ନୂଆଦିଲ୍ଲୀ : ବ୍ୟାଙ୍କଗୁଡ଼ିକ ଦେବାଳିଆ ତଥା ବୁଡ଼ିଯିବା ଖବର କିଛି ବର୍ଷ ହେବ ବଢ଼ିଚାଲିଛି । ଏଭଳି କ୍ଷେତ୍ରରେ ଗ୍ରାହକଙ୍କୁ ସୁରକ୍ଷା ଦେବା ତଥା ବ୍ୟାଙ୍କିଙ୍ଗ ବ୍ୟବସ୍ଥା ଉପରେ ସେମାନଙ୍କ ଭରସା ଅତୁଟ ରଖିବା ପାଇଁ ଏକ ବଡ ନିଷ୍ପତ୍ତି ନେଇଛି କେନ୍ଦ୍ର କ୍ୟାବିନେଟ । ଏବେ ବ୍ୟାଙ୍କ ବନ୍ଦ ହୋଇଗଲେ କିମ୍ବା ବୁଡ଼ିଗଲେ ଗ୍ରାହକଙ୍କ ୫ ଲକ୍ଷ ଟଙ୍କା ପର୍ଯ୍ୟନ୍ତ ଜମାରାଶି ସୁରକ୍ଷିତ ରହିବ । ଅର୍ଥାତ ଏଭଳି ସ୍ଥିତିରେ ଗ୍ରାହକଙ୍କୁ ନିଶ୍ଚିତ ଭାବେ ସେମାନଙ୍କ ଜମାର ୫ ଲକ୍ଷ ଙ୍କା ପର୍ଯ୍ୟନ୍ତ ରାଶି ମିଳିବ । ଜମାକାରୀଙ୍କୁ ୯୦ ଦିନ ମଧ୍ୟରେ ଏହି ରାଶି ମିଳିଯିବ । ଏ ସଂକ୍ରାନ୍ତ ଏକ ପ୍ରସ୍ତାବକୁ ମଞ୍ଜୁରୀ ମିଳିଛି । ବୁଧବାର ଡିପୋଜିଟ ଇନ୍ସୁ୍ୟରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେସନ ଆକ୍ଟ (ଡିଆଇସିଜିସି) ସଂଶୋଧନ ବିଲରେ କ୍ୟାବିନେଟ ମୋହର ବାଜିଛି । ସଂଶୋଧିତ ୍ରଆଇନ ଅନୁସାରେ କୌଣସି ପ୍ରକାର ପ୍ରତିକୂଳ ପରିସ୍ଥିତିରେ ଜମାକାରୀଙ୍କ ୫ ଲକ୍ଷ ଟଙ୍କା ପର୍ଯ୍ୟନ୍ତ ରାଶି ସୁରକ୍ଷିତ ରହିବ । ବର୍ତ୍ତମାନ ସୁଦ୍ଧା ଏହି ସୀମା ୧ ଲକ୍ଷ ଟଙ୍କା ଥିଲା । ସଦ୍ୟ ନିଷ୍ପତ୍ତି ୨୦୨୦ ଫେବୃୟାରୀ ୪ ରୁ ପିଛିଲା ଭାବେ ଲାଗୁ ହେବ । ଅର୍ଥାତ ପିଏମସି, ଲକ୍ଷ୍ମୀ ବିଳାସ ବ୍ୟାଙ୍କ ଏବଂ ୟେସ ବ୍ୟାଙ୍କ ଗ୍ରାହକଙ୍କୁ ବି ଏହାର ଫାଇଦା ମିଳିବ ।

Powered by Froala Editor