କପ୍ତିପଦା: ପ୍ରେମିକଙ୍କୁ ସ୍ବାମୀ ଭାବେ ପାଇବାକୁ ଧର୍ମ ପରିବର୍ତ୍ତନ କରିଛନ୍ତି ପ୍ରେମିକା। ଏଥିପାଇଁ ସଂପୃକ୍ତ ଯୁବତୀଙ୍କୁ ସାନ୍ତାଳୀ ପରମ୍ପରା ଅନୁସାରେ ପୁନଃ ଜନ୍ମ ପ୍ରଥା ମାନିବାକୁ ପଡ଼ିଛି। ଗ୍ରାମର ଏକ ଉଇ ହୁଙ୍କା ଭିତରେ ପଶି ବାହାରିବା ପରେ ଏକ ନବଜାତ ଶିଶୁ ଭଳି ତାଙ୍କର ସମସ୍ତ ନିୟମ କରାଯାଇଥିଲା। ତାଙ୍କର ନାଭି କଟା ଯିବା ସହିତ ଗଙ୍ଗା ଓ ହଳଦୀ ପାଣିରେ ଗାଧୋଇ ଦିଆଯାଇଥିଲା। ପରେ ଗ୍ରାମ ଠାକୁରଙ୍କୁ ପୂଜାର୍ଚ୍ଚନା କରି ସାନ୍ତାଳୀ ପରମ୍ପରାରେ ସାମିଲ ହୋଇଥିଲେ। ଆଉ ତା’ ପରେ ହେଲା ବିବାହ। ପଡ଼ିଲା ଉଭୟଙ୍କ ହାତଗଣ୍ଠି। ମୟୂରଭଞ୍ଜ ଜିଲା କପ୍ତିପଦା ଥାନା ମଝିଗଡ଼ିଆ ପଞ୍ଚାୟତ ମଇଁଷିଡୁବା ଗ୍ରାମରେ ଘଟିଛି ଏହି ଘଟଣା।
ଖବର ଅନୁସାରେ ଗ୍ରାମର ପାଣ୍ଡୁ ସୋରେନଙ୍କ ପୁଅ ରତନ ସୋରେନ ଭୁବନେଶ୍ୱରର ଏକ ଘରୋଇ କମ୍ପାନୀରେ ରହି କାମ କରୁଥିଲେ। ସେଠାରେ ଜାନକୀ ହାଁସଦା ନାମକ ଯୁବତୀଙ୍କ ପ୍ରେମରେ ପଡ଼ିଥିଲେ। ଉଭୟ ବିବାହ କରିବାକୁ ମନସ୍ଥ କରି ପ୍ରେମିକାକୁ ସାଙ୍ଗରେ ଧରି ଗାଁରେ ପହଞ୍ଚି ଥିଲେ ରତନ ସୋରେନ। ଉଭୟ ପ୍ରେମ କରୁଥିବା ଏବଂ ବିବାହ କରିବାକୁ ମନସ୍ଥ କରିଥିବା ଜାଣିବା ପରେ ପରିବାର ଲୋକ ଗ୍ରହଣ କରିଥିଲେ। ହେଲେ ଯୁବତୀଙ୍କ ସହିତ କଥା ହେବା ପରେ ସେ ଖ୍ରୀଷ୍ଟିଆନ ଧର୍ମର ହୋଇଥିବା ଗ୍ରାମବାସୀ ଜାଣିବାକୁ ପାଇଥିଲେ। ଯାହାକୁ ନେଇ ଗ୍ରାମ ମୁଖିଆ ଏକ ବୈଠକ ଡକାଇଥିଲେ ଏବଂ ବିବାହ କରିବାକୁ ହେଲେ ଧର୍ମ ପରିବର୍ତ୍ତନ କରିବାକୁ ପଡ଼ିବ ବୋଲି ନିଷ୍ପତ୍ତି ହୋଇଥିଲା। ଧର୍ମ ପରିବର୍ତ୍ତନ କରି ସାନ୍ତାଳୀ ଧର୍ମକୁ ଆସିବା ପାଇଁ ଜାନକୀ ପରମ୍ପରା ଅନୁସାରେ ପୁନଃ ଜନ୍ମ ପ୍ରଥା ପାଳନ କରିଥିଲେ।

Powered by Froala Editor