ବଙ୍ଗଳାରେ ନୂଆ ସରକାର ଗଠନ ହେବା ପରେ, ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଶୁକ୍ରବାର ହାଇପ୍ରୋଫାଇଲ ଆର.ଜି. କର ମାମଲା ସମ୍ପର୍କରେ ସବୁଠାରୁ ଗୁରୁତ୍ୱପୂର୍ଣ୍ଣ କାର୍ଯ୍ୟାନୁଷ୍ଠାନ ଆରମ୍ଭ କରିଛନ୍ତି। କୋଲକାତା ପୁଲିସ କମିସନର ବିନୀତ ଗୋୟଲ ଏବଂ ଅନ୍ୟ ୨ ଆଇପିଏସ୍‌ ଅଫିସର ଇନ୍ଦିରା ମୁଖାର୍ଜୀ ଏବଂ ଅଭିଷେକ ଗୁପ୍ତାଙ୍କୁ ନିଲମ୍ବନ କରିଛନ୍ତି। ନବାନ୍ନରେ ଏକ ସାମ୍ବାଦିକ ସମ୍ମୀଳନୀରେ ଉଦ୍‌ବୋଧନ ଦେଇ ଅଧିକାରୀ କହିଛନ୍ତି, ମୁଁ ଆର୍‌ଜି କର ଘଟଣାରେ ପୁଲିସ କ’ଣ କାର୍ଯ୍ୟାନୁଷ୍ଠାନ ଗ୍ରହଣ କରିଛି ତାହା ଜାଣିବାପାଇଁ ଗୃହ ସଚିବ ଏବଂ କୋଲକାତା ପୁଲିସ କମିସନରଙ୍କଠାରୁ ରିପୋର୍ଟ ମାଗିଥିଲି। 

ଶୁଭେନ୍ଦୁ ସମସ୍ତ ତିନି ଜଣ ଆଇପିଏସ ଅଧିକାରୀଙ୍କ ବିରୁଦ୍ଧରେ ବିଭାଗୀୟ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ବଙ୍ଗଳାର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ କହିଛନ୍ତି ଯେ ସରକାର କୋଲକାତାର ପୂର୍ବତନ ସିପି ବିନୀତ ଗୋୟଲ ଏବଂ ଅନ୍ୟ ଦୁଇ ଅଧିକାରୀଙ୍କ ବିରୁଦ୍ଧରେ ଆର.ଜି. କର ମାମଲାରେ ଏକ ବିଭାଗୀୟ ତଦନ୍ତ ଆରମ୍ଭ କରିବେ।

ସାମ୍ପ୍ରତିକ ନିର୍ବାଚନରେ, ପୀଡିତାଙ୍କ ମାଆ ପ୍ରତିଦ୍ୱନ୍ଦ୍ୱିତା କରି ଏକ ଆସନ ଜିତିଥିଲେ ଏବଂ ଏହି ପ୍ରସଙ୍ଗ ଏକ ପ୍ରମୁଖ ରାଜନୈତିକ ଆଲୋଚନାର ବିଷୟ ଭାବରେ ଉଭା ହୋଇଥିଲା। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଏହି ଘଟଣାର ତଦନ୍ତ ପାଇଁ ଏକ କମିଶନ ଗଠନ କରିବାକୁ ପୂର୍ବରୁ ତାଙ୍କର ଅଭିପ୍ରାୟ ପ୍ରକାଶ କରିଥିଲେ; ଏ ସମ୍ପର୍କରେ ଏକ ଆନୁଷ୍ଠାନିକ ଘୋଷଣା ଏବେ ଅପେକ୍ଷା କରାଯାଇଛି।

ଅଧିକାରୀ କହିଛନ୍ତି, ଉକ୍ତ ଅଫିସରମାନଙ୍କୁ ଏମିତି କରିବାପାଇଁ କୌଣସି ମୁଖ୍ୟମନ୍ତ୍ରୀ କିମ୍ବା ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ତାହା ଜାଣିବାପାଇଁ ଆମେ ସମସ୍ତ ଫୋନ୍‌ କଲ ରେକର୍ଡ ଏବଂ ହ୍ବାଟ୍ସଆପ ଚାଟ୍‌ ଚେକ୍‌ କରିବୁ। ଶୁଭେନ୍ଦୁ କହିଛନ୍ତି, ବର୍ତ୍ତମାନ ଏଡିଜି ଥିବା ଗୋୟଲ ଏବଂ ଅନ୍ୟ ୨ ଅଧିକାରୀ ଇନ୍ଦିରା ମୁଖାର୍ଜୀ ଏବଂ ଅଭିଷେକ ଗୁପ୍ତାଙ୍କୁ ଆମେ ନିଲମ୍ବନ କରୁଛୁୂ।

Powered by Froala Editor