଉଙ୍କୁ ଅଧରପଣା ଅର୍ପଣ ପରେ ଏହାକୁ ପାର୍ଶ୍ବ ଦେବଦେବୀ ଓ ଅଶରୀରଙ୍କ ଉଦ୍ଦେଶ୍ୟରେ ଏହି ହାଣ୍ଡି ଭଙ୍ଗାଯାଇଛି। ମହାପ୍ରଭୁଙ୍କ ଅଧର ଉଚ୍ଚ ପର୍ଯ୍ୟନ୍ତ ତିନିଟି ଲେଖାଏଁ ମାଟିହାଣ୍ଡି ରଖାଯାଇ ପଣା ପ୍ରସ୍ତୁତ ନିମନ୍ତେ ଛାଉଁଣି ମଠ କୂଅରୁ ପାଣି ଅଣାଯାଇ ସେଥିରେ କ୍ଷୀର, ସର, ଛାଚି, କଦଳୀ, ଛେନା, ଗୋଲମରିଚ ଗୁଣ୍ଡ, ଜାଇଫଳ ପକାଇ ପଣା ପ୍ରସ୍ତୁତ କରାଯାଇଥିଲା। ଅଧର ପଣାହାଣ୍ଡି ଉପରେ ଧଳା କରିଆ କନା ପକାଇ ଘୋଡା ଯାଇଥିଲା। ପତ୍ରିବଡ଼ୁ, ସୁଆରବଡ଼ୁ, ଗରାବଡ଼ୁ ସେବକ ପୂଜା ପାଠ କରିଥିଲେ।
ଘୋଷଯାତ୍ରା ଶେଷକରି ସୋମବାର ନୀଳାଦ୍ରି ବିଜେ କରିବେ ଦାରୁବ୍ରହ୍ମ। ରଥ ଉପରୁ ପ୍ରଭୁଙ୍କୁ ପହଣ୍ଡି କରାଯାଇ ଶ୍ରୀମନ୍ଦିର ରତ୍ନସିଂହାସନରେ ବିଜେ କରାଯିବ। ପୁଷ୍ପାଳକ ମହାଜନ ସେବକ ପ୍ରଥମେ ମଦନମୋହନ ଓ ରାମକୃଷ୍ଣଙ୍କୁ ରଥ ଉପରୁ ନେଇ ଦକ୍ଷିଣୀ ଘରେ ବିଜେ କରାଇବେ। ଏହାପରେ ଚକ୍ରରାଜ ଶ୍ରୀସୁଦର୍ଶନଙ୍କୁ ପହଣ୍ଡି କରାଯିବ। ବଡ଼ଠାକୁର ଶ୍ରୀବଳଭଦ୍ର ଓ କାଳିଆଠାକୁର ଶ୍ରୀଜଗନ୍ନାଥଙ୍କ ଶ୍ରୀମସ୍ତକରେ ଆକର୍ଷଣୀୟ ଟାହିଆ ଲଗାଯିବ। ଶ୍ରୀବଳଭଦ୍ର ଓ ଦେବୀ ସୁଭଦ୍ରା ଗୋଟି ପହଣ୍ଡିରେ ରତ୍ନସିଂହାସନକୁ ବିଜେ କରିବେ। ଶେଷରେ କାଳିଆଠାକୁର ଶ୍ରୀଜଗନ୍ନାଥଙ୍କୁ ନୀଳାଦ୍ରି ବିଜେ କରାଯିବ। ପ୍ରଭୁ ଶ୍ରୀଜଗନ୍ନାଥ ପହଣ୍ଡି ହୋଇ ଚାରମାଳ ଉପରକୁ ଯିବା ପରେ ମହାଲକ୍ଷ୍ମୀ ଭେଟ ମଣ୍ଡପରେ ବିଜେ କରିବେ। ମହାପ୍ରଭୁ ସିଂହଦ୍ୱାର ସମ୍ମୁଖରେ ପହଞ୍ଚିବା ମାତ୍ରେ ଲକ୍ଷ୍ମୀ ସାଆନ୍ତାଣୀଙ୍କ ନିର୍ଦେଶରେ ଭିତରୁ ସିଂହଦ୍ୱାର ବନ୍ଦ କରାଯିବ। ଦୁଆର ଖୋଲିବା ପରେ ଶ୍ରୀଜଗନ୍ନାଥ ବାଇଶିପାହାଚ ଦେଇ ଶ୍ରୀମନ୍ଦିରରେ ପ୍ରବେଶ କରିବେ। ଜୟ ବିଜୟ ଦ୍ୱାର ନିକଟରେ ମହାଲକ୍ଷ୍ମୀଙ୍କ ନିର୍ଦେଶରେ ପୁଣିଥରେ ଭିତରୁ ଦୁଆର ବନ୍ଦ କରାଯିବ। ପରମ୍ପରା ଅନୁଯାୟୀ ସେଠାରେ ବଚନିକା ହେବ। କାଳିଆ ସାଆନ୍ତ ଭିତରକାଠ ଓ ଭଣ୍ଡାରଘର ନିକଟରେ ପହଞ୍ଚିବା ପରେ ଋକ୍ମିଣୀ ବିବାହ ସମୟର ଗଇଁଣ୍ଠାଳ ଫିଟାଯିବ। ସେଠାରେ ମହାପ୍ରଭୁଙ୍କୁ ବନ୍ଦାପନା କରାଯିବ। ମହାଲକ୍ଷ୍ମୀଙ୍କୁ ରସଗୋଲା ଖୁଆଇ ମାନଭଞ୍ଜନ କରାଇବେ ମହାପ୍ରଭୁ। ଏହାପରେ କାଳିଆ ଠାକୁର ରତ୍ନସିଂହାସନକୁ ବିଜେ କରିବେ।

Powered by Froala Editor