ଅମରପାଲି: ଜନଗଣନା କାର୍ଯ୍ୟ କରୁଥିବାବେଳେ ଜଣେ ପ୍ରଧାନଶିକ୍ଷକଙ୍କ ମୃତ୍ୟୁ ଘଟିଛି। ମୃତକ ଜଣକ ହେଲେ ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ଅନ୍ତର୍ଗତ କୋଟସମଲାଇ କ୍ଲଷ୍ଟର ସୁନାପାଲି ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ବଂଶୀଧର ଭୋଇ(୫୫)। ରବିବାର ସତ୍ତ୍ୱେ ବଂଶୀଧର ସରକାରଙ୍କ ନିର୍ଦ୍ଦେଶମତେ ଜନଗଣନା କାର୍ଯ୍ୟ କରିବାକୁ ଯାଇଥିଲେ। ବଂଶୀଧର ଉଲୁଣ୍ଡା ବ୍ଲକ କାଦୋଦର ପଞ୍ଚାୟତ ଅନ୍ତର୍ଗତ ବମରାଜ ଗ୍ରାମର ଅଟନ୍ତି। ସେ ଆଜକୁ ପାଞ୍ଚ ବର୍ଷ ହେଲା ସୁନାପାଲି ୟୁପି ସ୍କୁଲରେ ପ୍ରଧାନଶିକ୍ଷକ ଭାବେ କାର୍ଯ୍ୟ କରି ଆସୁଥିଲେ। ଜନଗଣନା ପାଇଁ ତାଙ୍କୁ କୋଟସମଲାଇ ପଞ୍ଚାୟତର ସୁନାପାଲି ସମେତ ଜଉଁରା ଭଉଁରା ପଞ୍ଚାୟତ ପୁଡ଼ାମାଲ ଓ ଧଉରାଦାଦର ଗ୍ରାମର ଦାୟିତ୍ୱ ଦିଆଯାଇଥିଲା।

ପରିବାର ଲୋକଙ୍କ କହିବା ଅନୁସାରେ, ରବିବାର ପୂର୍ବାହ୍ନରେ ସେ ଘରୁ ବାହାରି ସୁନାପାଲିକୁ ଜନଗଣନା କାର୍ଯ୍ୟ ପାଇଁ ଯାଇଥିଲେ। ତେବେ ସେଠାରେ ଅସୁସ୍ଥତା ଅନୁଭବ କରିବାକୁ ଘରକୁ ଆସିଥିଲେ। ତାଙ୍କୁ ତୁରନ୍ତ ବୀରମହାରାଜପୁର ଉପଖଣ୍ଡ ଚିକିତ୍ସାଳୟକୁ ନିଆଯାଇଥିଲା। ମାତ୍ରେ ସେଠାରେ ତାଙ୍କ ସ୍ବାସ୍ଥ୍ୟ ଗୁରୁତର ଥିବାରୁ ତାଙ୍କୁ ସୋନପୁର ଡାକ୍ତରଖାନାକୁ ନେବା ପାଇଁ ଡାକ୍ତର ପରାମର୍ଶ କରିଥିଲେ। ତାଙ୍କୁ ସୋନପୁର ମେଡିକାଲ ନେବାକୁ ବାହାରିଲା ବେଳକୁ ମୃତ୍ୟୁ ହୋଇଥିଲା। 

Powered by Froala Editor