ତାମିଲନାଡ଼ୁ ଗ୍ୟାସ୍ ଲିକ୍ ଅଘଟଣ: ଆଜି ପୁଣି ଜଣେ ଜୁଆଙ୍ଗ ଯୁବତୀଙ୍କ ମୃତ୍ୟୁ
ତେଲକୋଇ : ତାମିଲନାଡ଼ୁର ତିରୁଭଲ୍ଲୁର ଜିଲା ପେରିୟାପାଲାୟମ୍ ନିକଟରେ ଥିବା ସାମୁଦ୍ରିକ ଖାଦ୍ୟ ପ୍ରକ୍ରିୟାକରଣ ଓ ରପ୍ତାନି କାରଖାନାରେ ଆମୋନିଆ ଗ୍ୟାସ ଲିକ୍ ଘଟଣାରେ ଆଉ ଜଣେ ଜୁଆଙ୍ଗ ଯୁବତୀଙ୍କ ମୃତ୍ୟୁ ହୋଇଛି। ମୃତ ଯୁବତୀ ଜଣଙ୍କ କେନ୍ଦୁଝର ଜିଲା ତେଲକୋଇ ବ୍ଲକ ବିମଳା ପଞ୍ଚାୟତ ଟାଙ୍ଗିରି ଦୁବନଳି ସାହିର ପୀତାମ୍ବର ଜୁଆଙ୍ଗଙ୍କ ଝିଅ ରିତା ଜୁଆଙ୍ଗ ବୋଲି ଜଣାପଡ଼ିଛି। ଏହି ଅଘଟଣରେ ବୁଧବାର ସୁଦ୍ଧା କେନ୍ଦୁଝରର ୮ଜଣ ଯୁବତୀଙ୍କ ମୃତ୍ୟୁ ହୋଇଥିଲା ବେଳେ ଆଜି ମୃତ୍ୟୁ ସଂଖ୍ୟା ୯ରେ ପହଞ୍ଚିଛି।
ଟାଙ୍ଗିରି ଗ୍ରାମର ୫ଜଣ ଯୁବତୀ ତାମିଲନାଡ଼ୁ ଯାଇଥିବା ବେଳେ ଏବେ ସୁଦ୍ଧା ୩ ଜଣଙ୍କ ମୃତ୍ୟୁ ହୋଇଛି। ଜଣେ ଚିକିତ୍ସିତ ହେଉଥିବା ବେଳେ ଆଉ ଜଣେ ସୁସ୍ଥ ଥିବା ଜଣାପଡ଼ିଛି। ବୁଧବାର ତାମିଲନାଡ଼ୁରୁ ୫ଟି ମୃତଦେହ ଆସିଥିଲା ବେଳେ ଗୁରୁବାର ସକାଳେ ଆଉ ଦୁଇଟି ମୃତଦେହ ତେଲକୋଇ ବ୍ଲକ ରଙ୍ଗମାଟିଆ ଗାଁ ଓ ବାଂଶପାଳ ବ୍ଲକ କୁଡ଼ିପଶା ଗ୍ରାମରେ ପହଞ୍ଚିଥିଲା। ସକାଳୁ ଦୁଇଗାଁରେ ଶୋକାକୁଳ ପରିବେଶରେ ଶବ ସତ୍କାର ହୋଇଥିଲା। ତେବେ ଦୁଇ ଯୁବତୀଙ୍କ ଜୁଇରୁ ନିଆଁ ଲିଭିନଥିବା ବେଳେ ଆଜି ପୁଣି ଜଣେ ଜୁଆଙ୍ଗ ଯୁବତୀଙ୍କ ମୃତ୍ୟୁ ଘଟଣା ସାରା ଜିଲାକୁ ସ୍ତବ୍ଧ କରିଦେଇଛି।
Powered by Froala Editor
