ଟିଏମ୍‌ସି ସୁପ୍ରିମୋ ମମତା ବାନାର୍ଜୀ ଜାତୀୟସ୍ତରରେ ବିଜେପିର ମୁକାବିଲା କରିବା ପାଇଁ ଅଣ୍ଟା ଭିଡ଼ିଛନ୍ତି। ଏଣିକି ଅଗଷ୍ଟ ୧୬କୁ ‘ଖେଲା ହୋବେ ଦିବସ’ ଭାବେ ପାଳନ କରାଯିବ ବୋଲି ନାରା ଦେଇଛନ୍ତି । ଯେଉଁ ପର୍ଯ୍ୟନ୍ତ ସମଗ୍ର ଦେଶରୁ ବିଜେପିକୁ ହଟାଇ ଦିଆଯାଇ ନାହିଁ, ସେ ଯାଏ ଖେଲା ହୋବେ ବୋଲି ସେ କହିଛନ୍ତି। ବିଜେପିର ମୁକାବିଲା ପାଇଁ ନୂଆ ସାମ୍ମୁଖ୍ୟ ଗଠନ କରିବା ଜରୁରୀ ବୋଲି ମମତା ଟିଏମ୍‌ସିର ସହିଦ ଦିବସ ଅବସରରେ ଅନୁଷ୍ଠିତ ଭର୍ଚୁଆଲ ରୢାଲିରେ କହିଛନ୍ତି। 

ମମତା କହିଛନ୍ତି, “ଅଗଷ୍ଟ ୧୬ରେ ଖେଲା ହୋବେ ଦିବସ ପାଳନ କରାଯିବ। ଏହି ଦିନ ସବୁ ଗରିବ ପିଲାଙ୍କୁ ମାଗଣାରେ ଫୁଟବଲ ବଣ୍ଟାଯିବ। ଯେଉଁ ପର୍ଯ୍ୟନ୍ତ ସମସ୍ତ ରାଜ୍ୟରେ ବିଜେପିକୁ ପରାସ୍ତ କରାଯାଇ ନାହିଁ, ସେଯାଏ ଖେଲା ହୋବେ। ଆଜି ଦେଶର ସ୍ୱାଧୀନତା ବିପଦରେ ଅଛି। କେନ୍ଦ୍ରୀୟ ଏଜେନ୍ସିର ଅପବ୍ୟବହାର। ବିଜେପି ଗୋଟିଏ ହାଇ ଲୋଡଡେ ଭାଇରସ୍ ପାର୍ଟି। ବିଜେପିରେ କରୋନା ଅପେକ୍ଷା ଅଧିକ ଭାଇରସ ଅଛି। ବେକାରୀ ବୃଦ୍ଧି ପାଇଛି। ଗୁଳି ଓ ଗାଳିର ରାଜନୀତି ଚାଲିଛି।”

ଅନ୍ୟପକ୍ଷରେ ମମତାଙ୍କ ଖେଲା ହୋବେ ଦିବସକୁ ବିଜେପି ମୁସଲିମ ଲିଗ୍‌ ସହ ଯୋଡ଼ିଛି। ବିଜେପିର ରାଜ୍ୟସଭା ସାଂସଦ ସ୍ୱପ୍ନ ଦାସଗୁପ୍ତା କହିଛନ୍ତି, ମମତା ବାନାର୍ଜୀ ଅଗଷ୍ଟ ୧୬କୁ ଖେଲା ହୋବେ ଦିବସ ଭାବେ ପାଳନ କରିବାକୁ ଘୋଷଣା କରିଛନ୍ତି। ୧୯୪୬ ମସିହା ଅଗଷ୍ଟ ୧୬ରେ ମୁସଲିମ ଲିଗ୍ ଡାଇରେକ୍ଟ ଆକ୍ସନ ଡେ’ ଅଫ ମୁସଲିମ ଲିଗ୍ ଆରମ୍ଭ କରି ଗ୍ରେଟ କ୍ୟାଲକାଟା କିଲିଂର ମୂଳଦୁଆ ପକାଇଥିଲା। ତେଣୁ ବିରୋଧୀଙ୍କ ଉପରେ ଆତଙ୍କ ରାଜ ଚଳାଇବାକୁ ଖେଲା ହୋବେ ନାରା ଦିଆଯାଉଛି ବୋଲି ସେ ଅଭିଯୋଗ କରିଛନ୍ତି। 

ସୂଚନାଯୋଗ୍ୟ, ୨୭ ଜୁଲାଇରୁ ମମତାଙ୍କ ୩ ଦିନିଆ ଦିଲ୍ଲୀ ଗସ୍ତ କାର୍ଯ୍ୟକ୍ରମ ରହିଛି। ଏହି ଅବସରରେ ସେ ବିରୋଧୀ ଦଳ ନେତାମାନଙ୍କୁ ଭେଟି ନୂଆ ସାମ୍ମୁଖ୍ୟ ଗଠନ ନେଇ ଆଲୋଚନା କରିବେ। ପୋଗାସସ ପ୍ରସଙ୍ଗରେ ମମତା କହିଛନ୍ତି, ‘ମୁଁ ଜାଣିଛି ମୋ ଫୋନ୍‌ ଟ୍ୟାପ୍‌ ହେଉଛି। ସବୁ ବିରୋଧୀ ଦଳ ନେତାମାନେ ଜାଣିଛନ୍ତି ସେମାନଙ୍କ ଫୋନ୍‌ ଟ୍ୟାପ୍‌ ହେଉଛି। ମୁଁ ଏନ୍‌ସିପି ନେତା ଶରଦ ପାୱାର କିମ୍ବା ଅନ୍ୟ ନେତାମାନଙ୍କ ସହ କଥା ହେଲେ କେନ୍ଦ୍ର ସରକାର ତାହା ଉପରେ ନଜର ରଖୁଛନ୍ତି।’ 

Powered by Froala Editor