ଇରାନ ସହ ଆମେରିକା ଓ ଇସ୍ରାଏଲ ଯୁଦ୍ଧ ଦିନ ଗଡ଼ିବା ସହ ବିଧ୍ବଂସକ ହେବାରେ ଲାଗିଛି । ଆମେରିକା ଓ ଇସ୍ରାଏଲ ମିଶି ଇରାନ ଉପରେ ଘନ ଘନ ଆକ୍ରମଣ ଜାରି ରଖିଛନ୍ତି । ସେପଟେ ଇରାନ ପାଲଟା ଆକ୍ରମଣ କରି ଏହି ଦୁଇ ଦେଶଙ୍କ ନିଦ ହଜାଇ ଦେଇଛି । ମିଡିଲ ଇଷ୍ଟର ବିଭିନ୍ନ ଦେଶରେ ଥିବା ଆମେରିକା ବେସକୁ ଟାର୍ଗେଟ କରି ଧ୍ବଂସ କରିବାରେ ଲାଗିଛି । ଆଉ ଏହାରି ଭିତିରେ ହର୍ମୁଜ ପ୍ରଣାଳୀକୁ ଇରାନ ଅବରୋଧ କରିଛି । ଯାହାର ପ୍ରଭାବ ଏବେ ତେଲ ଓ ଗ୍ୟାସ ଉପରେ ପଡ଼ିଛି । ପେଟ୍ରୋଲ, ଡିଜେଲ ସହ ଧିରେଧିରେ ମହଙ୍ଗା ହେଉଛି ଖାଇବା ତେଲ। ଭାରତରେ ଏଲପିଜି ଗ୍ୟାସର ମୂଲ୍ୟ ବଢ଼ିଛି । ଘରୋଇ ସିଲିଣ୍ଡର ପିଛା ୬୦ ଟଙ୍କା ବଢ଼ିଥିବା ବେଳେ କମର୍ସିଆଲ ରେଟ ଏକାଥରେ ୧୧୫ ଟଙ୍କା ବୃଦ୍ଧି ପାଇଛି ।

ହର୍ମୁଜ ପ୍ରଣାଳୀକୁ ଅବରୋଧ କରିଛି ଇରାନ। କାତାର, ଇରାକ, ସାଉଦି ଆରବ ପରି ଦେଶରେ ଏଲପିଜି ଉତ୍ପାଦନ କମିଛି । ଅନେକ କ୍ଷେତ୍ରରେ ଗ୍ଯାସ୍ ପ୍ଲାଣ୍ଟ ମଧ୍ୟ ବୋମା ମାଡ଼ରେ ଧ୍ଵଂସ ହୋଇଯାଇଛି । ଯାହା ଫଳରେ ଏଲପିଜି ଦାମ ବଢ଼ିବାରେ ଲାଗିଛି । କେବଳ ସେତିକି ନୁହେଁ, ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦାମ ମଧ୍ୟ ବଢ଼ିଛି । ଏହା ବ୍ୟାରେଲ ପିଛା ୯୦ ଡଲାର ପାର୍ କରିଛି । ତେଣୁ ଆଗକୁ ପେଟ୍ରୋଲ ଡିଜେଲ ଦାମ ବଢ଼ିବାର ଆଶଙ୍କା ବି ଦେଖାଦେଇଛି । ଯୁଦ୍ଧ ଯଦି ଆଗକୁ ବଢ଼ିବ ତେବେ ପେଟ୍ରୋଲ, ଡିଜେଲ ଓ ଏଲପିଜି ଦାମ ଆହୁରି ବଢ଼ିବାର ଆଶଙ୍କା ରହିଛି ।

ଭାରତ ଉପରେ କି ପ୍ରଭାବ ପଡ଼ିବ?

ଭାରତ ନିଜର ଆବଶ୍ୟକତାର ପ୍ରାୟ ୮୫% ତୈଳ ଆମଦାନୀ କରିଥାଏ । ଅଶୋଧିତ ତୈଳ ଦର ବୃଦ୍ଧି ପରେ ସାଧାରଣ ଜନତାଙ୍କ ମନରେ ଭୟ ସୃଷ୍ଟି ହୋଇଛି ଯେ, ଏବେ ପେଟ୍ରୋଲ ଓ ଡିଜେଲ ଦର ପୁଣି ବଢ଼ିପାରେ । ଗତ ଶନିବାର ଘରୋଇ ଗ୍ୟାସ୍ ସିଲିଣ୍ଡର ପିଛା ୬୦ ଟଙ୍କା ବୃଦ୍ଧି ପାଇଛି । ତେବେ ଏହି ସଙ୍କଟ ମଧ୍ୟରେ ଭାରତ ସରକାରଙ୍କ ପକ୍ଷରୁ ଏକ ବଡ଼ ଆଶ୍ୱାସନା ମିଳିଛି । ସରକାରୀ ସୂତ୍ର ଅନୁସାରେ, ଭାରତରେ ବର୍ତ୍ତମାନ ପାଇଁ ପେଟ୍ରୋଲ ଓ ଡିଜେଲ ଦର ବଢ଼ାଇବାର କୌଣସି ଯୋଜନା ନାହିଁ । ହର୍ମୁଜ୍ ଜଳପଥ ବଦଳରେ ଭାରତ ଅନ୍ୟ ଉତ୍ସରୁ ତୈଳ ଆମଦାନୀ ହାର ୬୦% ରୁ ୭୦% କୁ ବୃଦ୍ଧି କରିଛି ।

Powered by Froala Editor