ଭୁବନେଶ୍ବର: ତାତିରେ ଆଉଟୁପାଉଟୁ ହେଉଛି ପଶ୍ଚିମ ଓଡ଼ିଶା। ମଙ୍ଗଳବାର ଝାରସୁଗୁଡ଼ାରେ ପାରଦ ୪୩.୬ ଡିଗ୍ରୀ ଛୁଇଁଥିବାବେଳେ ସମ୍ବଲପୁର, ଟିଟିଲାଗଡ଼ରେ ୪୨.୫, ଅନୁଗୋଳରେ ୪୨.୧, ସୁନ୍ଦରଗଡ଼ରେ ୪୧.୫, ହୀରାକୁଦରେ ୪୨.୪, ତାଳଚେରରେ ୪୧.୫, ଭବାନୀପାଟଣାରେ ୪୦.୫, ବଲାଙ୍ଗିରରେ ୪୨.୨, ସୁବର୍ଣ୍ଣପୁରରେ ୪୧.୭, ନୟାଗଡ଼ରେ ୪୦, ବୌଦ୍ଧରେ ୪୦.୭, ଭଦ୍ରକରେ ୪୦, ଢେଙ୍କାନାଳରେ ୪୧, ଖୋରଧାରେ ୪୦, ରାଉରକେଲାରେ ୪୧, ଭୁବନେଶ୍ବରରେ ୩୭.୯ ଏବଂ କଟକରେ ୩୮.୮ଡିଗ୍ରୀ ରହିଛି। ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ଆସନ୍ତା ୪ଦିନ ପର୍ଯ୍ୟନ୍ତ ସର୍ବାଧିକ ତାପମାତ୍ରାରେ ବିଶେଷ ପରିବର୍ତ୍ତନ ଆସିବାର ସମ୍ଭାବନା ନାହିଁ। ପରବର୍ତ୍ତୀ ସମୟରେ ଦିନ ତାପମାତ୍ରା ୨ରୁ ୩ଡିଗ୍ରୀ ପର୍ଯ୍ୟନ୍ତ ହ୍ରାସ ପାଇପାରେ। ବୁଧବାର ବଲାଙ୍ଗିର ଏବଂ ଟିଟିଲାଗଡ଼ରେ ପାରଦ ୪୫ଡିଗ୍ରୀ ଟପିବା ସମ୍ଭାବନା ରହିଛି।

ଉପକୂଳବର୍ତ୍ତୀ ଓଡ଼ିଶାକୁ ଛାଡ଼ି ଦେଲେ ବାକି ସବୁଠି ଦିନ ତାପମାତ୍ରା ବୃଦ୍ଧି ପାଇବ। ଏପରିକି ଦକ୍ଷିଣ ଓଡ଼ିଶାର ମାଲକାନଗିରିରେ ପାରଦ ୪୨ ଡିଗ୍ରୀ ଟପିବା ସମ୍ଭାବନା ଥିବାବେଳେ ନବରଙ୍ଗପୁର, ଭବାନୀପାଟଣା, ନୂଆପଡ଼ା, ରାୟଗଡ଼ାରେ ପାରଦ ୪୨ଡିଗ୍ରୀ ପାଖାପାଖି ରହିପାରେ। ମଙ୍ଗଳବାର ଅପରାହ୍ଣରେ କୋରାପୁଟ, ନବରଙ୍ଗପୁର, ପାରଳାଖେମୁଣ୍ଡି, ମାଲକାନଗିରି ଜିଲାରେ ବିଜୁଳି, ଘଡ଼ଘଡ଼ି ସହିତ ବର୍ଷା ହୋଇଛି। ଆସନ୍ତା ୨୪ଘଣ୍ଟା ମଧ୍ୟରେ ମୟୂରଭଞ୍ଜ, କେନ୍ଦୁଝର, ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ପୁରୀ, ଜଗତସିଂହପୁର, ଖୋରଧା, ନୟାଗଡ଼, ଗଞ୍ଜାମ, ରାୟଗଡ଼ା, କୋରାପୁଟ, ମାଲକାନଗିରି ଏବଂ ଗଜପତି ଜିଲାକୁ କାଳବୈଶାଖୀ ପାଇଁ ସତର୍କ ସୂଚନା ଜାରି କରିଛି ପାଣିପାଗ ବିଭାଗ। 

Powered by Froala Editor