ଭୁବନେଶ୍ବର: ପ୍ରଶାନ୍ତ ମହାସାଗରରେ ଏଲ୍-ନିନୋ ଜଳବାୟୁ ପ୍ରକ୍ରିୟା ଆରମ୍ଭ ହୋଇଛି। ଗୁରୁବାର ଏନ୍ଓଏଏ, ୟୁଏସ୍ଏ ପକ୍ଷରୁ ଏହାର ଆଗମନ ସମ୍ପର୍କରେ ଘୋଷଣା କରାଯାଇଛି। ୨୦୨୬ ନଭେମ୍ବରରୁ ୨୦୨୭ ଜାନୁଆରୀ ମଧ୍ୟରେ ଏଲ୍-ନିନୋର ସର୍ବାଧିକ ପ୍ରଭାବ ରହିପାରେ ବୋଲି ୬୩%ସମ୍ଭାବନା ରହିଛି। ଯାହା ୧୯୫୦ ମସିହା ଏଲ୍-ନିନୋ ଭଳି ରହିବ ବୋଲି ପାଣିପାଗ ବିଶେଷଜ୍ଞମାନେ ପୂର୍ବାନୁମାନ କରିଛନ୍ତି। ପାଣିପାଗ ମଡେଲ ଇସିଏମଡବ୍ଲ୍ୟୁଏଫ୍ ପ୍ରଶାନ୍ତ ମହାସାଗରରେ ଏଲ୍-ନିନୋ ପ୍ରକ୍ରିୟା ଆରମ୍ଭ ହୋଇଥିବା ନେଇ ସ୍ପଷ୍ଟ କରିଛି। ଏହି ମଡେଲ ପୂର୍ବରୁ ମେ ମାସରୁ ଜୁଲାଇ ମଧ୍ୟରେ ଏଲ୍-ନିନୋ ପ୍ରକ୍ରିୟା ଆରମ୍ଭ ହେବା ନେଇ ୮୨% ସମ୍ଭାବନା ଥିବା ଆକଳନ କରିଥିଲା। ପାଣିପାଗ ବିଶେଷଜ୍ଞ ବିଶ୍ବଜିତ ସାହୁ କହିଛନ୍ତି, ପୂର୍ବ ପ୍ରଶାନ୍ତ ମହାସାଗର ଅଞ୍ଚଳରେ ସମୁଦ୍ର ପୃଷ୍ଠ ତାପମାତ୍ରା ଯଦି ସ୍ବାଭାବିକରୁ ୦.୫ଡିଗ୍ରୀ ଅଧିକ ରହେ, ତେବେ ପାଣିପାଗ ସଂସ୍ଥାଗୁଡିକ ଏଲ-ନିନୋ ପ୍ରକ୍ରିୟା ଆରମ୍ଭ ହେଲା ବୋଲି ଘୋଷଣା କରିଥାନ୍ତି। ବର୍ତ୍ତମାନ ପୂର୍ବ ପ୍ରଶାନ୍ତ ମହାସାଗର ଅଞ୍ଚଳରେ ସମୁଦ୍ର ପୃଷ୍ଠ ତାପମାତ୍ରା ୦.୫ ଡିଗ୍ରୀ ଅଧିକ ରହିଛି। ଏହାର ପ୍ରଭାବ ପଶ୍ଚିମ ପ୍ରଶାନ୍ତ ମହାସାଗର ଉପରେ ପଡିଥାଏ। ପଶ୍ଚିମ ପ୍ରଶାନ୍ତ ମହାସାଗର ଜଳବାୟୁ ପ୍ରକ୍ରିୟା ସିଧାସଳଖ ବଙ୍ଗୋପସାଗର ଉପରେ ପଡିଥାଏ।

ବଙ୍ଗୋପସାଗରରେ ଲଘୁଚାପ ସୃଷ୍ଟି ହେଲେ ଦେଶର ପୂର୍ବାଞ୍ଚଳ ରାଜ୍ୟଗୁଡିକରେ ବର୍ଷା ହୁଏ। ପ୍ରଶାନ୍ତ ମହାସାଗରରେ ଏଲ-ନିନୋ ପ୍ରଭାବ ରହିବା ଦ୍ବାରା ବଙ୍ଗୋପସାଗରରେ କମ ସଂଖ୍ୟକ ଲଘୁଚାପ କ୍ଷେତ୍ର ସୃଷ୍ଟି ହେବା ସମ୍ଭାବନା ରହିଛି। ତେଣୁ ପୂର୍ବାଞ୍ଚଳ ରାଜ୍ୟଗୁଡିକରେ ଲଘୁଚାପ ଜନିତ କମ ବର୍ଷା ହୋଇପା‌େର। ଚଳିତ ବର୍ଷ ମୌସୁମି ନିଷ୍କ୍ରିୟତା ଅବଧି ଦିନ ଅଧିକ ରହିବ। ଅନ୍ୟପକ୍ଷରେ ଆସନ୍ତା ୨ରୁ ୩ଦିନ ମଧ୍ୟରେ ଦକ୍ଷିଣ-ପଶ୍ଚିମ ମୌସୁମି ବାୟୁ ଓଡ଼ିଶା ଛୁଇଁବା ସମ୍ଭାବନା ରହିଛି। ବର୍ତ୍ତମାନ ମୌସୁମୀ କର୍ଣ୍ଣାଟକ, ତେଲଙ୍ଗାନା, ଆନ୍ଧ୍ରପ୍ରଦେଶ, ତାମିଲନାଡୁ ପାର ହୋଇ ପଶ୍ଚିମବଙ୍ଗ ଓ ବିହାରରେ କିଛି ଅଂଶ ଛୁଇଁଛି। ଆଗାମୀ ୨ରୁ ୩ ଦିନରେ ମୌସୁମୀ ଆଗକୁ ବଢ଼ି ଓଡ଼ିଶା, ଛତିଶଗଡ଼, ଝାଡ଼ଖଣ୍ଡ ଓ ଉତ୍ତର ପ୍ରଦେଶର କିଛି ଅଂଶରେ ପହଞ୍ଚିବା ପାଇଁ ପାଗ ଅନୁକୂଳ ଅଛି। ଜୁନ୍ ୧୩ରୁ ୩ଦିନ ପର୍ଯ୍ୟନ୍ତ ଦକ୍ଷିଣ ଓଡ଼ିଶାର କିଛି ଅଞ୍ଚଳରେ ପ୍ରବଳ ବର୍ଷା ସମ୍ଭାବନା ରହିଛି। ଜୁନ୍ ୧୬ ପର୍ଯ୍ୟନ୍ତ କାଳବୈଶାଖୀ ଜନିତ ବର୍ଷା ପବନ ହୋଇପାରେ। ୧୬ରୁ ୧୮ ଯାଏ କାଳବୈଶାଖୀ ଦୁର୍ବଳ ରହିବ। ଏହା ହିଁ ମୌସୁମୀ ପ୍ରବେଶର ସବୁଠୁ ବଡ଼ ସଙ୍କେତ ବୋଲି କୁହାଯାଉଛି। ୧୮ ଜୁନ୍ ପରେ ବି ସେପରି କୌଣସି ପରିବର୍ତ୍ତନ ହେବ ନାହିଁ। ଅର୍ଥାତ୍ ପାଗ ସ୍ଥିର ରହିବ, ଯାହା ମୌସୁମି ବର୍ଷା ପାଇଁ ରାସ୍ତା ଖୋଲିବ। ଏବେ ପ୍ରାକ୍ ମୌସୁମି ବର୍ଷା ଚାଲିଛି। କିନ୍ତୁ ଜୁନ୍ ୧୬ ବେଳକୁ ଦକ୍ଷିଣ-ପଶ୍ଚିମ ମୌସୁମି ଦକ୍ଷିଣ ଓଡ଼ିଶା ଛୁଇଁପାରେ। ଗୁରୁବାର ରାଜ୍ୟର ୧୦ଟି ସ୍ଥାନରେ ସର୍ବାଧିକ ତାପମାତ୍ରା ୪୦ଡିଗ୍ରୀ କିମ୍ବା ଏହାଠାରୁ ଅଧିକ ରହିଛି। 

Powered by Froala Editor