ଭୁବନେଶ୍ୱର : ପୁଣି ଇସ୍କନର ମନମାନି। ବିରୋଧ ସତ୍ତ୍ୱେ ବିଦେଶରେ ମହାପ୍ରଭୁଙ୍କ ଅଦିନିଆ ରଥଯାତ୍ରା ଆୟୋଜନ କରୁଛି ଇସ୍କନ। ଆମେରିକାର ନ୍ୟୁୟର୍କ ସହରରେ ଶନିବାର ଇସ୍କନ ପକ୍ଷରୁ ୫୦ତମ ରଥଯାତ୍ରା ପାଳନ କରାଯାଇଛି। ବିଶ୍ବବ୍ୟାପୀ ଜଗନ୍ନାଥପ୍ରେମୀ ଓ ଶ୍ରଦ୍ଧାଳୁ ଅ-ତିଥିରେ ରଥଯାତ୍ରା ଆୟୋଜନକୁ ବିରୋଧ କରିବା ସହ ପ୍ରତିବାଦ ଜଣାଇଥିଲେ ବି ଇସ୍କନ କର୍ତ୍ତୃପକ୍ଷ ମାନୁନାହାନ୍ତି। ଏହାକୁ ନେଇ ଜଗନ୍ନାଥ ସଂସ୍କୃତି ବିଶେଷଜ୍ଞ ଓ ଭକ୍ତଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।

 ନ୍ୟୁୟର୍କରେ ଅଦିନିଆ ରଥଯାତ୍ରା ନ କରିବାକୁ ବିଶ୍ୱର ବିଭିନ୍ନ ପ୍ରାନ୍ତରେ ଥିବା ଜଗନ୍ନାଥପ୍ରେମୀ ଏବଂ ବୁଦ୍ଧିଜୀବୀଙ୍କ ପକ୍ଷରୁ ମିଳିତ ଭାବେ ନ୍ୟୁୟର୍କ ଇସ୍କନ ମନ୍ଦିରର ସଭାପତିଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଥିଲା।

ଏଥିରେ ଦର୍ଶାଯାଇଥିଲା ଯେ, ଇସ୍କନ ପ୍ରତିଷ୍ଠାତା ଶ୍ରୀଳ ପ୍ରଭୁପାଦଙ୍କ ଜୀବନକାଳ ମଧ୍ୟରେ ସମସ୍ତ ମୁଖ୍ୟ ରଥଯାତ୍ରା ନିର୍ଦ୍ଧାରିତ ତିଥି କିମ୍ବା ପବିତ୍ର ନବଦିନାତ୍ମକ ଯାତ୍ରା ସମୟ ମଧ୍ୟରେ ହିଁ ଅନୁଷ୍ଠିତ ହେଉଥିଲା। ବ୍ୟବସ୍ଥାଗତ ଆହ୍ୱାନ ସତ୍ତ୍ୱେ ଆଧ୍ୟାତ୍ମିକ ସଂହତି ରକ୍ଷା କରିବା ପାଇଁ ରଥଯାତ୍ରାକୁ ଜୁଲାଇ ୧୬ରୁ ୨୪ (ବାହୁଡ଼ା ଯାତ୍ରା) ମଧ୍ୟରେ ଆୟୋଜନ କରିବାକୁ ଅନୁରୋଧ କରାଯାଇଥିଲା। ହେଲେ ଏହାକୁ ନ ମାନି ଇସ୍କନ ପକ୍ଷରୁ ଶନିବାର ନ୍ୟୁୟର୍କରେ ଅଦିନିଆ ରଥଯାତ୍ରା ପାଳନ କରାଯାଇଛି। ଏନେଇ ଜଗନ୍ନାଥପ୍ରେମୀ ଅସନ୍ତୋଷ ପ୍ରକାଶ କରିଛନ୍ତି।

Powered by Froala Editor