ହିଙ୍ଗୁଳାଯାତ୍ରାରେ ଛିଣ୍ଡିଗଲା ଡ୍ରାଗନ ଦୋଳି
ତାଳଚେର: ପ୍ରସିଦ୍ଧ ହିଙ୍ଗୁଳାଯାତ୍ରାରେ ରବିବାର ଏକ ବଡଧରଣର ଅଘଟଣ ଘଟିଛି। ଯାତ୍ରାରେ ପଡିଥିବା ଏକ ଡ୍ରାଗନ ଦୋଳି ଛିଡି ପଡିବାରୁ ୪ଜଣ ଗୁରୁତର ହୋଇଛନ୍ତି। ଆହତଙ୍କୁ ପବିତ୍ର ମୋହନ ଡାକ୍ତରଖାନାରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରେ ୩ଜଣ ମହିଳା ଥିବା ଜଣାପଡିଛି। ଦୋଳି ଛିଡି ପଡିବା ପରେ ମେଳା ପଡିଆରେ ଆତଙ୍କ ଖେଳିଯାଇଥିଲା। ଶହଶହ ଦର୍ଶକ ପଡିଆରେ ଦୌଡିବାକୁ ଲାଗିଥିଲେ। ଫଳରେ ଦଳାଚକଟା ଭଳି ପରିସ୍ଥିତି ଉପୁଜିଥିଲା। ମାତ୍ର ସୁରକ୍ଷାକର୍ମୀ ଓ ଅଗ୍ନିଶମ ବାହିନୀ ପହଞ୍ଚି ଆହତଙ୍କୁ ଉଦ୍ଧାର କରି ଡାକ୍ତରଖାନାରେ ତୁରନ୍ତ ଭର୍ତ୍ତି କରିଥିଲେ।
ପ୍ରକାଶଯେ, ତାଳଚେରର ପ୍ରସିଦ୍ଧ ମା’ ହିଙ୍ଗୁଳାଙ୍କ ବାର୍ଷିକ ଯାତ୍ରା ଚାଲିଛି। ଏହି ଯାତ୍ରାରେ ପ୍ରତିଦିନ ସକାଳୁ ରାତି ପର୍ଯ୍ୟନ୍ତ ଲକ୍ଷାଧିକ ଦର୍ଶକ ଓ ଶ୍ରଦ୍ଧାଳୁଙ୍କ ଗହଳି ଲାଗୁଛି। ଯାତ୍ରାରେ ମୀନାବଜାର ସହିତ ଏକାଧିକ ଦୋଳି ପଡିଛି। ଆଜି ଅପରାହ୍ଣରେ ଏକ ଡ୍ରାଗନ ଦୋଳିରେ ୨୦ରୁ ଊର୍ଦ୍ଧ୍ବ ଦର୍ଶକ ବସିଥିଲେ। ଡ୍ରାଗନଟି ଚାଲୁଥିବାବେଳେ ହଠାତ ୧୦ଫୁଟ ତଳକୁ ଗଳିପଡିଥିଲା। ଦୋଳିରେ ବସିଥିବା ସମସ୍ତ ଦର୍ଶକ ତଳକୁ ଖସି ପଡିଥିଲେ। ସେମାନଙ୍କ ମଧ୍ୟରୁ ୪ଜଣ ଗୁରୁତର ହୋଇଛନ୍ତି।
Powered by Froala Editor
