କଣିହାଁ: ଘରୁ ଶାଗ ତୋଳିବାକୁ ଯାଇ ନିଖୋଜ ଥିବା ଜଣେ ଆଦିବାସୀ ନାବାଳିକାଙ୍କ ମୃତଦେହ ଗାଁ ପଛ ପାଖରେ ଥିବା ଏକ ଜମି ମାଳରୁ ମିଳିଛି। ତାଙ୍କୁ ବଳାତ୍କାର ପରେ ହତ୍ୟା କରାଯାଇଥିଲା। ଅନୁଗୋଳ ଜିଲା କଣିହାଁ ବ୍ଲକ ଏନଟିପିସି ଟାଉନ ଥାନା ଅନ୍ତର୍ଗତ ବିଜିଗୋଳ ଗ୍ରାମର ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ପୁଲିସ ଏହି ଘଟଣାରେ ତଦନ୍ତ ସହ ମୃତକଙ୍କ ଘର ପାଖରେ ରହୁଥିବା ଆଶିଷ ନାଏକ(୨୦)କୁ ଗିରଫ କରିଛି। ଜିଲାର ବରିଷ୍ଠ ଅଧିକାରୀଙ୍କୁ ନେଇ ସାଇଣ୍ଟିଫିକ ଟିମ ଓ କେ ୯ ସ୍କ୍ୱାର୍ଡ ମାଧ୍ୟମରେ ତଦନ୍ତ ପ୍ରକ୍ରିୟାକୁ କ୍ରିୟାଶୀଳ କରି ୨୪ଘଣ୍ଟା ଭିତରେ ଅଭିଯୁକ୍ତକୁ ଗିରଫ କରାଯାଇ ପାରିଥିବା ଅନୁଗୋଳ ଏସପି ରାହୁଲ ଜୈନ ସାମ୍ବାଦିକଙ୍କୁ ସୂଚନା ଦେଇଛନ୍ତି।

ସୂଚନା ଅନୁସାରେ ଉକ୍ତ ନାବାଳିକା ଗୁରୁବାର ସକାଳ ୮ଟାରେ ଶାଗ ତୋଳିବାକୁ ଯାଇ ନିଖୋଜ ହୋଇ ଯାଇଥିଲେ। ଏନେଇ ପରିବାରବର୍ଗ ଏନଟିପିସି ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ପରିବାର ଲୋକଙ୍କ ସହାୟତାରେ ତାଳଚେର ଏସଡିପିଓ ଭରତ ସାହୁ, ଏନଟିପିସି ଥାନା ଆଇଆଇସି ସଂଯୁକ୍ତା ଖିଲାର ଓ ପୁଲିସ ବଳ ରାତି ସାରା ଖୋଜାଖୋଜି କରିଥିଲେ ମଧ୍ୟ ନାବାଳିକାଙ୍କୁ ପାଇ ନ ଥିଲେ। ତେବେ ସକାଳେ ନାବାଳିକା ପରିବାର ଓ ସାହି ଲୋକେ ରଙ୍ଗବେଡା ଜମି ମାଳରେ ଶବକୁ ଦେଖି ପୁଲିସକୁ ଖବର ଦେଇଥିଲେ। ପରିବାର ଲୋକେ ଝିଅକୁ ବଳାତ୍କାର ପରେ ହତ୍ୟା କରାଯାଇଥିବା ଓ ଘର ପାଖରେ ରହୁଥିବା ଆଶିଷ ତାଙ୍କୁ ହତ୍ୟା କରିଥିବା ଅଭିଯୋଗ କରିଥିଲେ। ଅନୁଗୋଳ ଏସପି ରାହୁଲ ଜୈନ ଓ ଅନୁଗୋଳ ଜିଲାର ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ସନ୍ଧାନୀ କୁକୁର, ସାଇଣ୍ଟିଫିକ ଟିମ୍‌ ଓ ମୋବାଇଲ ଟ୍ରାକିଂ ମାଧ୍ୟମରେ
ମାଜିଷ୍ଟ୍ରେଟଙ୍କ ଉପସ୍ଥିତିରେ ତଦନ୍ତ କରିଥିଲେ। ମୃତକଙ୍କ ଶବ ବ୍ୟବଚ୍ଛେଦ ପାଇଁ ତାଳଚେର ପଠାଯାଇଥିଲା। ଅପରପକ୍ଷେ ମୁଖ୍ୟ ଅଭିଯୁକ୍ତ ଆଶିଷ ନାଏକକୁ ଗ୍ରାମ ନିକଟରେ ଥିବା ଏକ ଘଞ୍ଚ ବୁଦା ମୂଳରୁ ଗିରଫ କରାଯାଇଥିଲା।

Powered by Froala Editor