ଭୁବନେଶ୍ବର : ‘ପୁଅକୁ ହତ୍ୟା କରାଯାଇଛି, କିନ୍ତୁ ପୁଲିସ ଏହାକୁ ସାଧାରଣ ଘଟଣାର ରୂପ ଦେବାକୁ ଚେଷ୍ଟା କରୁଛି। ରାଜ୍ୟ ପୁଲିସ ଉପରେ ଭରସା ନାହିଁ। ଆମେ ନ୍ୟାୟ ଚାହୁଁ ଏବଂ ଏଥିପାଇଁ ସିବିଆଇ ତଦନ୍ତ ହେଉ’ କହିଛନ୍ତି ଜିଆର୍‌ପି କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁଙ୍କ ମା’। ପୁଲିସ ଓ କ୍ରାଇମବ୍ରାଞ୍ଚ କାର୍ଯ୍ୟାନୁଷ୍ଠାନରେ ଅସନ୍ତୋଷ ପ୍ରକାଶ କରି ସୌମ୍ୟଙ୍କ ପରିବାର ଲୋକେ ଏବେ କେନ୍ଦ୍ରୀୟ ତଦନ୍ତକାରୀ ସଂସ୍ଥା (ସିବିଆଇ) ଦ୍ୱାରା ଘଟଣାର ତଦନ୍ତ ପାଇଁ ଦୃଢ଼ ଦାବି କରିଛନ୍ତି।

ବାଲିଅନ୍ତାରେ ସୌମ୍ୟ ହତ୍ୟାକାଣ୍ଡ ଘଟଣାକୁ ଇତିମଧ୍ୟରେ ୧୦ ଦିନ ବିତି ଯାଇଛି। ତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଛି ନା ଯୁବତୀଙ୍କୁ ଅସଦାଚରଣ କରିବା ଅଭିଯୋଗରେ ଉତ୍ତ୍ୟକ୍ତ ଲୋକଙ୍କ ମାଡ଼ରେ ହଠାତ୍‌ ତାଙ୍କ ମୃତ୍ୟୁ ଘଟିଛି ସେନେଇ ତଦନ୍ତକାରୀ ସଂସ୍ଥା ଏବେସୁଦ୍ଧା ପରଦା ହଟାଇ ପାରୁନି। ଯୋଜନାବଦ୍ଧ ଭାବେ ସୌମ୍ୟଙ୍କୁ ହତ୍ୟା କରାଯାଇଥିବା ତାଙ୍କ ବାପା ଦୁଃଶାସନ ସ୍ବାଇଁ ବାରମ୍ବାର ଅଭିଯୋଗ କରି ଆସୁଛନ୍ତି। ଏପରିସ୍ଥଳେ ମାମଲାର ସିବିଆଇ ତଦନ୍ତ କରାଯିବା ଲାଗି ମୃତକଙ୍କ ପରିବାର ଲୋକ ଦାବି କରିଛନ୍ତି। ଯଦି ତଦନ୍ତ ଭାର ସିବିଆଇକୁ ହସ୍ତାନ୍ତର କରାନଯାଏ, ତେବେ ଆଗାମୀ ଦିନରେ ଆମେ ରାଜରାସ୍ତାକୁ ଓହ୍ଲାଇବୁ ବୋଲି ମୃତକଙ୍କ ପରିବାର ଚେତାବନୀ ଦେଇଛନ୍ତି। ଘଟଣାଦିନ ତାଙ୍କ ସାଙ୍ଗରେ ଥିବା ଗାଁ ପିଲା ଓମ୍‌ ପ୍ରକାଶର ଭୂମିକାକୁ ନେଇ ସୌମ୍ୟଙ୍କ ପରିବାର ସନ୍ଦେହ ପ୍ରକଟ କରିଛନ୍ତି। ଗୋଟିଏ ଫୋନ୍‌ କରିଥିଲେ, ଗାଁ ଲୋକ ସେଠାରେ ପହଞ୍ଚି ପାରିଥାନ୍ତେ ବୋଲି ମୃତକଙ୍କ ମା’ କହିଛନ୍ତି। କ୍ରାଇମବ୍ରାଞ୍ଚ ସ୍କାନରରେ ମଧ୍ୟ ଓମ୍‌ ପ୍ରକାଶ ରହିଛନ୍ତି। ଘର ଛାଡ଼ି କେଉଁଆଡ଼େ ନଯିବା ଲାଗି ତଦନ୍ତକାରୀ ସଂସ୍ଥା ଓମ୍‌ ପ୍ରକାଶଙ୍କୁ ନିର୍ଦେଶ ଦେଇଥିବା ଚର୍ଚ୍ଚା ହେଉଛି।

ମାମଲାର ତଦନ୍ତ ଭାର କ୍ରାଇମବ୍ରାଞ୍ଚ ନେଇଛି। ୩୦ରୁ ଅଧିକ ହତ୍ୟାକାଣ୍ଡରେ ସମ୍ପୃକ୍ତ ଥିବା ପ୍ରଘଟ ଭିଡ଼ିଓରେ ଜଳଜଳ ଦିଶୁଛି। ଏପରିସ୍ଥଳେ କ୍ରାଇମବ୍ରାଞ୍ଚ ଅଭିଯୁକ୍ତଙ୍କ ବିରୋଧରେ ଭିଡ଼ ଜନିତ ହତ୍ୟା ଦଫା ନଲଗାଇବା ଘଟଣାକୁ ରହସ୍ୟାବୃତ୍ତ କରିଛି। ଏହି ଘଟଣାକୁ ଭିଡ଼ ହତ୍ୟା ବୋଲି ଗ୍ରହଣ ନ କରାଯିବା, ଫେରାର ଅଭିଯୁକ୍ତଙ୍କୁ ଧରିବାରେ ବିଫଳ ହେବା ଏବଂ ହତ୍ୟାକାଣ୍ଡ ପଛର ପ୍ରକୃତ କାରଣ ଉପରୁ ପରଦା ହଟାଇ ନପାରିବାକୁ ନେଇ ମୃତକଙ୍କ ପରିବାର କ୍ରାଇମବ୍ରାଞ୍ଚ ତଦନ୍ତ ଉପରେ ସ‌େ‌ନ୍ଦହ ପ୍ରକଟ କରିଛନ୍ତି। ପରିବାର ପକ୍ଷରୁ ଏହାକୁ ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଅଭିଯୋଗ କରାଯାଉଥିବା ବେଳେ କ୍ରାଇମବ୍ରାଞ୍ଚ ଏପର୍ଯ୍ୟନ୍ତ କୌଣସି ସଠିକ ନିଷ୍କର୍ଷରେ ପହଞ୍ଚି ପାରିନାହିଁ। ମାମଲାର ତଦନ୍ତରେ ବିଳମ୍ବ ହେବା ଦ୍ବାରା ଅନେକ ଗୁରୁତ୍ୱପୂର୍ଣ୍ଣ ପ୍ରମାଣ ନଷ୍ଟ ହେବା ଅଭିଯୋଗ ହୋଇଛି। ଯାହାଫଳରେ ଅଭିଯୁକ୍ତ ବିରୋଧରେ କଠୋର ଦଣ୍ଡବିଧାନ ଗ୍ରହଣ କରାଯିବାରେ ବାଧା ସୃଷ୍ଟି ହେବ ବୋଲି ମୃତକଙ୍କ ମାମୁ ଅଭିଯୋଗ ଆଣିଛନ୍ତି। 

Powered by Froala Editor