ରାଜ୍ୟସଭା ଉପ-ନେତା ପଦରୁ ହଟାଯିବା ପରେ ଆମ ଆଦମୀ ପାର୍ଟି (ଆପ୍) ନେତୃତ୍ୱ ବିରୋଧରେ ଖୋଲାଖୋଲି ଯୁଦ୍ଧଂଦେହି ଡାକରା ଦେଇଛନ୍ତି ସାଂସଦ ରାଘବ ଚଢ଼ା। ଶନିବାର ଏକ ଭିଡିଓ ବାର୍ତ୍ତା ଜାରି କରି ସେ ନିଜ ଉପରେ ଲଗାଯାଇଥିବା ସମସ୍ତ ଅଭିଯୋଗକୁ ମିଥ୍ୟା ଓ ଭିତ୍ତିହୀନ ବୋଲି ଦର୍ଶାଇବା ସହ ଏହାକୁ ଏକ ''ସୁଚିନ୍ତିତ ଓ ପ୍ରାୟୋଜିତ ଅଭିଯାନ'' ବୋଲି କହିଛନ୍ତି। ପଦରୁ ହଟିବା ପରେ ପ୍ରଥମ ପ୍ରତିକ୍ରିୟା ଦେଇ ଚଢ଼ା ନିଜର ଆଭିମୁଖ୍ୟ ସ୍ପଷ୍ଟ କରିବା ସହ ଫିଲ୍ମ ''ଧୁରନ୍ଧର''ର ସଂଳାପ "ଘାୟଲ୍ ହୁଁ, ଇସଲିଏ ଘାତକ ହୁଁ" କହି ଦଳୀୟ ନେତୃତ୍ୱକୁ ଚେତାବନୀ ଦେଇଛନ୍ତି।

ସମାଜିକ ଗଣମାଧ୍ୟମ “ଏକ୍ସ”ରେ ଏକ ଭିଡିଓ ପୋଷ୍ଟ କରି ସେ ଲେଖିଛନ୍ତି, ମୋ ବିରୁଦ୍ଧରେ ଏକ ସ୍କ୍ରିପ୍ଟ ଲେଖାଥିବା ଅଭିଯାନ ଚାଲିଛି। ସମାନ ଭାଷା, ସମାନ ଶବ୍ଦ, ସମାନ ଅଭିଯୋଗ। ଏହା କୌଣସି ସଂଯୋଗ ନୁହେଁ, ବରଂ ଏକ ସମନ୍ୱିତ ଆକ୍ରମଣ। ପ୍ରଥମେ, ମୁଁ ଭାବିଲି ଯେ ମୋତେ ଉତ୍ତର ଦେବା ଉଚିତ୍ ନୁହେଁ। ତା’ପରେ ମୁଁ ଭାବିଲି ଯେ ଯଦି ଏକ ମିଛକୁ ୧୦୦ଥର ପୁନରାବୃତ୍ତି କରାଯାଏ, ତେବେ କିଛି ଲୋକ ଏହାକୁ ବିଶ୍ୱାସ କରିପାରନ୍ତି। ତେଣୁ ମୁଁ ଜବାବ ଦେବାକୁ ନିଷ୍ପତ୍ତି ନେଇଥିଲି।

ଆମ ଆଦମୀ ପାର୍ଟି ତିନୋଟି ଅଭିଯୋଗ ଆଣିଥିଲା, ଯେଉଁଥିରେ କୁହାଯାଇଥିଲା ଯେ ଏହି ତିନୋଟି ଅଭିଯୋଗ ଯୋଗୁଁ ଦଳ ରାଘବ ଚଢାଙ୍କୁ ସଂସଦରେ କହିବାର ସୁଯୋଗ ଦେବ ନାହିଁ। ପ୍ରଥମ ଅଭିଯୋଗ ହେଉଛି ଯେତେବେଳେ ବିରୋଧୀ ସଂସଦ କକ୍ଷତ୍ୟାଗ କରନ୍ତି ସେତେବେଳେ ରାଘବ ଚଢା ଗୃହରେ ବସି ରୁହନ୍ତି। ଏହା ଏକ ସ୍ପଷ୍ଟ ମିଛ ଅଭିଯୋଗ।

ଦ୍ୱିତୀୟ ଅଭିଯୋଗ ଥିଲା ଯେ ରାଘବ ଚଢା ମୁଖ୍ୟ ନିର୍ବାଚନ କମିଶନରଙ୍କୁ ବହିଷ୍କାର କରିବା ପାଇଁ ତାଙ୍କ ବିରୁଦ୍ଧରେ ମହାଭିଯୋଗ ପ୍ରସ୍ତାବ ଆବେଦନରେ ସ୍ୱାକ୍ଷର କରିବାକୁ ମନା କରିଥିଲେ। ଆଉ ଏକ ସ୍ପଷ୍ଟ ମିଛ। କୌଣସି ଆମ ଆଦମୀ ପାର୍ଟି ନେତା ମୋତେ ଏହି ପ୍ରସ୍ତାବରେ ସ୍ୱାକ୍ଷର କରିବାକୁ କହି ନଥିଲେ। ଆନୁଷ୍ଠାନିକ ଭାବରେ କିମ୍ବା ଅନୌପଚାରିକ ଭାବରେ ମଧ୍ୟ ମୋତେ ଜଣାଇ ନଥିଲେ। ଆମ ଆଦମୀ ପାର୍ଟିର ରାଜ୍ୟସଭାରେ ମୋଟ ୧୦ଜଣ ସାଂସଦ ଅଛନ୍ତି ସେମାନଙ୍କ ମଧ୍ୟରୁ ଛଅ କିମ୍ବା ସାତ ଜଣ ପ୍ରସ୍ତାବରେ ସ୍ୱାକ୍ଷର କରି ନଥିଲେ। ତେବେ ଏଥିରେ ମୋର ଦୋଷ କ’ଣ ବୋଲି ପ୍ରଶ୍ନ କରିଛନ୍ତି ରାଘବ।

Powered by Froala Editor